ʻOku ʻofa nai ʻa e ʻOtuá ʻiate au?

ʻIo, ʻoku ʻofa ʻa e ʻOtuá ʻiate koe. ʻOkú Ne ʻafioʻi mo ʻofa ʻi Heʻene fānaú kotoa, pea ʻokú Ne ʻafioʻi ʻa e ngaahi faingataʻa ʻokú ke fehangahangai mo iá. Naʻe fakamatala ʻa Palesiteni Tōmasi S. Monisoni: “Kuo teʻeki ai liliu e ʻofa ko iá. … ʻOku ʻi ai maʻu pē ia ʻi he taimi ʻokú ke loto mamahi pe fiefia aí, loto foʻi pe fakatuʻamelie aí. ʻOku ʻofa e ʻOtuá tatau ai pē pe ʻokú ke ongoʻi taau ke maʻu [ia] pe ʻikai. ʻOku ʻi ai maʻu pē ia” (“ʻOku ʻIkai ʻAupito ke Tau Tuenoa,” Liahona, Nōvema 2013, 123–24).

Naʻe akoʻi ʻe Palesiteni Lāsolo M. Nalesoni: “ʻOku laka ange ʻi ha toe meʻa, ʻa e finangalo ʻa ʻetau Tamaí ke fili ʻEne fānaú ke foki ki ʻapi kiate Ia. Ko e meʻa kotoa pē ʻokú Ne fakahokó ʻoku makatuʻunga ia ʻi Heʻene finangalo fakatuʻamelie ko iá” (“The Love and Laws of God” [Brigham Young University devotional, Sept. 17, 2019], speeches.byu.edu).

ʻOku ʻikai ha meʻa te ne fakahaaʻi lelei ange ʻa e ʻofa ʻa Sīsū Kalaisí, ka ko ʻEne finangalo ke foaki ʻEne moʻuí ko e fakalelei maʻá e ngaahi angahala ʻa e faʻahinga ʻo e tangatá ki he mamahi mo e ngāue taʻetotonu kotoa pē, pea vete ʻa e ngaahi haʻi ʻo e maté maʻá e tokotaha kotoa (vakai, ʻAlamā 7:11–13).

Naʻe akoʻi ʻe Sisitā Seiloni ʻIupengi: “ʻOku ou fakamoʻoni atu ʻoku ʻofeina kimoutolu. ʻOku ʻafioʻi ʻe he ʻEikí hoʻo feinga mālohí. ʻOkú ke laka kimuʻa. Hokohoko atu ai pē. ʻOkú Ne ʻafioʻi hoʻo ngaahi feilaulau ʻoku ʻikai ke ʻilo ki ai ha tahá pea ʻe lau ia ki hoʻo leleí mo kinautolu ʻokú ke ʻofa aí. ʻOku ʻikai ke taʻeʻaonga hoʻo ngāué. ʻOku ʻikai ke ke tuēnoa” (“Ko Kalaisi ʻa e Maama ʻoku Ulo ʻi he Fakapoʻulí,” Liahona, Mē 2019, 75–76).