Woni Wa Mbee wa Joseph Smith
Kũatĩanĩa na ũũ, ũtw’i wakwa wa kũmũvoya Ngai, nĩnaendie kĩthekanĩ kũtata. Kyaĩ kĩoko kyanake, mũthenya mũtheu, ĩvindanĩ ya mbua ya mwaka wa ngili ĩmwe maana nyanya, na mĩongo ĩlĩ. Yaĩ ĩvinda ya mbee thayũnĩ wakwa kũtata ũndũ ta ũũ, nũndũ katĩ wa imako syakwa syonthe ndyaaĩthĩwa naatata kũvoya ndyumya wasya.
Ĩtina wa navika vandũ vala naĩ mbeenĩ nĩnavanga kũthi, na kũsisya ũthyũlũlũko wakwa, na kwĩĩyĩthĩa nĩn’yoka, nĩnatulilye ndu na kwambĩlĩĩlya kũnengane mawendi ma ngoo yakwa kwa Ngai. Ndyaĩ nĩnamba kwĩka ũũ, yĩla kwa mĩtũkĩ nakwatiwe nĩ vinya ndawĩsĩ ũla wa ngĩlilye vinya, na weethĩwa kĩluluutĩkya kya ũsen’ya kĩla kyoovie ũĩmĩ wakwa neethĩwa ndatonya kũneena. Kĩvindu kingĩ nĩkyoombanĩĩie ũthyũlũlũkonĩ wakwa, na nĩta kwa kavinda noonie nyie tanelekele kũminw’a nĩ wanangĩko wa mĩtũkĩ.
Ĩndĩ, nĩkĩĩte vinya wakwa w’onthe kũmwĩta Ngai ambumye vinyanĩ wa mũmaitha ũũ ũla waĩ anangwata, na ĩvindanĩ yĩla neeyũmbanĩtye kwĩyĩtũka na kwĩyĩeka wanangĩkonĩ—ti wanangĩko wa kwĩĩsilĩlya, ĩndĩ vinyanĩ wa kyũmbe kyaw’o kuma nthĩ ĩtenekee, ũla waĩna vinya waũsenya na ndyaawĩw’a ĩngĩ kyũmbenĩ kĩngĩ—ĩvindanĩ yĩĩ ya kũkĩa kwingĩ, nĩnoonie kyeni mũvw’ano wa kĩtuĩ kĩ ĩũlũ wa mũtwe wakwa, ũtisu wakyo nĩ wathonokete wa syũa, kĩla kyatheeie mbola mũvaka kyambalũkĩla.
O mĩtũkĩ yĩla kyaumĩlile nĩneeyĩthĩie nĩmumye kuma mũmaithanĩ ũla wangwete. Yĩla kyeni kĩu kyathyũmũie ĩũlũ wakwa nĩnoonie Andũ elĩ, ala ũtisu na, ũseo woo ũũleana na ũelesyo wonthe, maũngamĩte ĩũlũ wakwa kĩsevenĩ. Ũmwe woo nĩwaneenie nakwa, aimbĩta ĩsyĩtwa yakwa na asya, amwolootete ũla ũngĩ—“Ũũ nĩwe Mwana Wakwa Mwendwa. Mwĩw’e!”
Kĩeleelo kyakwa kya kũthi kũmũkũlya Mwĩaĩi kyaĩ kũmanya nguthunĩ syonthe sya makanisa yĩla yaĩ yaw’o nĩ yĩva, nĩkana ndonye kũmanya nĩ yĩva ndonya kũlikana nayo. Kavindanĩ kavũthũ, kwa ũu, nakwata vinya wakwa, nĩkana nĩthĩwe ndonya kũneena, nĩnamakũlilye Andũ ala maũngamĩte ĩũlũ wakwa kyeninĩ, nĩ nguthu yĩva ya makanisa yaĩ yaw’o (nũndũ kavindanĩ kau kĩtalikĩte ngoonĩ yakwa kana onthe maĩ mavĩtyo)—na yĩla ndonya kũlikana nayo.
Nĩnasũngĩiwe kana ndyaĩle kũlikana na yĩmwe, nũndũ onthe maĩ mavĩtyo; na Mũndũ ũla waneenaa nakwa aisye kana mĩĩkĩĩo yoo yonthe yaĩ ũthatyo mbee wa metho make; kana asomi asu onthe nathũku; kana: “manthengeeaa na ilomo syoo, ĩndĩ ngoo syoo syĩ kũasa nakwa, mamanyĩasya ta maũmanyĩsyo nao nĩ mĩao ya andũ, mena mũvw’ano wa ũngai, ĩndĩ nĩmakaĩĩĩte vinya ũsu.”
Na ĩngĩ ambata kũlikana na yĩmwe yamo; na maũndũ angĩ maingĩ nĩwandavisye, ala ndaandĩka ĩvĩndanĩ yĩĩ. Yĩla navĩndũkie ĩngĩ, nĩneeyĩthĩie ngomete na mũongo wakwa, nzyaĩtye ĩũlũ ĩtunĩ. Yĩla kyeni kyaendie, ndyaĩna vinya; ĩndĩ okwamĩtũkĩ nakwata vinya mwĩanu nĩnaendie mũsyĩ.