1 Hinaspataq wawqeykunata nirqani: Hakuchis yapamanta Jerusalenman, iñiysapaqtaq Wiraqochaq kamachiyninkuna waqaychaypi kasun. Llapan pachamanta aswan atiyniyoqmi Pay, chhaynari imanaqtintaq mana Labanmanta, pisqa chunkanmanta ima aswan kallpasapari, ari, utaq chunka waranqankunamanta aswan imari?

2 Chhaynaqa hakuchis, Moises hina kallpasapa kasunchis. Cheqaqtapunin Puka Mamaqochaq ununkunata rimarqan, kayman haqaymantaq t’aqakurqanku, taytanchiskunataq chayninta ch’aki panpanta chinpamurqanku, hark’asqa kasqankumanta. Faraonpa awqasuyunkunataq qatikurqanku, Puka Mamaqochaq ununkunapitaq wañurqanku.

3 Hinaqa, yachankichismi cheqaq kay kasqanta, yachankichistaqmi huk angel rimasqasuykichista, chhaynari ishkayata atiwaqchischu? Hakuchis, taytanchikunata hina noqanchis qespichiytaqa atinmi Wiraqocha; Laban sipiytataq egipsiokunata hina, nispa.

4 Kay rimaykunata rimaqtiyqa phiñasqaraqmi kasharqanku, rimapakullasharqankutaqmi; chaypiwanpas qatikuwarqankun Jerusalenpa perqankunaq hawanman chayamunaykukama.

5 Tutañataq karqan, perqa qhepapitaq paykunata pakachirqani; pakakusqanku patamantaq, noqa Nephi, llaqta ukhuman haykuspa, Labanpa wasinneqman rirqani.

6 Nunaq pusasqantaq karqani, ñawpaqtaraq imaymanakuna ruwanayta mana yachaspa.

7 Chaypiwanpas rillarqanin, Labanpa wasinman achhuyoqtiytaq huk runata rikurqani, vinowan machasqa kaspataq, ñawpaqeypi panpaman urmasqa karqan.

8 Payman achhuyoqtiytaq, Laban kasqanta rikurqani.

9 Q’anchinanta rikuspataq, waqaychananmanta horqorqani. Q’anchinaq hap’inantaq qorimanta ancha sumaq ruwasqa kasqa, kikin q’anchinataq aswan allin asiromanta kasqa.

10 Hinaspataq Nuna niwarqan Labanta sipinaypaq, ichaqa sonqoypi nikurqani: Manan hayk’aqpas runaq yawarninta sut’uchirqanichu, nispa; ayqerikuspaytaq mana payta sipita munarqanichu.

11 Yapamantataq Nuna niwarqan: Wiraqochan makiykipi payta haywasunki, nispa. Ari, yacharqanitaqmi sipiway munasqanta; manataqmi Wiraqochaq kamachiyninkunata uyariyta munarqanchu, kapuwaqniykunatawantaq hap’ikurqan.

12 Hinataq, Nuna yapamanta niwarqan: Sipiy, Wiraqochan makiykipi payta haywasunki.

13 Huchasapakunataqa sipinmi Wiraqocha, chanin munayninkuna ruwasqa kananpaq. Aswan allinmi huk runa wañunan, huk llaqta millayaspa mana ima kreyiypi wañunankumantaqa, nispa.

14 Hinaspataq noqa Nephi, kay rimaykunata uyarispa, purunpi Wiraqocha rimariwasqan simikunata yuyarirqani: Kamachiyniykunata ch’awchuyki waqaychanqa chayqa, t’ikarinqakun akllasqa hallp’api, nispa neqta.

15 Ari, yuyayukullarqanitaqmi Wiraqochaq kamachiyninkunata Moisespa kamachisqa-siminman hina paykuna mana waqaychayta atinankuta, mana chay kamachisqa-simiyoq kaspankuqa.

16 Yacharqanitaqmi chay kamachiykuna bronse raphikunapi qelqasqa kasqanta.

17 Yacharqanitaqmi, kayrayku Labanta makiypi Wiraqocha churasqanta, kamachiyninman hina qelqakunata hap’inaypaq.

18 Chhaynaqa, kasurqanin Nunaq arunta, Labantataq chukchanmanta hap’ispa, kikin q’anchinanwan umanta wit’urqani.

19 Kikin q’anchinanwan umanta wit’usqay patamantaq, Labanpa p’achankunata hap’ispa chaykunawan p’achakurqani, llapanta churakuspa; maqanankunatataq churakurqani.

