1 Hinataq, purunpi taytayku kasqanman hamusqayku pataman, anchatapuni pay kusikurqan, mamay Sariahpas anchatapunin kusikurqan. Paytaq cheqaqtapuni noqaykumanta llakikusqa karqan.

2 Purunpi wañusqaykupaqmi yuyayukusqa karqan; taytay kontrataq pay rimapakusqa karqan: Rikupakuq runan kanki, chashkikuyninchispa hallp’anmantan horqowarqankiku, manañataq wawaykuna kankuñachu, purunpitaq noqanchispas wañusun, nispa.

3 Khayna rimaywantaq taytay kontra mamay rimapakusqa karqan.

4 Hinataq, khaynata payta taytaqy nirqan: Yachanin rikupakuq runa kasqayta, rikuypi Yayaq imaymanankunata mana rikuymanchu karqan chayqa, manan Yayaq sumaq kayninta reqsiymanchu karqan, ichaqa Jerusalenpin qhepayman karqan, wawqeykunawantaq chaypi wañuyman karqan.

5 Ichaqa akllasqa hallp’atan chashkini, chay imaymanakunapitaq kusikuni; ari, yachanitaqmi Labanpa makinkunamanta churiykunata Wiraqocha qespichinanta, yapamantataq noqanchisman paykunata purunman apamunqa, nispa.

6 Khayna rimaywantaq taytay Lehi mamay Sariahta noqaykumanta sonqocharqan, judiokunaq qelqanta apamunaykupaq purunpi purispa Jerusalen hallp’aman rinaykukama.

7 Taytaypa karpanman kutimuqtiykutaq kusikuyninku hunt’asqa karqan, mamaytaq sonqochasqa karqan.

8 Khaynatataq mamay rimarqan: Cheqaqtapunin kunanqa yachani, qosayta purunman ayqekamunanpaq Wiraqocha kamachisqanta; ari, cheqaqtapunitaqmi yachani, wawaykunata Wiraqocha amachasqanta, Labanpa makinkunamanta qespichimusqanta, kallpatataq paykunaman qorqan paykunaman Wiraqocha kamachisqanta hunt’anankupaq. Khayna rimaywanmi pay rimarqan.

9 Hinataq anchatapuni paykuna kusikurqanku, arpayta ruphasqa munachikuykunata imataq Wiraqochaman munachirqanku, anchatataq añaycharqanku Israelpa Yayanta.

10 Israelpa Yayanta añaychakusqanku patamantaq, taytay Lehi bronse raphikunapi qelqakunata hap’ispa, qallariyninmantapacha ñawincharqan.

11 Moisespa pishqantin qelqankuna chaypi kasqanta rikurqan, chaykunataq kay pachaq imayna kamasqa kasqanmanta willarqan, ñawpaqkaq tayta-mamanchis Adanmanta Evamantapas;

12 Judiokunaq willayninkupas qallariyninmantapacha, Judaq inkan Sedekiaspa kamachiyninpa qallariyninkama.

13 Qollanan unanchaqkunaq unanchayninkunapas qallariyninmantapacha, Sedekiaspa kamachiyninpa qallariyninkama; askhallataq Jeremiaspa rimasqan unanchayninkunamantapas.

14 Chhaynataq taytay Lehi, bronse raphikunapi taytankunaq ayllusaphinta tarirqan; chayraykun pay yacharqan Joseq ch’awchun kasqanta; ari, chay Jakobpa churin Jose, Egiptopi rantisqa kaq; taytan Jakobta tukuy wasintawan yarqaymanta horqomunanpaqtaq Wiraqochaq makinpa waqaychasqan pay karqan.

15 Hark’asqa kasqankumanta, Egipto hallp’amantapas paykuna waqaychaq kikin Yayaq horqomusqanmi karqanku.

16 Chay hinatataqmi taytay Lehi, taytankunaq ayllusaphinta tarirqan. Labanpas Joseq ch’awchunmi kasqa, chayraykutaqmi pay taytankunapiwan qelqakunata waqaychasqaku karqan.

17 Kay imaymanakunata rikuspataq, Nunawan hunt’a kaspa, ch’awchunmanta unanchayta taytay qallarirqan—

18 Kay bronse raphikuna ch’awchunmanta kaq llapa llaqtakunaman, ayllukunaman, simikunaman, runakunamanwan rinanta.

19 Hinaspataq pay nirqan, kay bronse raphikuna manan hayk’aqpas chinkananmanta, manataq watakunapas qhellichananmanta ima. Ashkha imaymanakunatataq ch’awchunmanta unancharqan.

20 Chaykaman noqa taytaypiwan, Wiraqochaq kamachiwasqanku kamachiykunata waqaycharqayku.

21 Wiraqochaq kamachiwasqanku qelqakunatataq hap’ikurqayku; ñawinchaspaykutaq ancha sumaq kasqanta tarirqayku. Ari, noqaykupaq ancha chaninniyoq, hinaspataq Wiraqochaq kamachiyninkunata wawaykupaq waqaychayta atiykuman.

22 Chhaynaqa, yachaysapa kaymi Wiraqochapi karqan kaykunata noqaykuwan apanaykupaq, prometisqa hallp’aneqman purunpi purinaykukama.