Ko e hā ʻa e meʻa ʻoku totonu ke u fai kapau ʻoku ou loto-taʻotaʻomia pe loto-hohaʻa pe fakakaukau ke taonakita?

Ngaahi Telefoni Tokoni ki ha Faingataʻa

Kapau ʻokú ke fakakaukau te ke ala fakalaveaʻi koe, kumi tokoni ʻi he vave tahá. Tā ki ha kautaha tokoni fakavavevave pe ko ha telefoni tokoni taʻetotongi ki he faingataʻaʻiá ʻi homou feituʻú.

ʻE lava ke maʻu ha ngaahi laine tokoni ʻi he “ʻOkú Ke Fepaki mo ha Faingataʻa? Talanoa he taimí ni ki ha taha.” (ChurchofJesusChrist.org).

ʻOku moʻoni ʻa e ongoʻi loto-taʻotaʻomiá pea ʻe malava pē ke fakamafasia mo holoki moʻui ia. Kapau ʻokú ke ongoʻi loto-taʻotaʻomia pe fakakaukau ke fakalaveaʻi koe, kātaki ʻo talanoa ki ha tokotaha ʻokú ke falala ki ai. Kapau ʻokú ke ʻi he ʻIunaiteti Siteití, tā ki he Laine Telefoni Tokoni Fakafonua ki Hono Taʻofi e Taonakitá. Vakai ki he ngaahi maʻuʻanga tokoni ʻa e Siasí ki he taonakitá, hangē ko e Ngaahi Fakakaukau Taonakitá, ʻi he Tokoni ʻo e Moʻuí mo e Moʻui Fakafalala Pē Kiate Kitá ʻi he ChurchofJesusChrist.org pe ʻi he polokalama Gospel Library. ʻE lava ʻo tokoni foki mo e faleʻi fakapalōfesinalé mo e tokoni fakafaitoʻó.

Loto-Taʻotaʻomiá mo e Taonakitá

ʻOku hā mei he fekumí kapau ʻokú ke aʻusia ʻa e ngaahi ongo liliu tangata pe fefiné, ʻokú ke tuʻu lavea ngofua ange ki he loto-taʻotaʻomiá pe taonakitá. Kapau ʻokú ke loto-taʻotaʻomia pe fakakaukau taonakita, kātaki ʻo fekumi ki he tokoni ʻa ha tokotaha mataotao ki he moʻui lelei fakaʻatamaí. ʻE lava ʻo maʻu e Tokāteliné mo e Ngaahi Tefitoʻi Moʻoní mo ha ngaahi maʻuʻanga tokoni kehe ʻi he konga ki he taonakitá ʻi he Tokoni ʻo e Moʻuí mo e Moʻui Fakafalala Pē Kiate Kitá ʻi he ChurchofJesusChrist.org pe ʻi he polokalama Gospel Library.

Naʻe vahevahe ʻe Sisitā Leina I. ʻĀpeto, ʻi he konifelenisi lahi ʻo ʻOkatopa 2019, ʻene aʻusia fakamamahi ʻo e loto-taʻotaʻomiá mo e taonakitá. Na‘a ne pehe ko e “ongoʻi loto-taʻotaʻomiá, loto-hohaʻá, mo e ngaahi fakafōtunga kehe ʻo e faingataʻaʻia fakaeʻatamaí mo fakaelotó … [ʻoku] lava ke nau fakakeheʻi e anga ʻetau vakai kiate kitautolú, niʻihi kehé, pea naʻa mo e ʻOtuá foki. …

“… Oku hangē pē ʻa e ʻutó ko e ngaahi konga kehe ʻo e sinó, ʻoku moʻulaloa ki he mahamahakí, ngaahi faingataʻaʻiá, pea mo e fetōʻaki e ngaahi kemikalé. …

“ʻI ha ngaahi tūkunga ʻe niʻihi, ʻe lava ke ʻiloʻi e tupuʻanga ʻo e loto-taʻotaʻomiá pe loto-hohaʻá, ka ʻe faingataʻa ia ʻi he taimi ʻe niʻihi ke ʻiloʻi. … ʻOku fie maʻu foki ke fakahoko ʻa e faleʻi pe faitoʻo ʻi he malumalu ʻo e fakahinohino mei ha tokotaha taukei fakapalōfesinale.

“ʻE malava ke iku e ngaahi mahaki fakaeʻatamai pe fakaeloto ʻoku ʻikai faitoʻó ke fakalalahi ange ʻa e ongoʻi liʻekiná, taʻefemahinoʻakí, maumau ʻa e ngaahi vā fetuʻutakí, fakalaveaʻi pē kitá, pea aʻu ki he taonakitá. …

“Kae fakamamahí, ʻoku fakamamaʻo ha tokolahi ʻo kinautolu ʻoku moʻua ʻi he tōtuʻa e loto-taʻotaʻomiá mei honau kaungā Kāingalotú he ʻoku nau ongoʻi ʻoku ʻikai ke nau feʻunga mo e tuʻunga ʻoku fakakaukau ki ai e niʻihi kehé. Te tau lava ʻo tokoni ke nau ʻilo mo ongoʻi ʻoku nau kau fakataha moʻoni mo kitautolu. ʻOku mahuʻinga ke ʻiloʻi ko e loto-taʻotaʻomiá ʻoku ʻikai ko e ola ia ʻo ha vaivaiʻanga, pe ko e ola angamaheni ia ʻo e angahalá. ʻOku ʻfakautuutu ia ʻi hono fakapuliʻí kae siʻisiʻi ʻi he loto fie kaungā ongoʻíʼ [Jane Clayson Johnson, Silent Souls Weeping (2018), 197]” (“[Lolotonga e Ngaahi Faingataʻá, ʻEiki Ta Feʻao Pē]!,” Liahona, Nōvema 2019, 57–58).

Falala ki he ʻOtuá

ʻOku lea ʻa Palesiteni Sefilī R. Hōlani ʻi he loto-ʻofa fekauʻaki mo e loto-taʻotaʻomiá ʻo pehē: “Kāinga neongo pe ko e hā ʻokú ke fefaʻuhi mo iá—fakaʻatamai pe fakaeloto pe fakaesino pe ko ha faʻahinga meʻa pē—ʻoua naʻá ke fili ke ke taʻofi e mahuʻinga ʻo e moʻuí ʻaki haʻo fakangata ia! Falala ki he ʻOtuá. Pikitai ki Heʻene ʻofá. ʻIloʻi ʻe ʻi ai ʻa e ʻaho ʻe mafoa ngingila mai ai e atá pea ʻe mōlia atu leva e ngaahi haʻahaʻa kotoa ʻo e moʻui fakamatelié” (“Hangē ha Ipu kuo Maumaú,” Liahona, Nōvema 2013, 42).