1 Bwa e koro bukina i mwin are I tangiria ni kan atai bwaai ake e a tia n noori tamau, ao I kakoaua bwa e kona te Uea ni kaoti nakoiu, ao ngke I a tekateka man iangoi baikai inanou ao e a uotai nako Tamnein te Uea, eng, nako taubukin te maunga ae moan te rietata, ae I tuai man nooria mai mwaaina, ao are I bon tuai man nakonako naba i aona.

2 Ao e taku te Tamnei nakoiu: Nooria, teraa ae ko tangiria?

3 Ao I taku: I kan noori bwaai ake e a tia n noori tamau.

4 Ao e taku te Tamnei nakoiu: Ko kakoaua ae e a tia tamam n noora te kai are e a tia n taekinna?

5 Ao I kaeka: Eng, ko bon ataia ae I kakoauai ana taeka ni kabane tamau.

6 Ao ngke I a tia n taekin taeka aikai, e takarua te Tamnei ma te bwanaa ae baibati, ni kangai: Otanna nakon te Uea, te Atua ae moan te rietata; bwa bon ngaia te Atua iaon te aonaba ni kabane, eng, iaon bwaai ni kabane. Ao ko na kakabwaiaki ngkoe, ae Nibwaai, ngkai ko kakoaua Natin te Atua ae moan te rietata; mangaia ae, ko na noori bwaai ake ko kan noori.

7 Ao nooria ko na anganaki aei bwa te kanikina, bwa ngkana ko a tia n noora te kai are e karika te uaa are e katoonga tamam, ao ko na noora naba te mwaane ae e na ruo mai karawa, ao ko na kakoaua; ao ngkana ko a tia ni nooria ao ko na tataekinna ae bon ngaia Natin te Atua.

8 Ao e koro bukina bwa e taku te Tamnei nakoiu: Taraia! Ao I taraia ao I a noora te kai; ao bon titebo ma te kai are e a tia n nooria tamau; ao moan te korakora tamaroana, eng, riaon tamaroan bwaai ni kabane; ao mainainana e a bon riaon mainainan te tinoo are e kamwaeaki n te ang.

9 Ao e koro bukina bwa ngke I a tia n noora te kai, ao I taku nakon te Tamnei: I nooria bwa ko a tia ni kaota nakoiu te kai ae kakawaki riki nakon bwaai ni kabane.

10 Ao e taku nakoiu: Tera ae ko tangiria?

11 Ao I kaeka ni kangai: I kan ataa nanona—bwa I kaakarabakau nakoina n titebo ma aron au kaakarabakau nakon te aomata temanna; bwa I nooria bwa titebo teiteina ma te aomata, ma I bon ataia bwa bon Tamnein te Uea ngaia; ao e kaakarabakau nakoiu n aiaron ana kaakarabakau te aomata nakon te aomata.

12 Ao e koro bukina bwa e taku nakoiu: Taraia! Ao I taraia n aiaron ae I bakan taraia, ma I aki nooria; bwa e a bua mai irarikiu.

13 Ao e koro bukina bwa I taratara nako ao I noora te kaawa ae korakora ae Ierutarem, ao kaawa riki tabeua. Ao I noora naba te kaawa ae Natareta; ao i nanon te kaawa ae Natareta ao I noora iai te kibono, ae e rang raka tamaroana ao mainainana.

14 Ao e koro bukina bwa I a noora naba karawa ae e uki; ao e a ruo rikaaki te anera n tei imatau; ao e taku nakoiu: Nibwaai, tera ae ko nooria?

15 Ao I kaeka nakoina: Te kibono, ae raka riki tikiraoina ma tamaroana nakoia kibono ni kabane.

16 Ao e taku nakoiu: Ko ataia ae e na ruo te Atua ni kamangoria nako aon te aba?

17 Ao I kaeka nakoina: I ataia ae e tangiriia natina; ma I aki atai nanon bwaai ni kabane.

18 Ao e taku nakoiu: Taraia, te kibono are ko a tia n nooria bon tinan Natin te Atua, n te maiu n rabwata.

19 Ao e koro bukina bwa I a nooria ae e uotaki nako i nanon te Tamnei; ao ngke e a tia ni uotaki nako i nanon te Tamnei n te tai ae maan, ao e a taetae te anera nakoiu, ni kangai: Nooria!

20 Ao I taraia ao I a manga noora riki te kibono arei, ae taua te teei i nanon baina.

21 Ao e taku te anera nakoiu: Noora ana Tiibu te Teei te Atua, eng, are bon Natin te Tama are Akea Tokina! Ko a oota n nanon te kai are e a tia n nooria tamam?

