1 Hinaspataq noqa Nephi, wawqeykunaman rimayta tukusqay pataman, paykuna niwarqanku: Ancha k’ireq rimaykunatan niwarqankiku, apay atinaykumanta aswan k’ireqta, nispa.

2 Noqataq kutichirqani—yachanin cheqaqman hina huchallikuqkuna kontra k’ireq imaymanakunata rimasqayta; chaninkunatataq chanincharqani, qhepa p’unchawpi hoqarisqa kanankuta sut’inchaspa; chhaynaqa, huchallikuqkunaqa k’ireq kananpaqmi cheqaq kaqta tarinku, chawpinkukama paykunata k’ireqtin.

3 Kunantaq wawqeykuna, chanin kawaqchis, cheqaq kaqta uyariyta munawaqchis, chaytataq kasuwaqchis Yayaq ñawpaqenpi ch’uya purinaykichispaq chayqa, manan rimapakuwaqchischu cheqaq kaqrayku—k’ireqtan noqayku kontra rimanki, nispa.

4 Hinataq noqa Nephi, wawqeykunata anyarqani llapa k’uchi kaywan, Wiraqochaq kamachisqankunata waqaychanankupaq.

5 Hinataq Wiraqochaq ñawpaqenpi ullpuykukurqanku; chayraykutaq chaninchaypa ñanninkunapi purinankumanta ancha hatun kusikuyniyoq, hatun suyakuyniyoq ima paykunarayku karqani.

6 Kay imaymanakunataq nikurqan ruwarkurqan ima, Lemuel nispa sutiyasqan qheshwapi kaq karpapi taytay tiyashanankama.

7 Hinataq noqa Nephi, Ismaelpa hukninkaq ususinta warmiypaq akllarqani, wawqeykunapas Ismaelpa ususinkunamanta warminkupaq akllarqanku; Zorampas Ismaelpa kurakkaq ususinta warminpaq akllarqan.

8 Khaynatataq taytay, payman Wiraqochaq qosqan llapa kamachiykunata hunt’arqan; noqa Nephipas Wiraqochaq ancha saminchasqanmi karqani.

9 Hinataq Wiraqochaq arun tutapi taytayta rimarirqan, tutamantanpi purunpi puriyta qallarinanpaq kamachispa.

10 Taytaytaq tutamantanpi hatarisqanman hina, karpaq punkunman rispa utirayayninpaq panpapi huk muyu sinkuta rikurqan, bronsemanta ancha sumaq ruwasqata. Sinkuq ukhunpitaq ishkay t’oqpinakuna karqan, hukninkaqtaq purunpi may rinaykuta qhawachirqan.

11 Hinataq purunman apanayku imaymanakunata huñurqayku, Wiraqochaq qowasqanku imaymanakunaq puchunkunatawan; imaymana muhukunatataq huñurqayku, purunman apanaykupaq.

12 Karpaykuta apayukuspataq purunman rirqayku Laman mayuta chinpaspa.

13 Hinataq tawa p’unchaw purirqayku intiq lloqsimunan kinray qheparinaneqman rispayku, yapamantataq karpaykuta sayachirqayku, Shaser nispataq chay hallp’ata suticharqayku.

14 Hinaspataq, peqtaykuta wach’iykutawan apayukuspataq, purunman lloqsirqayku mikhuyta aylluykupaq sipimunaykupaq. Aylluykupaq mikhuyta sipimusqayku patamantaq, purunpikaq Shazerpi aylluykuman kutirqayku. Yapamantataq purunpi purirqayku kikin risqayku ñanta qatispayku, Puka Mamaqochaq qayllanpi kaq aswan allinnin hallp’anta purispa.

15 Ashkha p’unchawkunataq purirqayku, peqtaykuwan wach’iykupiwan, rumiykuwan wark’aykupiwan purisqaykupi mikhunaykupaq sipispayku.

16 Sinkuq qhawachiwasqankutan purirqayku, kay sinkutaq purunpa aswan allinnin hallp’anta pusawarqanku.

17 Ashkha p’unchaw purisqayku patamantaq, karpaykuta sayachirqayku huk pachallaqa samanaykupaq, aylluykupaq mikhunata tarinaykupaqwan.

18 Hinataq noqa Nephi uywakuna sipiq rispay, allin asiromanta ruwasqa peqtayta p’akirqani; peqtay p’akisqay patamantaq, noqawan wawqeykuna phiñarikurqanku peqtay p’akisqa kasqanrayku; manan mikhunata tarirqaykuchu.

19 Hinataq mana mikhunayoq aylluykuman kutirqayku. Purisqankurayku ancha sayk’usqa kaspankutaq, anchatapuni ñak’arirqanku mana mikhuna kaqtin.

20 Hinataq Laman, Lemuel, Ismaelpa churinkunapiwan anchata rimapakuyta qallarirqanku, purunpi muchuyninku, ñak’ariyninkuraykupiwan. Taytaypas Wiraqocha Yayan kontra rimapakuyta qallarirqan; ari, anchatapuni ñak’areqtinkutaq llapanku Wiraqocha kontra rimapakurqanku.

21 Hinaspataq noqa Nephi wawqeykunawan llakikurqani peqtay p’akikusqanrayku; paykunaq peqtankuq chutarikuynin chinkaqtintaq, ancha sasapuni kayta qallarirqan, ari, chayraykutaq mana mikhunata tariyta atirqaykuchu.

