1 Ma ugbua mụ, Nifaị, na-aga n’iru inye nkọwasị ihe m meworo n’elu epekele ndị a, na ọchịchị na ije-ozi m; ya mere, n’ịga n’iru na nkọwasị m, m ga-ekwubiri ntakịrị okwu gbasara ihe nile nke nna m, na kwa nke ụmụnne m.

2 Ma lee, o wee ruo ka nna m kwusịrị okwu gbasara nrọ ya, na kwa ịgba ha ume ka ha lụsie ọlụ ike, ọ gwara ha okwu gbasara ndị Juu—

3 Ma mgbe ebibisịworo ha, ọbụna obodo-ukwu ahụ bụ Jerusalem, ma dọkpụrụ kwa ọtụtụ ha n’agha wee gaa Babịlọn, dịka oge Onye-nwe siri dị, ha ga alaghachị kwa ọzọ, e, ọbụna ịkpọghachị ha azụ site na ndọkpụ n’agha; ma mgbe a ga-akpọghachị ha azụ site ndọkpụ n’agha, ha ga-enwetakwa ala nke nketa ha.

4 E, ọbụna narị afọ isii site na mgbe nna m hapụrụ Jerusalem, onye-amụma ka Onye-nwe Chineke ga-ewelite n’etiti ndị Juu—ọbụna Mesaịa, ma-ọbụ, n’ikwu ya n’ụzọ ọzọ, Onye-nzọpụta nke ụwa.

5 Ma o kwukwara okwu gbasara ndị-amụma, lee ka ọtụtụ mmadụ gbaworo ama maka ihe ndị a, gbasara Mesaịa bụ onye nke o kwuworo maka ya, ma-ọbụ Onye-mgbapụta nke ụwa.

6 Ya mere, mmadụ nile furu efu ma nọrọ n’ọnọdụ ndị dara ada, ma ga-anọgide n’ọnọdu a ma ọbụghị ma ha dabere n’Onye-mgbapụta a.

7 Ma o kwukwara okwu gbasara onye-amụma ga-ebu Mesaịa ụzọ bịa, idozi ụzọ nke Onye-nwe—

8 E, ọbụna ọ ga-agakwa tie mkpu n’ọzara: Dozienu ụzọ nke Onye-nwe, meekwanụ ka ụzọ ya gụzozie; n’ihi na o nwere onye guzoro n’etiti unu onye unu na-amataghị; ma ọ dịkwa ukwuu karịa m, onye nke m na-etorughị ịtọpụ eriri akpụkpọ-ụkwụ ya. Ma ọtụtụ okwu ka nna m kwuru gbasara ihe nke a.

9 Ma nna m siri na ọ ga-eme baptism na Betabara, n’ofe Jọdan; ma o kwukwara na ọ ga-eji mmiri mee baptism, ọbụna na ọ ga-eji mmiri mee Mesaịa ahụ baptism.

10 Ma mgbe o jiworo mmiri mee Mesaịa ahụ baptism, ọ ga-ahụ na gbaa-ama na ya emewo Nwa-atụrụ nke Chineke baptism, bụ onye ga-ebupụ mmehie nile nke ụwa.

11 Ma o wee ruo mgbe nna m kwusịworo okwu ndị a o wee gwa ụmụnne m okwu gbasara ozi-ọma nke aga-agbasa n’etiti ndị Juu, na kwa gbasara ịla-azụ n’ekweghị ekwe nke ndị Juu. Ma mgbe ha gbuworo Mesaịa ahụ, nke ga-abịa, na mgbe egbuworo ya, ọ ga-esị kwa na ndị nwụrụ anwụ bilie, ma gosị kwa onwe ya, site na Mụọ Nsọ, nye ndị Jentaịlụ.

