Ũnyamao

Joseph nĩwamwĩwie Ngai na ndaalikana na ĩkanisa ona yĩva yaĩvo. Akĩtavya andũ kĩla wonie na eew’a, ambĩlĩĩlya kũkwata usiĩo na ũnyamao.

O mĩtũkĩ nĩneethĩie … kana kũweta ũkelwa ũsu kwookĩlilye ũndũ mũnene wa kũvathwa nĩ asomi ma ndĩni, na kyaĩ kĩtumi kya kũnyamaw’a kũnene, kũla kwaendeeie na kwingĩva; ona naĩkamwana katesĩwe, oka ũkũũ wa myaka katĩ wa ĩkũmi na ĩna na ĩkũmi na ĩtano, na itumi syakwa sya thayũ iyaĩ iete kĩvathũkan’yo ĩũlũ wa nthĩ, ĩndĩ aũme ma kĩwango kĩ ĩũlũ nĩmookĩlasya nguma ĩtonya kũkĩlya ilĩko sya awanda kũleana nakwa, na kũete ũnyamao wĩ wũũ; na kĩĩ kyaĩna makanisa onthe—onthe makwatanĩte kũnyamasya.

Kĩu kyatumie nĩthĩwa na ũkunĩkĩli ũngĩ wa nthĩnĩ ĩvindani yĩu, waĩ ũsen’yo ũilyĩ ata kamwana katesĩkĩe, ka o vanini ĩũlũ wa ũkũũ wa myaka ĩkũmi na ĩna, na kala, o ĩngĩ, kalitanĩlwe nĩ kũkwata ũsũvĩo ũteanĩte nũndũ wa ũthũkũmi wa kĩla mũthenya, kũsũanĩwa ta ka ũko wa vata wa lũkwata wa anene ma nguthu sya ndĩni sya mĩthenya ĩsu, na kwenda kũete nthĩnĩ woo veva wa ũnyamasyo wĩ wũũ na kũumangana. Ĩndĩ kĩ kĩeni kana kĩtaĩ, ũũ nĩw’o kyailye, na mavinda maingĩ nĩ kyandeteae kyeva kingĩ.

Nĩnoonete woni; nĩneesĩ n’ye, na nĩneesĩ kana Ngai nĩweesĩ, na ndyaĩ nĩkaananĩsya, ona ndyaatata kwĩka ũũ.

Ĩndĩ, yaĩ ona kũtw’ĩka ata ũw’o ki kana nĩnoonete woni. Kuma ĩvinda yĩu nĩ nzũanĩĩte, kana neewie o ta Vaũlo, yĩla weeteteaa mbee wa Mũsumbi Akiliva, na aelesya o ũndũ waĩna woni yĩla woonie kyeni, na eew’a wasya; ĩndĩ ona ũũ vaĩ avũthũ ala mamũĩkĩĩe; amwe mayasya ndaĩ mũĩkĩĩku, angĩ maasya aĩna ndũũka; na avũthw’a na aumangwa. Ĩndĩ ũũ w’onthe ndwaa ananga ũw’o wa woni wake. Nĩwoonete woni, nĩweesĩ nĩw’o, na ũnyamao w’onthe uungu wa ĩtu ndwaĩ ũtonya kũvĩndũa; na nomatonye kũmũnyamasya mũvaka kĩkw’ũ, ĩndĩ nĩweesĩ, na akamanya mũvaka mĩthũmũ yake ya mũthya, kana nĩwaĩ onete kyeni na akew’a wasya ũkĩneena nake, na nthĩ yonthe ĩyaĩ ĩtonya kũtuma asũanĩa kana kũĩkĩĩa ũndũ ũngĩ.

