Aron Tarakiia Ataeinnaine

Te Kantaninga Ibukin Rikirake I Bon Iroum

Te Rikirake I Bon Iroum e na buokiko ni kakorakora am onimaki iroun ao am kakoaua iroun Iesu Kristo ngkana ko reiakin Ana reirei man teimatoa ni kabonganai inanon maium. E na buokiko ni kakorakoraia am utu ae ngkai ao am utu nakon taai aika ana roko. E na buokiko ni katauraoiko ni karaoi ao ni kawakin berita aika tabu man karekei otenanti n te tembora. Ao e na katauraoiko bwa kona kakaonimaki, ao n ibuobuoki nakon Ana Ekaretia Iesu Kristo Ibukiia Aika Itiaki Ni Boong Aika Kaitira.

Te burokuraem ibukin Rikirake I Bon Iroum e kabonganai waniua kororaoia Ataeinnaine bwa e na buokiko ni kaotako riki bwa antai ngkoe, bukin tera ko mena ikai iaon te aba, ao tera ae ko riai ni karaoia ngkai natin te Atua ngkoe te aine ni katauraoi nakon te tai are ko na nakon iai te tembora ni karaoi berita aika tabu. E na buokiko ni katauraoiko ibukin tabem nakon taai aika ana roko n riki bwa te aine, te bu aine, te tina, ao te tia kairiiri n abanuean te Atua ae kororaoi. Mwakurian te Rikirake I Bon Iroum e reireiniko ni karaoi tabem, kakoroi nanoia, ao n ribotina am waaki nakon te karo ke te tia kairiiri. Te banna ae ko karaoia n am tai ni karaoa te Rikirake I Bon Iroum—n aron te tataro, kamatebwai man booki aika tabu, mwakuri n ibuobuoki, ao tauan mwiin mwamwanangam—e na riki bwa kateim n te bong koraki. Katei aikai ana kakorakora am kakoaua man buokiko n reiakin ao n rikirake inanon maium.

Bwaai aika kainnanoaki

Aron katiaan te burokuraem n Rikirake I Bon Iroum, ko na tangiria n:

Ni kaea te bootaki n toa n taainako (ngkana e riai).
Maiuakina te kainibaire n te Ibukin Rikirakem I Bon Iroum.
Katia te atatai aika uaana ao mwakuri aika kakawaki ibukin anua ake waniua.
Kawakina oin am tienero.
Iriiri tieminari ke karaoi am kamatebwai n tii ngkoe (ngkana e riai).
Wareka Ana Boki Moomon n tainako.
Tau mwiin am kakoaua iroun te Tia Kamaiu Iesu Kristo.

Imwiin tian mwakuri aikai, ao ko a tau ngkanne nakon karekean Kinakin Aron Maiun te Aine Ni Koaua n raonaki ma te maroro ibukin te kororaoi ma am bitiobi ke ma am beretitenti n te mwaanga.

Moan Karaoana

Ko kona ni waakina karaoan te burokuraem n te Rikirake I Bon Iroum n te iteraniba 12 ke n am tai ni bwabetitoaki ngkana e mena am ririki imarenan te ririki 12 ao 18. Ataeinnaine aika tiaki kaain Ana Ekaretia Iesu Kristo Ibukiia Aika Itiaki Ni Boong Aika Kaitira a butimwaeaki naba bwa ana iri.

N am moan ni waaki, ao kona karekea te mae te tooti ma aia tooti ni bukinikoora Ataeinnaine iaona. Maenakin te mae aei e kaota nanom n taua ieta am oota man n tei ibukin te koaua ao te etieti.

Kaoia am karo bwa ana buokiko ni bairea ke ni katia te burokuraem Rikirake I Bon Iroum. Tibwauakin taian atatai aikai e kona ni kakorakora am reitaki ma ngaia. Tinam ke te aine temanna ae moan te tamaroa e kona ni mwakuri iaon te Rikirake I Bon Iroum ma ngkoe, ao ko kona ni uaia ni karekea Kinakin Aron Maiun te Aine Ni Koaua. Ko kona ni kabonganai atatai ao karikirake nakon oin am kanganga, te bwai ae mamaten nanom, ao kainnanom ma ana kariaia moa te karo, te tia kairiiri irouia Ataeinnaine, ke te kairake riki temanna.

Te Rikirake I Bon Iroum e kona n riki bwa mwakoron bwaai aika raraoi aika ko karaoi ni mweengam, n te taromauri, te reirei, tieminari, ao n te kaawa. Kabongana te intekiti n atun reirei iakuun te boki aei ni kakaei atuun reirei aika onoti aika iai nanom iai ao n reiakin bwa ana kanga ni kona ni kabonganaaki bwa mwakoron te Rikirake I Bon Iroum. Uringa n anganiko te bui ae tamaroa ibukin karaoan bwaai aika raraoi ni katoa bong. “Bwa a riki bwaai aika korakora man bwaai aika uarereke man aki kangaanga” (Aramwa 37:6).

Bwaai Ni Kairi

Ko na katiai onoua atatai (tenua aika kainnanoaki ao tenua aika rineaki) ao teuana te karikirake ae tebuina te aoa maanina ibukiia itiua moa kororaoia Ataeinnaine. Ibukin kakawakin te tamaroa, ko a kanoai aua atatai aika ana kainnanoaki ao te karikirake ae kainnanoaki ibukin warekan Ana Boki Moomon. Ko kona ni waaki ma te kororaoi ke te mwakuri ni karinaniia n anga aika mwaiti.

