Nephiq Iskaykaq Qelqan

1 Kunantaq noqa Nephi, wawqeykunaman yachachiyta tukusqay pataman, taytayku Lehipas askha imaymanakunata paykunaman rimarirqan—imayna hatun imaymanakunata Jerusalen hallp’amanta paykunata horqospa paykunarayku Wiraqohaq ruwasqanmanta.

2 Unukuna patapi ankallikusqankumanta paykunata rimarirqan, mamaqochapi millp’usqa kanankumanta kawsayninkuta qespichiypi Yayaq khuyapakuyninmanta.

3 Chaskisqanku prometisqa hallp’amantawantaq paykunata rimarirqan; Jerusalen hallp’amanta ayqenanchispaq niwaspanchis imay na khuyapakuyniyoq Wiraqocha karqan, nispa.

4 Huk rikuytan rikurqani, chayraykutaqmi yachani Jerusalen thuñisqa kasqanta; Jerusalenpi qhepaswan karqan chayqa, noqanchispas wañuswanmi karqan, nispan pay nirqan.

5 Ichaqa nirqanmi, ñak’arirqanchisña chaypas, huk promitisqa hallp’atan chaskirqanchis, llapan hallp’akunamanta aswan akllasqa hallp’ata; ch’awchuypa chaskikuyninpaq kananpaq Wiraqocha Yaya noqawan rimanakusqan hallp’ata. Ari, huk rimanakuypin kay hallp’ata Wiraqocha, noqaman wawaykunamanwan wiñaypaq qowan, huk llaqtakunamanta Wiraqochaq makinpa llapan pusamusqan runakunapaqwan.

6 Chhaynaqa, noqa Lehi unanchani noqapi kaq Nunaman hina, Wiraqochaq makinpa mana pusasqan kaspaqa, mana pipas kay hallp’aman hamunanmanta.

7 Chhaynaqa, Paypa pusamusqan runakunapaqmi kay hallp’a willkachasqa. Paypa qosqan kamachiykunaman hina Payta servinqaku chayqa, qespi-kay hallp’an paykunapaq kanqa; hinaqa, manan hayq’aqpas harkasqa kayman apamusqachu kanqaku; chhayna kanqa chayqa, millay ruwayninkunaraykun kanqa. Millay ruwaykuna askhayanqa chayqa, ñakasqan hallp’a paykunarayku kanqa; ichaqa, chaninkunapaqqa wiñaypaqmi saminchasqa kanqa.

8 Hinaqa, ancha allinmi huk llaqtakuna kay hallp’amanta mana yachananku; askha llaqtakunan kay hallp’ata pakankuman, hinaspataq manaña maypi chaskikuy kananpaq kanmanchu.

9 Chayraykun noqa Lehi, huk promesata chaskirqani, Jerusalen hallp’amanta Wiraqocha Yaya apamusqan runakuna kamachiyninkunata waqaychanqaku chayqa, t’ikarinankun kay hallp’api; huk llaqtakunamantataq pakasqa kanqaku, paykuna kikinkupaq kay hallp’ata hap’ikunankupaq. Kamachiyninkunata waqaychanqaku chayqa, saminchasqan kay hallp’a patapi kanqaku, manataq pipas kanqachu paykuna manchacheq, nitaq chaskikuyninku hallp’a qechuqpas; wiñaypaqtaq qasilla tiyanqaku.

10 Ichaqa, mana kreyiypi urmasqanku p’unchaw hamuqtin, Wiraqochaq makinmanta ancha hatun saminchaykunata chaskisqanku pataman—pachaq, llapan runankuna ima kamasqa kasqankumanta yachaspanku, kay pachaq kamasqa kasqanmantapacha Wiraqochaq ancha sumaq hatun ruwayninkunata yachaspanku; iñiywan llapan imaymanakunata ruwanankupaq atiyniyoq kaspa, qallariymantapacha llapan kamachiykunayoq kaspa, kay ancha sumaq prometisqa hallp’aman mana tukukuyniyoq sumaq kayninwan apamusqan kaspankupiwan—noqa nini, Israelpa Qollananta, cheqaq Hawisqata, Qespicheqninkuta Yayankutawan pisichanankupaq p’unchaw chayamunqa chayqa, chanin kaqpa taripayninmi paykunaman chayamunqa.

11 Ari, huk llaqtakunatan paykuna pataman apamunqa, paykunamantaq atiyta qonqa, paykunamantataq chaskikuyninku hallp’ankuta qechunqaku; paykunatataq ch’eqechinqa, maqachinqa ima.

12 Ari, huk miraymanta hukmanmi yawar sut’uchiy, ancha hatun ñak’ariy ima kanqa; chhaynaqa churiykuna, yuyarinaykichistan munayman, ari, rimayniykunata uyarinaykichistan munayman.

13 Alliyá rikch’ariwaqchis, qaqa puñuymanta rikch’ariychis, ari, supay wasi puñuymanta, watasuqniykichis millay chaqnakunamantataq chhapchirikuwaqchis; chay watanakunataq runakunaq wawankunata chaqnan, wiñay muchuy, wiñay ñak’ariy qochamanwantaq hark’asqa apasqa kanku.

14 Rikch’ariychis! ñut’u hallp’amanta hatariychis, khatatataq taytaq rimayninkunata uyariychis. Chay taytaq runakurkuntataq asllaman upallan kaq chiri ayapanpaman churankichis, manataqmi ni pi pureqpas chaymanta kutirimuyta atinmanchu. Huk chikan p’unchawkunallamanmi llapan hallp’aq ñanninta risaq.

15 Ichaqa, Wiraqochan nunayta supay wasimanta qespichirqan. Kusiqellpuntan rikurqani, wiñaypaqtaq munakuyninpa makinwan muyurisqa kani.

