ʻOku ou kau nai ʻi heʻeku hoko ko ha mēmipa ʻo e Siasí?

ʻIo. ʻOku fiemaʻu koe ʻe he kāingalotu ʻo e Siasí mo fakaʻamu ke ke kau mai. Kapau ʻokú ke pehē ko e tokotaha liliu ʻo fakafāfine pe fakatangata koe, ʻoku mau ʻiloʻi ʻokú ke fefaʻuhi mo ha ngaahi faingataʻa lahi. ʻOkú ke taau pē mo ho fāmilí mo e kaungāmeʻá ke maʻu ʻa e ʻofa faka-Kalaisí ʻo tatau mo e fānau kehe ʻa e ʻOtuá pea ʻoku totonu ke tokangaʻi ʻi he ongoʻingofua, angaʻofa, mo e manavaʻofa.

Ko e Siasí ki “hono fakahaohaoa ʻo e kakai māʻoniʻoní” (ʻEfesō 4:12). ʻOku teʻeki ke haohaoa ʻa e kāingalotú ka ʻoku nau feinga ke hoko ʻo tatau ange mo e Fakamoʻuí.

He ʻikai ke haohaoa ʻa e tokotaha kotoa ʻoku mou feohí ʻi hono fakahaaʻi ʻo e ʻofá, manavaʻofá pe ongoʻingofuá. ʻI he māmaní ʻi he ʻahó ni, ʻoku faingofua ke te ongoʻi loto lavea pea ke fakalaveaʻi ha loto. ʻE lava ʻe he ngaahi faingataʻa lahí ʻo ʻai ke tau tuʻu laveangofua ki he ngaahi fakalavea loto naʻe ʻikai fakataumuʻa peheé koeʻuhí ko e fehālaaki ha lea pe fakamatala. ʻI heʻetau hoko ko e kāingalotu ʻo e Siasí, ʻoku tau ako kotoa mo tupulaki.