1 Kunantaq qanman rimarisayki qhepa paqariwaqniy Jose. Ñak’ariyniypa purunninpin paqarirqanki; ari, ancha hatunpuni muchuyniypa p’unchawninkunapin mamayki wachakurqasunki.

2 Wiraqochayá kay hallp’ata qanpaqpas qollanachichun—kaytaq awan sumaq hallp’a, chaskikuyniykipaq, ch’awchuykiq chaskikuyninpaq, wawqeykikunawan, wiñaypaq sumaq kayniykichispaq, Israelpa Qollananpa kamachiyninkunata waqaychankichis chayqa.

3 Kunantaq qhepa paqariwaqniy Jose, ñak’ariyniypa purunninmanta apamusqay, wiñaypaqyá qanta Wiraqocha saminchachun; manan lliwtapunichu ch’awchuyki qollochisqa kanqa.

4 Wasaypa rurunmi kanki, Egiptoman hark’asqa apasqa Joseq ch’awchuntaqmi kani. Ancha hatuntaqmi Josewan Wiraqochaq ruwasqan rimanakuyninkuna karqan.

5 Chhaynaqa, cheqaqtapunin p’unchawninchiskunata Jose rikurqan. Wiraqochamantataq huk promesata chaskirqan, wasanpa rurunmanta huk chanin palqata Israelpa wasinman Wiraqocha Yaya hatarichinanpaq; mana Hawisqatachu, ichaqa, p’akisqa kanan palqata, chaypiwanpas, Wiraqochaq rimanakuyninkunapi yuyarisqa kananpaq, qhepa p’unchawkunapi paykunaman Hawisqa rikhurinanpaq, atiyniyoq Nunapi, tutayaqmanta k’anchayman paykunata apamunanpaq; ari, pakasqa tutayaqmanta hark’asqa kaymantawan qespi kayman.

6 Cheqaqtapunin khaynata Jose cheqaqcharqan: Huk unanchaqtan Wiraqocha Yayay hatarichinqa, akllasqa unanchaqtaq ch’awchuykunapaq pay kanqa, nispa.

7 Ari, cheqaqtapunin Jose nirqan: Khaynatan Wiraqocha niwan: Akllasqa unanchaqtan ch’awchuykimanta hatarichisaq, ancha munasqataq pay kanqa ch’awchuykikuna purapi. Paymantaq kamachiyta qosaq, wawqenkuna wasaykiq rurunpaq huk ruwayta ruwananpaq, chaytaq ancha hatun chaninniyoq paykunapaq kanqa, taytaykikunaman ruwasqay rimanakuykuna yachayman apamusqa kanankupaq.

8 Paymantaq huk kamachiyta qosaq, mana hukniraq ruwayta ruwananpaq, ichaqa, noqa kamachisqallayta. Ancha hatuntan payta ruwasaq ñawpaqeypi. Ruwayniytan pay ruwanqa.

9 Llaqtayta kacharichimunanpaq qankunaman hatarichimunay nisqay Moises hina ancha hatunmi pay kanqa, o Israelpa wasin.

10 Moisestataq hatarichisaq llaqtaykita Egipto hallp’amanta horqomunanpaq.

11 Ichaqa, huk rikuqtan wasaykiq rurunmanta hatarichisaq, paymantaq atiyta qosaq wasaykiq rurunman rimayniykunata apamunanpaq; manataq rimayniykunata apamunallanpaqchu, ninmi Wiraqocha, ichaqa, rimayniykunamanta paykunata kunbinsinanpaqmi, chay rimaytaq ña paykuna chawpipi rirqanña.

12 Chhaynaqa, qelqanqan wasaykiq rurun; Judahq wasanpa rurunpas qelqanqan; wasaykiq rurun qelqasqantaq Judahq wasanpa rurunpa qelqasqanwan kushka wiñanqaku, pantasqa kaq yachachiykunata tutayachinankupaq, churanakuykunata qolluchinankupaq, wasaykiq rurunkuna purapi sumaq kawsayta hatarichinankupaq; taytanku reqsiyman qhepa p’unchawpi paykunata apamunankupaq, rimanakuyniykunatawan yachanankupaq, nispan Wiraqocha nin.

