ʻE lava fēfē ke u tokoni ki he puleʻanga ʻo e ʻEikí?

ʻOku talaʻofa mai ʻa e ʻOtuá kapau te tau talangofua ki he ʻEne ngaahi fonó, te tau maʻu ʻa e fiefia taʻengatá. ʻOkú Ne tauhi maʻu pē ʻEne ngaahi talaʻofá. Kapau ʻokú ke pehē ko e tokotaha koe kuo liliu ʻo fakafāfine pe tangata, te ke lava ʻo fakahoko mo tauhi ʻa e ngaahi palōmesi ki he ʻOtuá. Te ke lava ʻo ʻaʻeva ʻi he ʻEne māmá pea kau atu ki Hono Siasí.

Naʻe pehē ʻe ʻEletā D. Toti Kulisitofāsoni: “ʻOku ʻi ai e ngaahi meʻafoaki ʻa e taha kotoa; ʻoku ʻi ai e talēniti ʻo e taha kotoa; ʻe lava e taha kotoa pē ʻo kau ki hono fakahoko e palani fakalangí he toʻu tangata takitaha. … ʻOku tokolahi hamou niʻihi ʻoku mou fai homou lelei tahá. Pea ʻi he taimi ʻoku tuʻu ai [ʻa] kimoutolu ʻoku fuesia ʻa e kavenga mamafa taha fakamatelié ʻo taukapoʻi ʻa e palani ʻa e ʻOtuá ke hakeakiʻi ʻEne fānaú, ʻoku tau mateuteu kotoa leva ke laka atu. ʻOku tau fakamoʻoni taʻe-toe-veiveiua ki he meʻa naʻe fakataumuʻa ki ai ʻa e Fakalelei ʻa Sīsū Kalaisí, pea ʻi he ikuʻangá te Ne totongi huhuʻi ʻa e meʻa kotoa pē naʻe mole meiate kinautolu ʻoku tafoki kiate Iá. ʻOku ʻikai ke ʻi ai ha taha ia kuo tuʻutuʻuni pau mai ke ne maʻu pē ha meʻa siʻisiʻi ange ʻi he meʻa kotoa kuo ʻomi ʻe he Tamaí maʻa ʻEne fānaú” (“ʻUhinga ʻo e Malí, ʻUhinga ʻo e Fāmilí,” Liahona, Mē 2015, 52).