22 Hinataq noqa Nephi, askhata wawqeykunaman rimarirqani, yapamanta sonqonkuta rumiyachispanku Wiraqocha Yayanku kontra rimapakusqankurayku.

23 Noqa Nephitaq, k’aspimanta peqtata ruwarqani, huk siwk k’aspimantataq wach’ita; chhaynataq peqta-wach’ita, wark’akunata rumikunatawan apayukurqani. Taytaytataq nirqani: Maymanmi mikhuna tarimunaypaq risaq? nispa.

24 Hinataq Wiraqochata taytay tapurqan. Rimasqaykunaraykun ullpuykukusqaku karqan; askha imaymanakunata paykunaman nunaypa llapan atiyninwan rimasqayrayku.

25 Wiraqochaq aruntaq taytayman hamurqan, Wiraqocha kontra rimapakusqanraykutaq cheqaqpuni anyasqa karqan, chayraykutaq ancha llakikuyman apamusqa karqan.

26 Hinataq Wiraqochaq arun payta nirqan: Sinkuta qhawariy, ñawinchaytaq chaypi qelqasqa kasqanta, nispa.

27 Sinkupi qelqasqa kasqanta rikuspataq taytayqa anchatapuni manchakurqan khatatatarqantaq, hinallatataq wawqeykunapas, Ismaelpa churinkunapas, warmiykupas.

28 Hinataq noqa Nephi, sinkupi kaq t’oqpinakuna iñiyman hina, k’uchiy-k’uchi kasqaykuman hina, chaykunaman kasukuq kasqaykuman hinallamanwan kuyusqanta rikurqani.

29 Kallarqantaq huk ch’uya ñawinchana mosoq qelqa, kaytaq hamut’achiwarqanku Wiraqochaq ñanninkunamanta; chay qelqataq mayninmanta mayninman qelqasqa t’ikrasqapiwan karqan, chaypi iñiyniykuman k’uchiy-k’uchi kayniykumanwan hina. Khaynaqa, rikunchismi huch’uy imaymanakunawan hatun imaymanakunata Wiraqocha ruwayta atisqanta.

30 Hinataq noqa Nephi, orqo pataman rirqani, sinkupi qhawachisqa kasqanman hina.

31 Noqataq salqa uywakunata sipirqani, hinaspataq aylluykupaq mikhunata tarimurqani.

32 Karpaykumantaq kutirqani sipisqay uywakunata apayukuspay; kunantaq, mikhuyta tarisqayta rikuspanku, ancha hatunpuni kusikuyninku karqan. Hinataq Wiraqochaq ñawpaqenpi ullpuykukurqanku, Payta añaychakuspanku.

33 Hinataq yapamanta purirqayku, qallariypi hina yaqa kikin ñanneqta purispayku. Ashkha p’unchaw purisqayku patamantaq yapamanta karpaykuta hatarichirqayku, chaypi huk pachallaqa qhepakunaykupaq.

34 Ismaeltaq wañurqan, Nahom waqyasqa hallp’apitaq p’anpasqa karqan.

35 Hinataq Ismaelpa ususinkuna anchatapuni waqarqanku, taytanku wañusqanrayku, purunpi ñak’arisqankurayku ima; taytay kontrataq rimapakurqanku, Jerusalen hallp’amanta paykunata pusamusqanmanta: Wañusqan taytayku, ari, askhatataq purunpi puripakurqayku, anchatataq ñak’arirqayku, yarqaymanta, ch’akiymanta, sayk’uymantawan; kay llapan ñak’ariykuna patamantaq yarqaymanta purunpi wañusun, nispa.

36 Hinatataq taytay kontra, noqa kontrapiwan rimapakurqanku, yapamanta Jerusalenman kutiripuyta munaspanku.

37 Lamantaq, Lemuelta, Ismaelpa churinkunatawan nirqan: Haku, taytanchista, kurak wawqenkunata kamachinanpaq yachachinanpaqwan churakuq wawqenchis Nephitawan wañuchisun;

38 Wiraqochan noqawan rimarqan, angelkunapas serviwarqankun, nispan nin. Ichaqa yachanchismi llullakuwasqanchista, kay imaymanakunatataq niwanchis, askha imaymanakunatataq ruwan yachaysapa kayninwan, ñawinchispi q’otowananchispaq, hukniraq purunman apawananchispaq yuyayukuspa. Pusawasqanchis patamantaq payqa yuyayukurqan, noqanchis patapi inkanchis, kamacheqninchispiwan kananpaq, munayninman hina noqanchiswan ruwananpaq, nispa. Khaynatataq wawqey Laman sonqonkupi phiñarikuyta hatarichirqan.

39 Hinataq, Wiraqocha noqaykuwan karqan, ari, Wiraqochaq arunpuni hamurqan, askha simikunatataq paykunaman nirqan, anchatapunitaq paykunata anyakurqan. Wiraqochaq arunpa anyasqan kaspankutaq, phiñakuyninku thañirirqan, huchankumantataq kutirimurqanku; chayraykutaq, yapamanta mikhuywan Wiraqocha saminchawarqanku, mana wañunaykupaq.