1 Hinaspataq Wiraqochata yupaycharqanku, noqawantaq rirqanku. Ancha allin yachaywantaq kurkukunata llaqllarqayku. Maynillanqa Wiraqochan qhawachiwarqan, imaynata wanpupaq kurkukunata llank’anaypaq.

2 Kunantaq noqa Nephi kurkukunata llank’arqani mana runakunaq yachasqankuman hinachu, nitaq wanputapas runakunaq ruwasqankuman hinachu ruwarqani; ichaqa Wiraqochaq qhawachiwasqanman hinan ruwarqani, chhaynaqa manan runakunaq ruway yachasqankuman hinachu karqan.

3 Noqa Nephitaq orqoman pasaqlla rirqani, pasaqllataq Wiraqochaman rimarikurqani, chayraykun ancha hatun imaymanakunata Wiraqocha rikuchiwarqan.

4 Wiraqochaq rimayninman hina wanputa ruwasqay patamantaq, wawqeykuna ancha allin kasqanta rikurqanku, ruwayninpas ancha sumaq kasqantawan; chayraykutaq yapamanta Wiraqochaq ñawpaqenpi ullpuykukurqanku.

5 Hinataq Wiraqochaq arun taytayman chayamurqan, hatarispa wanpuman haykunaykupaq.

6 Tutamantanpitaq llapan imaymanakunata allichasqayku pataman—askha ruruta, purunmanta aychata, askha lachiwatawan, Wiraqochaq kamachiwasqankuman hina imaymanakunata—wanpuman haykurqayku llapan q’epiykuwan, muhuykuwan, noqaykuwan imaña apamusqayku imaymanakunapiwan, sapankayku hayk’a watayoq kasqaykuman hina; chhaynataq llapayku wanpuman haykurqayku, warmiykuwan, wawaykupiwan.

7 Taytaytaq ishkay churikunata purunpi churiyarqan. Kurak kaqpa Jakob sutin karqan, sullk’a kaqpataq Jose.

8 Hinaspataq llapayku wanpuman haykuqtiyku—noqaykuwantaq mikhunaykuta kamachikuwasqankutawan apayukuqtiyku—mamaqochaman haykurqayku, wayraq ñawpaqentataq apasqa karqayku prometisqa hallp’aneqman.

9 Ashkha p’unchawña wayraq apasqan kasqayku patamantaq, wawqeykuna, Ismaelpa churinkuna warminkunapiwan anchatapuni q’ochukuyta qallarirqanku; hinaspataq, tusuyta, takiyta, millay simiwan rimaytawan qallarirqanku, ari, kaykama ima kallpawan apamusqa kasqaykuta qonqaspanku; ari, mana tupuy atina millay kaymantaq qokurqanku.

10 Noqa Nephitaq anchatapuni manchakuyta qallarirqani, noqaykuwan Wiraqocha phiñarikuspa, mamaqochaq p’uytuyayninpi millp’usqa kanaykupaq huchallikuyniykurayku muchuchiwanankumanta; chayraykutaq noqa Nephi allintapuni paykunaman rimayta qallarirqani, ichaqa, noqawanmi phiñarikurqanku, manan sullk’a wawqeyku kamacheqniyku kananta munaykuchu, nispa.

11 Hinataq, Laman Lemuelpiwan hap’iwaspanku waskhakunawan chaqnawarqanku, anchatapunitaq ñak’arichiwarqanku; chaypiwanpas chhaynatan Wiraqocha kacharirqan kallpanta qhawachinanpaq, huchasapakunamanta rimasqan hunt’akunanpaq.

12 Hinataq, mana kuyuy atinaykama watawasqanku pataman, Wiraqochaq ruwasqan sinku mana purirqanchu.

13 Chhaynataq mana mayneqmanpas wanpu pusayta yacharqankuchu, hinamantaq ancha hatun wayra-para hatarirqan; ari, ancha hatun, ancha manchakuna sallallallay. Kinsa p’unchawtaq qhepaman pusasqa karqayku; paykunataq mamaqochapi wañunankumanta anchatapuni manchakuyta qallarirqanku. Chaypiwanpas manan pashkawarqankuchu.

