Ko e hā ʻa e tuʻunga ʻo e Siasí ki he liliu ʻo fakafāfine pe fakatangatá?

“Ko kinautolu ʻoku nau ongoʻi ʻoku ʻikai tatau honau tuʻunga tangata pe fefine fakaelotó mo honau tuʻunga totonu naʻe fanauʻi mai ʻaki kinautolú … ʻoku nau faʻa fepaki mo ha ngaahi pole faingataʻa. ʻOku totonu ke tokangaʻi kinautolu—mo honau fāmilí mo e kaungāmeʻá—ʻi he ongoʻingofua, angaʻofa, manavaʻofa, mo e ʻofa faka-Kalaisi. …

“Ko e niʻihi fakafoʻituitui moʻui taau ko ia ʻoku ʻikai ke nau feinga ke tafa, fakahoko ha faitoʻo, pe liliu fakasōsiale mei honau tuʻunga tangata pe fefine totonu ʻi honau fanauʻí, ʻe lava ke nau fiefia ʻi he ngaahi monūʻia kotoa ʻo e mēmipasipi ʻi he Siasí.

“ʻOku enginaki ʻa e kau taki ʻo e Siasí ke ʻoua naʻa fai ha tafa, fakahoko ha faitoʻo, pe liliu fakasōsiale mei he tuʻunga tangata pe fefine totonu ʻo ha taha ʻi hono fanauʻí. (ʻOku ʻuhinga ʻa e liliu fakasōsialé ki hono tala mo fakahaaʻi kita ʻi ha tuʻunga tangata pe fefine ʻoku kehe mei he tuʻunga tangata pe fefine totonu naʻe fanauʻi mai ai kitá, pea ʻe lava ke kau ai ʻa e fetongi e kalasi vala ʻoku tuí, teuteú, hingoá, pe fetonginauná.) ʻOku faleʻi ʻe he kau takí ʻe hoko hano fai ʻo e ngaahi meʻá ni ko ha tuʻunga ia ke fai ai ha ngaahi fakataputapui ʻe niʻihi ki he tuʻunga mēmipasipi ʻi he Siasí. ʻOku kau ʻi he ngaahi fakataputapui ko ʻení ʻa hono maʻu pe fakaʻaongaʻi ʻo e lakanga fakataulaʻeikí, maʻu pe fakaʻaongaʻi ha lekomeni temipale, mo e ngāue ʻi ha ngaahi fatongia faka-Siasi ʻe niʻihi. …

“Ko e kāingalotu naʻa nau ʻosi fakahoko ha ngaahi sitepu ki he liliú pea kuo nau toe liliu fakafoki ki honau tuʻunga tangata pe fefine totonu ʻi honau fanauʻí, pea ʻoku nau moʻui taau mo tukupā ke tauhi ʻa e ngaahi fekau ʻa e ʻOtuá, te nau lava ʻo fiefia ʻi he ngaahi monūʻia kotoa ʻo e mēmipasipi ʻi he Siasí.

“ʻOku kehekehe ʻaupito ʻa e ngaahi tūkungá mei he tokotaha takitaha pea ʻe lava ke liliu ia ʻi he fakalau ʻa e taimí. Ko e kāingalotu ʻoku nau ongoʻi ʻoku ʻikai fenāpasi honau tuʻunga tangata pe fefiné mo honau tuʻunga tangata pe fefine totonu ʻi honau fanauʻí pe ʻoku nau pehē ʻoku nau fakafāfine/fakatangatá, kae pehē ki he mātuʻa pe kau tauhi ʻo e kakai taʻu siʻi ʻoku nau fehangahangai mo e faʻahinga tūkunga peheé, ʻoku poupouʻi kinautolu ke nau kumi faleʻi mei heʻenau pīsopé. ‘Oku talanoa ʻa e pīsopé mo e palesiteni fakasiteikí ki he ngaahi tūkunga fakafoʻituituí ʻi ha founga ʻoku pelepelengesi mo ha ʻofa faka-Kalaisi. ʻE kumi faleʻi ʻa e kau palesiteni fakasiteikí mo e kau palesiteni fakamisioná mei he Kau Palesitenisī Fakaʻēliá” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.23).