22 Ao I kaeka nakoina, ni kangai: Eng, bon ana tangira te Atua, are tibwatibwaia nako nanoia natin te aomata n taabo nako; mangaia ae, bon ngaia te bwai ae moamoa tangirana nakon tangiran bwaai ni kabane.

23 Ao e taetae nakoiu, ni kangai: Eng, ao bon te bwai ae moan baan te kakukurei nakon te tamnei.

24 Ao ngke e a tia n taekin bwaai aikai, ao e taku nakoiu: Taraia! Ao I taraia, ao I a noora Natin te Atua ni waaki i buakoia natia aomata; ao I a nooriia aika mwaiti aika a bwaka i waena man taromauria.

25 Ao e koro bukina bwa I a noora naba te kai ae te biti, are e a tia n nooria tamau, ae bon ana taeka te Atua, are e tiki nakon te koburake n ran ae maiu, ke n nakon te kai ni kamaiu; aika ranna bon kanikinaean ana tangira te Atua; ao I a nooria naba ae te kai ni kamaiu bon kanikinaean naba ana tangira te Atua.

26 Ao e taku te anera nakoiu: Taraia ao noora ruon te Atua ni kamangoria!

27 Ao I taraia ao I noora te Tia Kaboa te aonaba, are e a tia n taekinna tamau; ao I a noora naba te burabeti are e na katauraoa te kawai i mwaaina. Ao e a waaki Ana Tiibu te Teei te Atua ni bwabetitoaki irouna; ao i mwin bwabetitoakina, ao I a noora karawa bwa e uki, ao e a ruo te Tamnei ae Raoiroi mai karawa ao e a tiku i aona n ai aron te taobe.

28 Ao I a nooria naba n nako ni karaoa ana mwakuri n ibuobuoki i buakoia aomata, n te mwaaka ao te mimitong ae korakora; ao a uanao aomata ake a botaki bwa a na ongora irouna; ao I a nooria naba bwa a kakioa nako mai buakoia.

29 Ao I a nooria naba bwa tengaun ma uoman aika a iria. Ao e koro bukina bwa a uotaki nako i nanon te Tamnei mai matau, ao I a aki nooriia.

30 Ao e koro bukina bwa e taetae riki te anera nakoiu, ni kangai: Nooria! Ao I tararake, ao I manga noora naba karawa ae uki, ao I a nooriia anera aika a ruo nako aoia natia aomata; ao a karaoi mwakuri n ibuobuoki nakoia.

31 Ao e taetae riki nakoiu, ni kangai: Nooria! Ao I taraia, ao I a noora ana Tiibu te Teei te Atua ni waaki i buakoia natia aomata. Ao I a nooriia aomata aika a uanao aika a aoraki, aika a taonaki n aoraki aika a kakaokoro, ma riaboro, ma tamnei aika a bareka; ao e taetae te anera ao e kaoti bwaai aikai ni kabane nakoiu. Ao a kamaiuaki ni mwaakan ana Tiibu te Teei te Atua; ao a kaotinakoaki taian riaboro ma tamnei aika bareka.

32 Ao e koro bukina bwa e taetae riki te anera nakoiu, ni kangai: Nooria! Ao I taraia ao I a noora ana Tiibu te Teei te Atua, ae e kairaki nako irouia aomata; eng, e a motikaki taekan Natin te Atua ae akea tokina iroun te aonaba; ao I nooria ma ni kakoaua karaoana.

33 Ao Ngai ae Nibwaai, I a nooria ngke e a tabekaki nako aon te kaibangaki ao n tiringaki ibukin buren te aonaba.

34 Ao ngke e a tia n tiringaki ao I a nooriia aomata aika uanao i aon te aonaba, aika botaki bwa a na kaaitaraia ana abotoro te Tiibu te Teei; bwa anne te ara are a anganaki naake tengaun ma uoman iroun ana anera te Uea.

35 Ao a botaki aomata aika uanao iaon te aonaba; ao I a nooria bwa a mena i nanon te auti ae bubura man mwawawa ae titebo ma te auti are e nooria tamau. Ao e a manga taetae riki nakoiu ana anera te Uea, ni kangai: Tara te aonaba ma wanawanana nako; eng, nooria bwa e a botaki te bata are Iteraera ni kabane bwa na kaaitaraia ana abotoro te Tiibu te Teei.

36 Ao e koro bukina bwa I a nooria ma ni kakoaua, bwa te auti are e bubura man mwawawa bon kainikatongan te aonaba; ao e a bwaka, ao te bwaka aio bon moan te korakora. Ao e taetae riki ana anera te Uea nakoiu, ni kangai: Aio bon uruakan ni kabane taian aba, reeti, neewe, ao aomata, ake a na kaaitaraia ana abotoro ake tengaun ma uoman te Tiibu te Teei.