14 Qhepaman tawakaq p’unchawpi pusasqa kasqaykupitaq, ancha manchakuypuni sallallallay tukurqan.

15 Hinataq, mamaqochaq p’uytuyayninkunapi millp’usqa hinapaqña kasharqayku. Tawa p’unchawña unukuna patapi qhepaman pusasqa kasqayku patamantaq, Yayaq taripaynin paykunapi kasqanta wawqeykuna rikuyta qallarirqanku, wañunkumantaqmi huchankumanta mana kutirimunkumanchu chayqa; chayraykutaq noqaman hamuspanku, makiypi chaqnakunata pashkarqanku. Anchatapunitaq makiykuna punkisqa karqan, chaki-moqochuykunapas anchatapunin punkisqa, manchaytataq nanawarqan.

16 Chaypiwanpas Yayaypin kunfiyarqani, p’unchawnintintaq Payta yupaycharqani; manataqmi Wiraqocha kontraqa rimapakurqanichu ñak’ariyniykunarayku.

17 Taytay Lehitaq askha imaymanakunata paykunaman, Ismaelpa churinkunamanwan nirqan; ichaqa manchachirqankun noqarayku rimareqkunata; tayta-mamaytaq ancha machuña kaspanku, wawankunarayku anchata ñak’arispankupiwan onqoywan urmarqanku; ari, puñunapitaq kananku karqan.

18 Llakikuyninku, ñak’ariyninku, wawqeykunaq huchallikuyninkunaraykupiwantaq kay pachamanta Yayankuwan tupanankupaq yaqamanta apasqa karqanku; ari, soqo chukchankun yaqaña hallp’api churasqa karqan; ari, yaqamantan tayta-mamay mamaqochapi p’anpasqa karqanku.

19 Jakob Josepiwantaq, erqellaraq kaspanku, mikhunata nesitasqankupiwan muchurqanku mamankuq ñak’ariyninkunarayku; warmiypas weqenkunawan yayaman-rimarikuyninkunapiwan, wawaykunapas, manan wawqeykunaq sonqonkuta pashkawanankupaq llanp’uyachirqanchu.

20 Manataqmi imapas karqanchu sonqonkuta llanp’uyachinanpaq, ichaqa Yayaq atiynillan, paykunata wañuchiywan manchachispa; hinataq mamaqochaq ukhunkunapi millp’usqa kanankupaq hina kaqtinkuña, ruwasqankumanta yuyayninkuman kutirimuspanku pashkawarqanku.

21 Hinaspataq pashkawasqanku pataman sinkuta hap’irqani, munasqayman hinataq purirqan. Hinataq Wiraqochaman rimarikurqani, rimarikusqay patamantaq wayra thañirqan, wayra-parapas thañirqan, sumaq qasilla karqan.

22 Hinataq noqa Nephi, wanputa pusarqani, prometisqa hallp’amantaq yapamanta rirqayku.

23 Ashkha p’unchawkuna tuytusqayku patamantaq prometisqa hallp’aman chayarqayku; hallp’a pataman rispataq karpaykuta hatarichirqayku, prometisqa hallp’a nispataq suticharqayku.

24 Hinataq hallp’ata yapuspayku muhukunata tarpuyta qallarirqayku; ari, Jerusalenmanta apamusqayku llapan muhukunatan tarpurqayku; anchatapunitaq wiñayta qallarirqanku; chhaynataq ancha saminchasqa karqayku.

25 Prometisqa hallp’apitaq purunpi purispayku, imaymana uywakunata sach’a-sach’akunapi tarirqayku—wakakunata, torokunata, asnokunata, kaballukunata, kabrakunata, salqa kabrakunata, imaymana salqa uywakunatawan, runaq allinninpaq. Hinallatataq, imaymana mineralkunata tarirqayku—qorita, qolqeta, antatawan.