1 Ni a qai yaco ni oti na noqu gadreva me’u kila na veika a raica ko tamaqu, ka’u vakabauta tiko ni sa rawa vua na Turaga me vakatakilai ira vei au, ni’u sa dabe ka vakananuma tiko e lomaqu, sa kauti au yani na Yalo ni Turaga, io, ki na dua na ulunivanua cecere sara, ka’u sa sega mada ni raica e liu, ka sega mada ni bau butuka e liu.

2 Ka sa kaya vei au na Yalo: Raica, a cava ko sa gadreva?

3 Ka’u sa kaya: Au sa gadreva me’u raica na veika a raica ko tamaqu.

4 Ka sa kaya vei au na Yalo: Ko vakabauta li, ni a raica ko tamamu na vunikau ka a vosa kina?

5 Ka’u sa kaya: Io, ko ni kila ni’u sa vakabauta na vosa kecega i tamaqu.

6 Ia, ni’u sa tukuna oti na vosa oqo, sa kaci ena domo levu na Yalo ka kaya: Osana vua na Turaga, na Kalou sa cecere sara; ni sa Kalou ni vuravura kecega ko koya, io, sa uasivita na veika kecega. Ko sa kalougata ko iko, Nifai, ni ko sa vakabauta na luve ni Kalou sa cecere sara; o koya, ko na raica kina na veika ko sa gadreva.

7 Ka raica ena soli vei iko na ka oqo me ivakatakilakila, ni ko sa raica oti na vunikau ka a kania na vuana ko tamamu, ko na raica talega e dua na tamata ni sa siro sobu mai lomalagi, ka sai koya ko na vakadinadinataka, ia ni ko sa vakadinadinataki koya oti; ko na qai tukuna ni sa Luve ni Kalou.

8 Ka sa yaco ni sa kaya vei au na Yalo: Raica! Au sa rai yani ka raica e dua na vunikau; ka sa vaka na vunikau a raica ko tamaqu; ka sa uasivi sara na kena totoka, io, sa uasivita sara na ka totoka kecega; kei na kena vulavula sa uasivia na vulavula ni uca cevata.

9 Ka sa yaco, ni’u sa raica oti na vunikau, au sa qai kaya vua na Yalo: Au raica ni ko ni sa vakaraitaka vei au na vunikau sa talei duadua vei ira kecega.

10 Ka sa kaya vei au ko koya: A cava ko sa gadreva?

11 Ka’u sa kaya vua: Me’u kila na kena ibalebale—ni’u sa vosa vua me vaka ga au vosa tiko vua e dua na tamata, ni’u sa raica ni sa vaka ga na ibulibuli ni dua na tamata; ia au sa kila ni sai koya na Yalo ni Turaga; ka sa vosa vei au me vaka ga e vosa tiko e dua na tamata ki vua e dua tale.

12 Ka sa yaco ni sa kaya vei au ko koya: Raica! Ka’u sa rai yani me vaka au sa rai vua, ia au sa sega ni raici koya; ni sa yali mai mataqu ko koya.

13 Ka sa yaco, ni’u sa rai yani ka raica na koro levu ko Jerusalemi, kei na veikoro tale e so. Ka’u sa raica na koro ko Nasareci; ia ena koro ko Nasareci, au sa raica kina e dua na goneyalewa savasava, ka totoka sara ka vulavula.

14 Ka sa yaco ni’u sa raica ni sa tadola na lomalagi; ka sa siro sobu mai e dua na agilosi ka mai tu e mataqu; ka kaya vei au; i Nifai, a cava ko sa raica?

15 Ka’u sa kaya vua: E dua na goneyalewa savasava, ka sa uasivi cake na kena totoka kei na nona vulavula mai vei ira na goneyalewa savasava kecega.

16 Ka sa kaya vei au ko koya: Ko sa kila li na nona lomasoli na Kalou me lako sobu mai?

17 Au sa kaya vua: Au kila ni sa lomani ira na luvena ko koya; ia, au sa sega ga ni kila na ibalebale ni veika kece.

18 Ka sa kaya vei au ko koya: Raica, na goneyalewa savasava ko sa raica, sai koya na tinana vakayago, na Luve ni Kalou.

19 Ka sa yaco ni’u sa raica ni sa kau tani ko koya ena Yalo; ia ni sa oti e dua na gauna na nona kauti koya na Yalo sa vosa vei au na agilosi, ka kaya: Raica!

20 Ka’u sa rai yani ka raica tale na goneyalewa savasava oqo ni sa roqota tiko e ligana e dua na gone lailai.

21 A sa kaya vei au na agilosi: Raica na Lami ni Kalou, Io, na Luvena na Tamada Tawamudu! Ko sa kila li na ibalebale ni vunikau ka raica ko tamamu?