20 Kayta ruwasqay patamantaq Labanpa qhapaqyaykuna-waqaychananman rirqani. Labanpa qhapaqyaykuna-waqaychananneqman rispaytaq, qhapaqyaykuna-waqaychanaq llavin hap’iq Labanpa warmanta rikurqani. Labanpa kunkanpi hinataq payta kamachirqani noqawan qhapaqyaykuna-waqaychana kasqanman rinanpaq.

21 Patrunnin Laban kanaypaqtaq pay yuyayukurqan, p’achankunawan q’anchinanpiwan churaykusqa kasqayta rikuspa.

22 Judiokunaq kurakninkunamantataq rimariwarqan, patronnin Laban paykunawan chay tuta kasqanta yachaspa.

23 Noqataq paywan rimarirqani Labanpas kayman hina.

24 Paytataq nirqani, bronse raphikunapi qelqakunata, perqa qhepapi kaq kurak wawqeykunaman apanaypaq.

25 Qatikuwananpaq ima payta kamachirqani.

26 Paytaq, iñeqkuna-huñuq wawqenkunamanta rimasqaypaq, cheqaqtapuni wañuchisqay Laban kasqaypaqwan yuyayukuspa qatikuwarqan.

27 Ashkha kutitataq rimapayawarqan judiokunaq kurakninkunamanta, perqa hawapi kaq wawqeykunaman rishanaykama.

28 Chhaynataq, rikuwaspa Lamanqa anchatapuni mancharikurqan, Lemuelpas, Sampas. Paykunataq ñawpaqeymanta ayqekurqanku; Laban kasqaypaq yuyayukuspankutaq sipiwasqan pataman paykunatapas sipiq hamusqanpaq yuyayukurqanku.

29 Hinamantaq paykunata waqyarqani, uyariwaspankutaq ñawpaqeymanta ayqekuyta tatirqanku.

30 Labanpa warmantaq wawqeykunata rikuspa khatatatayta qallarirqan, ñawpaqeymanta ayqekuspataq Jerusalen llaqtaman kutikapunanpaq hinaña kasharqan.

31 Kunantaq noqa Nephi, hatun runa kaspa, Wiraqochamanta ancha kallpatawan chashkispay, Labanpa warmanta hap’irqani, mana ayqenanpaqtaq hark’arqani.

32 Hinaspataq paywan rimarqani, rimayniykunata uyarinman chayqa, Wiraqochaq kawsasqanman hina, noqa kawsasqayman hinapiwan, chay hinallatataqmi rimayniykuta uyarinman chayqa, manan payta wañuchiykumanchu.

33 Sullullchaywantaq payta rimarirqani mana manchakunanpaq, noqaykuwan purunman rinman chayqa, noqayku hina qespi runa kananpaq.

34 Khaynatawantaq payta nirqani: Cheqaqtapunin Wiraqocha kamachiwarqanku kayta ruwanaykupaq. Manachu Wiraqochaq kamachiyninkuna waqaychaypi k’uchiy-k’uchi kaswan? Chhaynaqa, purunpi taytayman rinki chayqa, kanqan qanpaq noqaykuwan maypi kanaykipaq, nispa.

35 Rimasqay simikunawantaq Zoramqa kallpacharikurqan. Zorammi chay warmaq sutin karqan, prometirqantaq purunpi taytaypa kasqanman rinanpaq. Chay p’unchawmantapacha noqaykuwan kananpaqtaq noqaykuwan sullullchakurqan.

36 Purunman ayqekusqaykuta judiokuna mana yachanankupaqtaqmi noqaykuwan Zoram kananta munarqayku, judiokuna qatiwaspanku mana sipiwanankupaq.

37 Noqaykuman Zoram sullullchakuqtintaq, paymanta manchakuyniyku qollurqan.

38 Hinataq, bronse raphikunata, Labanpa warmantawan apayukuspa purunman lloqsirqayku, taytaypa karpanman rispa.