Auala e Mafai Ai e Tagata Matutua Ona Faasoa Atu le Talalelei

2:46

O le valaaulia o isi e o mai ia Keriso o “le valaaulia aupito taua lea e mafai ona e ofo atu i se isi tagata,” aua o le talalelei a Iesu Keriso e aumaia le filemu, taitaiga, ma le malosiaga i tagata (Henry B. Eyring, “Come unto Christ,” Ensign, Mar. 2008, 49).

O Auala e Mafai e Tagata Matutua Ona Faasoa Atu ai le Talalelei

Ta’u i se tagata e alofa le Atua ia i latou ma e faapena foi oe.
Faalogo i se uo e aunoa ma le faamasino atu, ma faasoa atu lou mautinoa o le a fesoasoani le Atua ia i latou.
Faamafanafana i se uo o loo feagai ma se luitau—ma tatalo faatasi ma mo i latou.
Tesi i se uo ua fai si leva e te lei toe talanoa i ai, ma faailoa i ai e te popole [mo ia].
Talanoa e uiga i mea na e aoaoina i le lotu i le faaiuga o le vaiaso.
Faasoa atu se gaoioiga a le uarota e ala i se tusiga i luga o ala o faasalalauga faaagafesootai po o se valaaulia patino.
Faasoa atu se mau i se uo o loo feagai ma se luitau.
Faailoa atu oe lava i se tagata asiasi i le lotu, pe saofai i talane o se tagata fou.
Valaaulia se uo e te lua auai atu i se vasega o le faalagolago o le tagata ia te ia lava ma se vasega o le EnglishConnect.

Punaoa e Mafai e Tagata Matutua Ona Faasoa Atu i Uo

Fautuaga Faa-Perofeta

Ua ia te oe le avanoa, i aso uma, e faasoa atu ai le talalelei ma tagata o loo siomia oe ma fesoasoani ia i latou e fai se laa se tasi e latalata atili atu ai ia Iesu Keriso. Na toe faamautu mai e Peresitene Russell M. Nelson, “E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le faamoemoe ma le filemu lea e ‘silisili lava i mea uma e manatu i ai’ [Filipi 4:7]” (“Talaiga o le Talalelei o le Filemu,” Liahona, Me 2022, 7).

Ia faaaofia le Tama Faalelagi i au taumafaiga, ma ole atu ia te Ia mo se fesoasoani ao e faatinoina mataupu faavae o le “alofa, faasoa, ma le valaaulia.” O le a Ia faasino oe i moomooga ma manaoga faapitoa o tagata o loo siomia oe. O le a faatasi o Ia ma oe ao e faasoa atu valaaulia o le a taulima ai o latou manaoga.

Ao e tatalo mo avanoa e faatino na manaoga, o le a e maua tagata o e ua saunia e osia ma tausia feagaiga. O le a e malamalama i se tulaga loloto atu i le uiga o le avea ma se meafaigaluega i le fesoasoani i isi e ulu atu i le ala o feagaiga. O le a faatumulia e le Tama Faalelagi lou olaga i le olioli ao e fesoasoani i uo ia lagona le Agaga ma faalatalata atili atu ia Iesu Keriso.

Mafaufau e auauna atu i se misiona talai po o se misiona o auaunaga o se ulugalii po o se tagata toatasi pe a faataga ai e ou tulaga. “E tele naua auala e mafai e faifeautalai matutua ona fai ai mea e leai se isi na te mafaia. O outou o se ‘au ofoofogia mo le lelei, ua poto masani i le Ekalesia, ma ua i ai i ni tulaga lelei e faamalosiau ai ma lavea’i fanau a le Atua. … A e auauna atu, o le a e lagona le alofa o le Alii i lou olaga, o le a e iloa o Ia, o le a Ia silafia oe, ma ‘o le a tele lou olioli’ [Mataupu Faavae ma Feagaiga 18:15]” (Ronald A. Rasband, “How Great Will Be Your Joy,” Liahona, Nov. 2023, 53, 54).