22 Au sa sauma, ka vaka: Io, sai koya na loloma ni Kalou sa sovaraki koya yani ki na yalodra na luve ni tamata; o koya, sa ka gadrevi vakalevu duadua kina mai vei ira na ka kecega.

23 A sa vosa tale vei au ka kaya: Io, sa ka rekitaki duadua ki na yalo.

24 Ia ni sa cavuta oti na veivosa oqo, sa kaya vei au ko koya: Raica! Au sa rai yani, ka’u raica na Luve ni Kalou, ni sa lako maliwai ira voli na luve ni tamata; ka’u raica e lewe vuqa ni ra sa cuva sobu ki yavana ka vakarokoroko vua.

25 Ka sa yaco ni’u a raica ni sa vosa ni Kalou na itautauri kaukamea ka a raica ko tamaqu, ka sa dodo yani ki na ivurevure ni wai bula, se ki na vunikau ni bula; ka sa ivakaraitaki ni loloma ni Kalou na wai; ka’u sa raica talega ni sa ivakaraitaki ni loloma ni Kalou na vunikau ni bula.

26 Ka sa kaya tale vei au na agilosi: Rai yani ka raica na nona lomasoli na Kalou me lako sobu mai!

27 Ka’u sa rai yani ka raica na Dauveivueti kei vuravura, ka a tukuna ko tamaqu; ka’u a raica talega na parofita ka na vakarautaka na sala e matana. Ka sa lako yani na Lami ni Kalou ka papitaisotaki mai vua; ia ni sa papitaisotaki oti, au sa raica ni sa tadola na lomalagi, ka lako sobu mai lomalagi na Yalo Tabu me vaka na ruve ka mai toka vua.

28 Ka’u sa raica ni sa lako yani ka qaravi ira na tamata, ena kaukauwa kei na lagilagi; ka’ra sa soqoni vata na lewe vuqa me ra rogoci koya; ka’u sa raica ni ra sa vakasavi koya tani mai na kedra maliwa.

29 Ka’u sa raica talega e le tinikarua tale ni ratou sa muri koya voli. Ka sa yaco ni sa kauti iratou tani mai mataqu na Yalo, ka’u sa sega ni raici iratou.

30 Ka sa qai yaco, ni sa vosa tale vei au na agilosi, ka kaya: Rai yani! Au sa rai yani, ka raica ni sa tadola tale na lomalagi, ka’u raici ira na agilosi ni ra sa siro sobu ki vei ira na luve ni tamata ka ra sa qaravi ira.

31 Ka sa vosa tale vei au ko koya, ka kaya: Rai yani! Au sa rai yani, ka’u raica na Lami ni Kalou ni sa lako yani ena kedra maliwa na luve ni tamata. Ka’u sa raica e lewe vuqa na tamata era sa tauvimate, ka ra a bikai tu ena veimataqali mate kecega, kei na tevoro kei na yalo dukadukali; ka sa vosataka ka vakaraitaka vei au na agilosi na veika kece oqo. Ka ra a vakabulai mai na nona kaukauwa na Lami ni Kalou; ka ra a vakasavi tani na tevoro kei na yalo dukadukali.

32 Ka sa yaco ni sa vosa tale vei au na agilosi, ka kaya: Rai yani! Ka’u sa rai yani ka raica na Lami ni Kalou ni ra sa vesuki koya ko ira na tamata; io, sa beitaka na Luve ni Kalou Tawavakaiyalayala ko vuravura; ka’u sa raica ka vakadinadinataka.

33 Ia au sa raica, koi au ko Nifai, ni sa laveti cake ko koya ena kauveilatai ka vakamatei ena vuku ni ivalavala ca ni vuravura.

34 Ia ni sa vakamatei oti, au sa raica ni ra sa soqoni vata na lewe vuqa kei vuravura, me ra veivala kei iratou na iapositolo ni Lami, ni sai koya oqori na yaca ka a vakatokai iratou kina na agilosi ni Turaga.

35 Ka sa soqoni vata na lewevuqa kei vuravura, ka’u raica ni ra sa tiko ena dua na vale rabailevu ka vakaitamera me vaka na vale ka a raica ko tamaqu. Sa vosa tale vei au na agilosi ni Turaga, ka kaya: Raici vuravura kei na nona yalomatua; io, raica sa soqoni vata na mataqali i Isireli me veivala kei iratou na lewe tinikarua na iapositolo ni Lami.

36 Ka sa yaco, ni’u sa raica ka vakadinadinataka, ni vale levu ka vakaitamera ko ya sai koya na viavialevu ni vuravura; a sa bale, ka sa ka levu sara na kena bale. Sa vosa tale vei au na agilosi ni Turaga, ka kaya: Ena vakaoqo na nodra vakarusai na veimatanitu, veimataqali, duivosavosa, kei ira na tamata, era na veivala kei iratou na le tinikarua na iapositolo ni Lami.