13 Mana ancha kallpayoq kaymantataq kallpachasapa ruwasqa kanqa, llapan llaqtay purapi ruwayniy qallarinan p’unchawpi, qanta yapamanta hatarichinanpaq O Israelpa wasin, nispan Wiraqocha nin.

14 Khaynatataq Jose unancharqan: Chay unanchaqtan Wiraqocha saminchanqa, pay sipiy munaqkunataq tutayachisqa kanqaku. Wiraqochamanta wasaypa rurunpaq chaskisqay promesaqa hunt’asqan kanqa. Sut’inpunin kashani kay promesa hunt’akunanmanta.

15 Noqaq sutiy hinataq sutin kanqa, taytanpa sutin hinataq sutin kanqa. Noqaman rikch’akuqtaq kanqa; paypa makinwan Wiraqochaq apamunantaq, Wiraqochaq atiyninwan llaqtayta qespiyman apamunqa, nispa.

16 Ari, khaynatan Jose unancharqan: Sut’inpunin kaymanta kashani, Moisespa promesanmanta kasqayta hina. Wiñaypaqmi ch’awchuykita qhepachisaq, nispan Wiraqocha niwarqan.

17 Wiraqochataq nirqan: Huk Moisestan hatarichisaq; huk k’aspipitaq payman atiyta qosaq, qelqaypitaq allin umata payman qosaq. Ichaqa, manan qallunta pashkarisaqchu askhata rimananpaq; manan rimaypichu payta kallpachasaq. Ichaqa, kikiy makiypa ruk’ananwanmi payman kamachisqa-simiyta qelqasaq, huktataq paypa rantinta rimananpaq ruwasaq, nispa.

18 Niwallarqantaqmi Wiraqocha: Wasaykiq rurunmanmi hatarichisaq, paypa rantinta rimananpaqtaq huk runata ruwasaq. Noqataq, wasaykiq rurunman wasaykiq rurunpa qelqankunata qelqananpaq payman qosaq, cha’wchuykiq rimareqnintaq kayta willanqa.

19 Qelqanan rimaykunataq, ch’awchuykikunaman chayananpaq yachaysapa kayniypi allin kasqan rimaykuna kanqa. Ñut’u hallp’amantapas paykunaman ch’awchuykikuna rimarimunman hinan kanqa; yachanin iñiyninkuta.

20 Ñut’u hallp’amantataq paykuna qaparimunqaku; ari, huchamanta kutirimuytapuni wawqenkunaman, askha miraykunaña ñawpaqenkuta pasarqan chaypas. Hinataq qapariyninku rinqa rimayninkuq sut’in kayninman hinapuni.

21 Iñiyninkuraykutaq simiymanta rimayninku lloqsimunqa, wasaykiq rurunmantakaq wawqenkunaman; mana ancha atiyniyoq rimayninkunatataq iñiyninkupi kallpachasaq, taytaykikunaman ruwasqay rimanakuykunata yuyarinankupaq, nispa.

22 Kunantaq churiy Jose, khaynatan ñawpa taytay unancharqan.

23 Chhaynaqa, kay rimanakuyraykun saminchasqa kanki, manan chinkachisqachu ch’awchuyki kanqa, qelqaq rimayninkunatan uyarinqaku.

24 Paykuna purapitaq huk ancha atiyniyoq runa hatarinqa, paytaq askha allinkunata ruwanqa, rimaypipas ruwaypipas; Yayaq makinpi warman kaspa, hatun iñiyniyoq, ancha sumaq utinakunata ruwananpaq, Yayaq ñawpaqenpi ancha hatun kasqanta ruwaspa; Israelpa wasinman, wawqeykikunaq ch’awchunmanwan askha yapamanta sayarichiyta ruwaspa.

25 Kunanqa, saminchasqan kanki Jose. Huch’uyllaraqmi kanki, chhaynaqa, wawqeyki Nephiq rimayninkunata uyariy, rimasqay rimaykunaman hinataq kanpaq ruwasqa kanqa. Yaqa wañuqña taytaykiq rimayninkunata yuyariy. Hinataq kachun.