Nĩ Ĩkanisa Yĩva Yĩla Yaw’o?

Joseph Smith asyaiwe mwaka wa 1805 nthĩnĩ wa Sharon, Vermont. Ĩvinda yĩla ũkelwa ũũ ũkwambĩĩa, aĩna ũkũũ wa myaka 14, ayĩkala na mũsyĩ wake New York, na kwa ũkwatĩlĩĩlyo aimantha ĩkanisa ya kũlikana nayo. Ũla ũatĩĩe nĩ ũkelwa wa Joseph, ũandĩkĩtwe na ndeto syake mweene.

O ĩvindanĩ yĩĩ ya kũsaanĩw’a kũnene kĩlĩko kyakwa nĩkyeethĩiwe kĩisũanĩa kwa ũliku na kyeethĩwa kĩtekĩanĩe vyũ. Kwa mavinda nĩneeneenasya: Ũla wa kwĩkwa nĩ mwaũ? Katĩ wa syama ii syonthe kya w’o nĩ kĩva; kana, syonthe nivĩtĩtye o vamwe? Ethĩwa okĩmwe nĩ kya w’o, nĩ kĩva, na ngakĩmanya ata?

Joseph Smith aĩmantha ũĩ kuma Mbivilianĩ

Akĩĩsilĩlya ĩkanisa yĩla eũlikana nayo, Joseph nĩwavĩndũkĩie Mbivilia ĩmũtongoesye. Vau asoma, “Mũvoye Ngai.”

Yĩla nakwetye kũthũkũma uungu wa wũmũ mwingĩ ũla waetetwe nĩ masindano ma syama ii sya ndĩni mayenda kũkwata nguma, mũthenya ũmwe nĩnasomaa Valũa wa Yakovo, kĩlungu kya mbee na mũsoa wa katano, ũla waasyaa: “Ĩndĩ ethĩwa ũmwe wenyu nũtielye ũĩ, namũvoye Ngai, ũla ũnengae andũ onthe na ũlau na ndeũkan’ya; nake akanengwa.”

Vayĩ kĩlungu kya maandĩko matheu kyaaũka na vinya ngoonĩ ya mũndũ ta ũndũ kĩĩ kyeekie ĩvindanĩ yĩĩ vala nĩĩ. Nĩtakyalikĩte na vinya mwingĩ nthĩnĩ wa mwĩw’ĩle w’onthe wa ngoo yakwa. Nĩnakĩĩsilĩilye ĩngĩ na ĩngĩ, nĩsĩ kana ethĩwa ve mũndũ wendaa ũĩ kuma kwa Ngai, ninye; kwa ũndũ wa kwĩka ndyeesĩ, na ateo ngwatie ũĩ mwingĩ mbee wa ũla naĩnaw’o ĩvindanĩ yĩu, ndikamanya nongi; nũndũ amanyĩsya ma ndĩni ma nguthu sya makanisa syĩ kĩvathũkan’yo maeleawa kĩlungu kĩmwe kya maandĩko matheu kĩvathũkan’yo mũno na kwananga ũkũmbaũ w’onthe nthĩnĩ wa kũsũngĩa ĩkũlyo yĩu kwa kũkunĩkĩla ĩngĩ Mbivilia.

Kwa ĩvinda yĩasa nĩnatw’ie kana no nginya nĩtiwe kĩvindunĩ na ũlitanĩlonĩ kana ti ũu nonginya nĩke ũndũ Yakovo welekelye, ĩla nĩ, mũvoye Ngai. Kwa ĩvinda yĩasa nĩnookie kũtw’a “mũvoye Ngai,” nĩtw’ĩte kana ethĩwa nũnenganae ũĩ kwa ala matielye ũĩ, na anenganae kwa ũlau, na ndasilĩlaa, no ndonya Kũsinda.