Ũu nĩw’o kwailyĩ vala nĩĩ. Kwa ũw’o nĩnoonete kyeni, na nthĩnĩ wa kyeni kĩu nĩnoonie Andũ elĩ, na kwaw’o nĩmaneenie nakwa; na ona vala nĩnameniwe na kũnyamaw’a kwondũ wa kwasya nĩnoonete woni, na waĩ o ũw’o; na maendeee na kũnyamasya, na kũnumanga, na kũneena ũthũku w’onthe ĩũlũ wakwa kwa ũvũngũ nũndũ wa kwasya ũu, nĩnaisye ngoonĩ yakwa: Mwĩnyamasya nĩkĩ kwondũ wa kũneena ũw’o? Ũw’o nĩnoonete woni; na nin’ye e ũũ ndonya kũmũsiĩa Ngai, kana nĩkĩ nthĩ yĩkũsũanĩa kũtuma n’ye nĩkaananĩsya kĩla kwa w’o ki noonie? Nũndũ nĩnoonete woni; na nĩneesĩ n’ye, na nĩneesĩ kana Ngai nĩweesĩ, na ndyaĩ nĩkaananĩsya, ona ndyaatata kwĩka ũu; ona vailye ũu nĩneesĩ kana kwa kwĩka ũu nĩngũmwĩw’ĩthya Ngai woo, na ndyĩthĩwa uungu wa ũsilĩlo.

Nĩneew’aa yu kĩlĩko kyakwa kĩkĩanĩe kwĩanana na nguthu sya nthĩ sya makanisa—kana ũyaĩ wĩa wakwa kũlikana na yĩmwe yamo, ĩndĩ kũendeea ũndũ nailye mũvaka nelekelw’e mbeange. Nineethĩie ũkũsĩ wa Yakovo kwĩthĩwa wĩ wa w’o kana mũndũ ũla watielye ũĩ noamũvoye Ngai, na aikwata, na ndekanw’a.

Nĩnaendeeie na kũkũna mawĩa makwa ma thayũnĩ mũvaka matukũ mĩongo ĩlĩ na yĩmwe Mwei wa Kenda, mwaka wa ngili ĩmwe, maana nyanya na mĩongo ĩlĩ na itatũ, mavinda onthe ndikwata ũnyamao mwingĩ mokonĩ ma mĩthemba yonthe ya andũ, ma ndĩni, na mate ma ndĩni, nĩkwĩthĩwa nĩnaendeeie na kũlũlũmĩĩlya kana nĩnoonete woni.

Ĩvinda yĩla yeethĩiwe katĩ wa yĩla naĩna woni na mwaka wa ngili ĩmwe maana nyanya na mĩongo ĩlĩ na itatu—nĩthĩĩtwe nĩvatĩtwe kũlikana na ndĩni ona yĩva ya mĩthenya ĩsu, na nĩwa myaka mĩnini, na kũnyamaw’a nĩ ala maĩlĩte kwĩthĩwa me anyanyawa na kwĩthĩwa manguaa kwa ũseo, na kethĩwa nĩmoonaa ta naĩmũkenge kwĩthĩwa matatie kwa nzĩa nzeo na ya wendo wa ngoo kwĩthĩwa mandũngĩthisye—nĩnatiiwe mĩthembanĩ yonthe ya matatwa; na, kũvulana na andũ ma mĩthemba yonthe, mavinda maingĩ nĩnavalũkaa mavĩtyonĩ ma ũtumanu, na kwonan’ya wonzu wa ũmũika, na mawonzu ma kĩĩmũndũ; ala, ngwĩtya ũekeo ndĩweta, nĩmandwaie matatwanĩ ma kĩla mũthemba, ma ũthatyo mbee wa metho ma Ngai. Nthĩnĩ wa kũumbũla kũũ, vayĩ ũmwe waĩle kũmbĩĩsilĩlya n’ye naĩle kwĩka naĩ nene kana ila itasiĩĩka na ĩtonya kũmũũmĩsya mũndũ. Ndyaĩ wa ũko wa kwĩka naĩ sya mĩthemba ta ĩsu.