Ngkana ko a tia ni karaoa te taneiai ae kakawaki ke te mwakuri ae kakawaki, rinanona ma te karo, te mataniwi, ke te ikawai temanna. Karekea te aomata anne bwa e na tiaina arana ni kaota banen te bwai are ko a tia n rinanona n am boki ibukin te Rikirake I Bon Iroum. Taua mwiin am mwakuri iaon rikirakem n te Beeba Ibukin Tauan Mwiin Rikirake I Bon Iroum (tara iteraniba 77).

Taneiai Aika a Kakawaki

E a tia ni baireaki bwa ko na katiai taneiai aika kantaningaaki n te kororaoi imwain ae ko nakon atatai aika rineaki man te taneiai ae kakawaki anne.
Ma taneiai aika a kakawaki a tia n rineaki, ao ko kona ni koroi nakon uoua oin am taneiai ni katoa kororaoi akanne ke kabonganai taneiai ake a tia ni katauraoaki aika a na nakoraoi ma bwaai aika a mamate nanom iai, am kouru, ke bwaai aika a riki. Karekea am karo, te tia kairiiri, ke temanna te ikawai bwa e na kariai bwaai aikai imwain ae ko waaki.

Mwakuri aika Kakawaki

Katiai atatai aika kantaningaaki n te kororaoi imwain ae ko wakina te karikirake n te kororaoi anne, irarikin kakawakin te tamaroa. Ko kona ni moana am wareware n Ana Boki Moomon n te tai are ko rineia.
Karekea te karo, te tia kairiiri, ke te ikawai temanna bwa e na kariai moa mwakuri aika kakawaki imwain ae ko waaki.
Ko kona ni kaoia tabeman bwa ana buokiko n am mwakuri aika kakawaki, ma e na riai te mwakuri teuana ni kabanea tebuina te aua man oin am tai.

Marena ao te Kinaaki

Ko kona ni mwakuri nakon oin am marena, ma ko riai n tainako ni mwakuri iaon teuana atatai ke te karikirake. Aikai bwaai aika kantaningaaki karaoakiia:
- Katia teuana te atatai ni katoa namwakaina ao teuana te karikirake ni katoa onoua te namwakaina (uoua te karikirake ni katoa ririki).
- Irii bootaki n toa ni katoa tai ao ibuobuoki n tieminari (ngkana e riai).
- Bootaki ma am bitiobiriki ni katoa ririki ni maroroakina Rikirakem I Bon Iroum, am kekeiaki ni maiuakina te kainibaire n te Ibukin Rikirake I Bon Iroum, ao am titiraki riki tabeua ngkana iai.
Ngkana a tia taneiai ni kabane ao mwakuri iaon te kororaoi, ao e na kina kororaoim am mataniwi n tain aia bootaki Ataeinnaine n anganiko te kanikina are e na kanimwa iaon te boki ae Rikirake I Bon Iroum Te Tokanikai Ae Kororaoi (tara te iteraniba 78) ao te reben ae na katukaki iaon am booki aika tabu.
E na reke am tai n tibwaua am tokanikai iaon te Rikirake I Bon Iroum ni katoa ririki n Ataeinnaine Aika Moan te Tamaroa.
E kona naba am tokanikai iaon Rikirake I Bon Iroum n taua mwiia ngkana ko karekea am beeba ni kakoaua n te Biiaiwe, Mwaia maite, ao Raurere ngkana ko kitana te kiraati teuana nakon teuana.

Katiaan te Rikirake I Bon Iroum

Ngkana ko a tia ni karaoi ni kabane te Rikirake I Bon Iroum taneiai aika kakawaki ao mwakuri, korea am kakoaua iroun te Tia Kamaiu Iesu Kristo n te iteraniba 79. Manga rinanon mwakoron“Kinakin Aron Maiun te Aine Ni Koaua” ni mwakoron te boki aei ma te karo, te tia kairiiri, ke temanna te ikawai (iteraniba 76). Imwiina ao bairea am marooro ma te bitiobi n te aro bwa e na kona n tiaina am beeba ni kariaiakaki n te iteraniba 82 ao bairea aron kanakoan te beeba ni kakoaua ao te meetera ibukin Kinakin Aron Maiun te Aine Ni Koaua.
E a tia ni baireaki bwa ko na mwakuri iaon Rikirake I Bon Iroum inanon am tai n Ataeinnaine, e ngae ngke ko a tia ni karekea Kinakin Aron Maiun te Aine Ni Koaua. Iango tabeua bwa kona kanga n teimatoa ni waaki a reke inanon mwakoron “Tera Ae N Na Karaoia Ngkana E Bane Rikirake I Bon Iroum?” (iteraniba 83). Manga rinanon te bwai aei ma te karo, te tia kairiiri, ke te ikawai temanna. Ko kona n rineia bwa ko na karekea te bwai ni katamaroa ae te Honor Bee ae na kanimwaki ma mwaem ma am meetera, ke ko kona ni manga moana te burokuraem mai moana. Ko kaungaaki naba bwa kona buokiia ataeinnaine ake tabeman ma aia boki ae Rikirake I Bon Iroum. Ibukin kateimatoaan rikirakem, ao ko na teimatoa ni ira te kawai nakon te tembora man karikirakei anua aika ana buokiko inanon maium.