12 E, ọbụna nna m kwuru ọtụtụ okwu gbasara ndị Jentaịlụ ahụ, na kwa gbasara ụlọ nke Israel, na a ga-eji ha tụnyere osisi olive, nke aga-agbajipụ ngalaba ya wee fesasịa ya n’elu iru nile nke ụwa.

13 Ya mere, ọ sịrị na ọ ga-adị mkpa na a ga-eji otu obi duba anyị n’ala e kwere na nkwa, wee ruo mgbe a ga-emezu okwu nke Onye-nwe, na anyị ga-agbasasị n’elu iru nile nke ụwa.

14 Ma mgbe ekposasịrị ụlọ nke Israel a ga-ekpokọta kwa ha ọzọ; ma-ọbụ, na mkpirisi, mgbe ndị Jentaịlụ nabataworo uju nke ozi-ọma ahụ, ndị bụ ngalaba osisi olive ahụ n’ezie, ma-ọbụ ụfọdụ nke ụlọ nke Israel, ka a ga-akpọbata kwa, ma-ọbụ bịa na mmata nke ezi Mesaịa ahụ, Onye-nwe ha na Onye-mgbapụta ha.

15 Ma n’ụdị asụsụ dị otu a ka nna m jiri buo-amụma ma gwa kwa ụmụnne m okwu, na kwa ọtụtụ ihe ndị ọzọ ndị m na-agaghị ede n’akwụkwọ a; n’ihi na edewo m ụfọdụ n’ime ha m chere dị mkpa ka m dee n’akwụkwọ m nke ọzọ.

16 Ma ihe nile ndị a, m kwuru maka ha, bụ ndị e mere n’oge nna m bi n’ụlọ-ikwuu, nke dị na ndagwụrụgwụ Lemuel.

17 Ma o wee ruo na mụ, Nifaị, ka m nụworo okwu nile nke nna m, gbasara ihe ndị ọ hụrụ n’ọ́hụ̀, na kwa ihe ndị o kwuru site n’ike nke Mụọ Nsọ, bụ ike nke o nwetara site n’okwukwe o nwere n’Ọkpara nke Chineke—ma Ọkpara nke Chineke bụ Mesaịa ahụ nke ga-abịa—Mụ, Nifaị, chọsịkwara ike ka m hụ, ma nụ, ma mata gbasara ihe ndị a, site n’ike nke Mụọ Nsọ, nke bụ onyinye Chineke nye ndị nile na-achọsị ya ike, ma mgbe ochie ma kwa mgbe ọ ga-egosịpụta onwe ya n’iru ụmụ nke mmadụ.

18 N’ihi na ọ dị otu a, ụnyahụ, taa, na ruo mgbe nile; ma e doziworo mmadụ nile ụzọ site na ntọ-ala nke ụwa, ma ọbụrụ na ha ga-echegharị wee bịakwute ya.

19 N’ihi na onye ọbụla nke chọsịrị ike ga-achọta; na ihe omimi nile nke Chineke ka a ga-ekpughere ha, site n’ike nke Mụọ Nsọ, dịka ọ dị ugbua ka ọ dị kwa na mgbe ochie, ma otu ọ dị mgbe ochie ka ọ ga-adị kwa n’oge na-abịa abịa; ya mere, ụzọ nke Onye-nwe na-adị otu gburugburu ebighi-ebi.

20 Ya mere, cheta, O mmadụ, na n’ihe nile ị na-eme ka a ga-eji kpe gị ikpe.

21 Ya mere, ọbụrụ na unu chọrọ ime ihe ọjọọ n’ụbọchị nile nke mnwale unu, mgbe ahụ a ga-achọpụta na unu ruru inyi n’iru oche-ikpe nke Chineke; ma ọ dịghị ihe ọbụla ruru inyi nwere ike ibinyere Chineke; ya mere, a ga-achụpụ unu ruo mgbe nile.

22 Ma Mụọ Nsọ na-enye m ike ka m kwuo ihe ndị a, ghara ịgọnarị ha.