1 Ket ita siak, ni Nephi, irugik ti mangted iti salaysay kadagitoy a pinanid dagiti ar-aramidko, ken ti panagturayko ken ti naespirituan a panagserbik; gapuna, tapno marugian ti bukodko a salaysay, nasken nga agsaoak iti kas kadagiti banag ti amak, ken kasta met kadagiti kakabsatko.

2 Ta kitaen, napasamak a kalpasan nga insardeng ti amak iti panangibagana kadagiti balikas iti tagainepna, ken kasta met iti amin a kinaregta a panangyallukoyna kadakuada, imbagana kadakuada ti maipanggep kadagiti Hudio—

3 A kalpasanto iti pannakadadaelda, uray pay iti dayta naindaklan a siudad ti Jerusalem, ken adu ti naipanaw a kas balud ti Babilonia, a mayannurot iti naituding a panawen ti Apo, agsublidanto manen, wen, uray pay iti pannakawayawayada iti pannakaadipenda; ket kalpasan ti pannakawayawayada iti pannakabaludda tagikuaendanto manen ti tawidda a daga.

4 Wen, uray pay iti innem-a-gasut a tawen manipud iti panawen nga ipapanaw ti amak iti Jerusalem, mangpatanorto ti Apo a Dios iti propeta manipud kadagiti Hudio—uray pay ti maysa a Mesias, wenno, iti sabali a pannao, ti Mangisalakan iti lubong.

5 Ket insaona met ti maipapan kadagiti propeta, no kasano ti kaadu ti bilang dagiti nangpaneknek kadagitoy a banag, a maipanggep iti daytoy a Mesias, a nasaona, wenno daytoy Mannubbot iti lubong.

6 Gapuna, a ti sangkataoan ket adda iti kinamanagbasol ken iti pannakatnag a kasasaad, ket agnanayondanto a kastoy malaksid no agtalekdanto iti daytoy a Mannubbot.

7 Ket nagsao pay isuna maipanggep iti propeta nga umayto sakbay ti Mesias, tapno maisaganana ti dalan ti Apo—

8 Wen, ket mapanto isuna ken irakurakna iti langalang: Isaganayo ti dalan ti Apo, ket aramidenyo a nalinteg ti danana; ta addanto ti agtakder iti maysa kadakayo a saanyo nga am-ammo; ken nabilbilegto isuna ngem siak, ta diak maikari a mangwarwar iti kurdon ti sapatosna. Ket adu ti nasao ti amak maipanggep iti daytoy a banag.

9 Ken kinuna ti amak a mangbuniagto isuna idiay Bethabara, nga ad-adayo ngem iti Jordan; kasta met a mangbuniagto iti danum; kasta met a buniagannanto ti Mesias iti danum.

10 Ket kalpasan ti panangbuniagna iti Mesias iti danum, bigbigenna ken paneknekannanto ti panangbuniagna iti Kordero ti Dios, a mangikkatto kadagiti basol ti lubong.

11 Ket napasamak a kalpasan a nagsao ti amak kadagitoy a balikas imbagana kadagiti kakabsatko ti maipanggep iti ebanghelio a maikasabanto kadagiti Hudio, ken kasta met ti maipanggep iti in-inut a pannakapukaw dagiti Hudio gapu iti kaawan ti pammati. Ken kalpasan a napapatayda ti Mesias, nga umayto, ken kalpasan a napapatay bumangonto manipud kadagiti natay, ket agpakitanto isuna, babaen ti Espiritu Santo, kadagiti Gentil.

12 Wen, kasta met nga adu ti insao ti amak maipanggep kadagiti Gentil, ken kasta met ti maipanggep iti balay ni Israel, a nasken a maidiligdanto iti kayo ti olibo, matukkolto dagiti sangana ken maiwarasdanto iti amin a rabaw ti daga.

13 Gapuna, imbagana a nasken a maiturongtayonto a sangsangkamaysa iti naikari a daga, iti pannakaipatungpal ti balikas ti Apo, ta maiwarastayonto iti amin a rabaw ti daga.

14 Ket kalpasan ti pannakaiwarasto ti balay ni Israel mapagtitipondanto manen a sangsangkamaysa; wenno, iti pakadagupanna, kalpasan ti panangawat dagiti Gentil iti pakabuklan ti ebanghelio, dagiti gagangay a sanga ti kayo ti olibo, wenno dagiti natda iti balay ni Israel, nasken a maisulbongdanto, wenno maammuandanto ti pudno a Mesias, ti Apo ken Mannubbotda.

15 Ket iti kastoy a wagas ti pagsasao a nangipadto ken nagsao ti amak kadagiti kakabsatko a lallaki, ken kasta met dagiti adu pay a banag a saanko nga isurat iti daytoy a libro; ta adun kadakuada ti naisuratko a nasayaat para kaniak iti sabali a librok.

16 Ket amin dagitoy a banag, a nasaokon, naaramid bayat ti panagnaed ti amak iti tolda, iti tanap ti Lemuel.

17 Ket napasamak kalpasanna a siak, ni Nephi, nangngegak ti amin a balikas ti amak, maipapan kadagiti banag a nakitana iti parmata, ken kasta met dagiti banag nga imbagana babaen ti bileg ti Espiritu Santo, ti bileg nga inawatna iti Anak ti Dios babaen ti pammati—ket ti Anak ti Dios ti Mesias nga umayto—siak, ni Nephi, tinarigagayak met a makita, ken mangngeg, ken maammuan dagitoy a banag, babaen ti bileg ti Espiritu Santo, a sagut ti Dios kadagiti sireregta a mangsukisok kenkuana, kas iti nagkauna a panawen kasta met iti panawen nga agpakita isuna kadagiti sangkataoan.

18 Ta isuna ket isu met laeng idi kalman, ita, ken iti agnanayon; ket naisagana ti dana iti amin a tao manipud iti pannakabukel ti lubong, no la ketdi agbabawi ken umasidegda kenkuanna.

19 Ta no siasino man a sireregta nga agsapul makabirokto; ket maiparangto kadakuada dagiti misterio ti Dios, babaen ti bileg ti Espiritu Santo, kas kadagitoy a panawen kadagiti nagkauna a panawen, ken kas kadagiti nagkauna a panawen kadagiti masungad a panawen; gapuna, ti turong ti Apo ket maysa nga awan patinggana a panagrikus.

20 Ngarud laglagipem, O tao, ta maidatagto dagiti amin nga aramidmo iti pangukoman.

21 Gapuna, no inkagumaam ti nagaramid iti kinadakes kadagiti aldaw a pannakasuotmo, maduktalankanto a narugit iti sanguanan ti pangukoman ti Dios; ket saan a mabalin a makipagnaed iti Dios ti narugit a banag; gapuna, mapapanawkayonto iti agnanayon.

22 Ket inikkannak iti turay ti Espiritu Santo a nasken nga ibagak dagitoy a banag, ket saanko ida mailibak.