16 Wiraqochaq yuyaqankunata, taripayninkunatawan waqaychanaykichistan munani; kaymi qallariymantapacha nunaypa munaynin karqan.

17 Muchuchisqan sonqoy maynillan karqan. Manchakurqanin sonqoykichispa rumiyayninrayku, Wiraqocha Yayaykichis hunt’a phiñakuyninwan qankunaman hamuqtin, wiñaypaq kuchusqa chinkachisqapiwan kanaykichismanta;

18 Utaq qankunaman askha miraykunakama huk ñakay hamunanmanta, q’anchinaq utaq yarqaypa muchuchisqanpas kanaykichismanta, cheqnisqa kanaykichismanta, saqraq munayninman hina hark’asqa apasqa kanaykichismantawan.

19 Churiykuna, amayá kay imaymanakuna qankunaman hamuchunchu; aswanmá Wiraqochaq akllasqan yanapasqanpiwan llaqta kawaqchis. Ichaqa munaynin ruwasqa kachun; wiñaypaqmi chanin ñanninkuna.

20 Nirqantaqmi Pay: Kamachiyniykunata waqaychankichis chayqa, t’ikarinkichismi kay hallp’api; ichaqa, kamachiyniykunata mana waqaychankichischu chayqa, qarqosqan ñawpaqeymanta kankichis, nispa.

21 Kunantaq qankunapi nunay kusikunanpaq, sonqoytaq qankunarayku kay pachata kusikuypi saqenanpaq, muchuypi llakikuypiwan ayapanpaman mana apamusqa kanaypaq, ñut’u hallp’amanta hatariychis churiykuna, qharitaq kaychis, huk sonqollataq huk yuyayllapiwantaq kaychis, tukuy imaymanakunapi huklla kaspa, hark’asqa kayman mana urmanaykichispaq;

22 Ancha millay ñakaywan mana ñakasqa kanaykichispaq, qolluchiypaq chanin Yayaq phiñakuyninta qankuna pataman mana hamuchispa; ari, runa-kurkuq nunaq ima wiñay qolluchiyman.

23 Rikch’ariychis churiykuna, chanin-kaypa p’achawan p’achakuychis. Chhapchirikuychis watasqa kasqaykichis chaqnakunata, tutayaqmanta lloqsimuychis, ñut’u hallp’amantataq hatariychis.

24 Amaña astawan ankallikuychischu wawqeykichis kontra. Ancha kusiqellpuyoqmi rikuyninkuna karqan; Jerusalenmanta lloqsimusqanchismantapachan kamachiykunata pay waqaycharqan; Yayaq makinpi ruwanan karqan, prometisqa hallp’aman apamusqa kananchispaq; mana pay kanmanchu karqan chayqa, purunpin yarqaymanta wañuswan karqan; chaypiwanpas pay sipiytan mashkarqankichis, ari, anchatataqmi pay ñak’arirqan qankunarayku.

25 Anchatapunin manchakuni khatatatanitaq, qankunarayku yapamanta astawan pay ñak’arinanmanta. Noqanchis patapi atiyniyoq, kamachiyniyoq ima kaytan munan, nispan rimapakurqankichis; ichaqa, yachanin mana qankuna patapi atiyta, ni kamachiytapas mashkasqanta; ichaqa, Yayaq kusiqellpunta, wiñaypaq allin kanaykichistawanmi mashkarqan.

26 Qankunawan sut’in kaqtintaq, pay kontra rimapakurqankichis. K’ireq simiwanmi rimariwanchis, noqanchiswantaqmi phiñarikun nispan ninkichis; ichaqa, k’ireq rimayninqa, paypi kaq Yayaq rimayninpa atiyninpa k’arayninmi karqan; phiñarikuy nisqaykichistaq Yayapi kasqanman hina cheqaq karqan, manataqmi chayta hark’ayta atinmanchu karqan, mana manchakuspa millay ruwasqaykichismanta rimaspa.

27 Nesitakuntaqmi Yayaq atiynin paywan kanan, kasunaykichiskama kamachinanpaq. Ichaqa manan paychu karqan, paypi kaq Wiraqochaq Nunanmi rimarinanpaq siminta kicharirqan, manataq upallachiyta pay atirqanchu.

28 Kunantaq churiy Laman, Lemuelpas, Sampas, Ismaelpa churinkunaq churiykunapas, Nephiq rimasqanta uyarinkichis chayqa, manan qollunkichischu. Payta uyarinkichis chayqa, huk saminchaytan qankunawan saqesaq, ari, qallariykaq saminchayniyta.

29 Ichaqa payta mana uyarinkichischu chayqa, qallariykaq saminchayniytan hitirichisaq, ari, saminchayniyta, pay patapitaq qhepanqa.

30 Kunantaq Zoram, qanman rimarisaq—Labanpa warmanmi kanki, chaypiwanpas, Jerusalen hallp’amanta horqosqan karqanki; yachanitaqmi churiy Nephiq wiñaypaq cheqaq qochun kasqaykita.

31 Chayraykutaq iñiysapa kasqaykirayku, paypa ch’awchunwan kushka ch’awchuyki saminchasqa kanqa, kay hallp’apitaq unaypuni t’ikariypi tiyanqaku; manataq imapas—ichaqa, paykuna purapi millay huchallikuykunalla—kay hallp’api wiñaypaq t’ikariyninkuta tatichinqachu utaq k’irinqachu.

32 Hinaqa, Wiraqochaq kamachiyninkunata waqaychanki chayqa, Wiraqochan kay hallp’ata willkacharqan, churiypa ch’awchunwan kushka ch’awchuykiq sumaq kayninpaq.