1 Ichaqa, ashkhan kanqaku, paykuna chawpipi ancha sumaq ruwanata ruwayta qallarinay p’unchawpi, runakunaq wawankunaman rimanakuy ruwasqayta yuyarinaypaq; makiyta ishkay kutita chutarispa, Israelpa wasinmanta kaq llaqtayta yapamanta pallakamunaypaq;

2 Qanman Nephi, taytaykimanwan ch’awchuyki yuyarinaypaq promesa ruwasqayta yuyarinaypaqwan; ch’awchuykiq rimayninkuna ch’awchuykipaq simiymanta lloqsimunanta; rimayniytaq pachaq tukukuyninkama qaparinqa, Israelpa wasinmanta kaq llaqtaypa unanchanpaq.

3 Rimayniykuna qapareqtintaq, hawarunakunamanta ashkha ninqaku: Huk Rimanakuy Qelqa huk Rimanakuy Qelqa! Kapuwanchismi huk Rimanakuy Qelqa, manataqmi astawan Rimanakuy Qelqa kanmanchu nispa.

4 Ichaqa, khaynatan Wiraqocha Yaya nin: Upakuna, kanqan paykunapaq Rimanakuy Qelqa, ñawpa rimanakusqay llaqtay judiokunamantataqmi lloqsimunqa. Ima añaychaytataq judiokunaman paykuna qhawachinku, paykunamanta Rimanakuy Qelqa chashkisqankumanta? Ari, ima ninankutan hawarunakuna ninku? Yuyarinkuchu judiokunaq purikachayninkuta, llank’ayninkuta, ñak’ariyninkuta, noqapaq mana sayk’uspa hawarunakunaman qespiyta apamusqankumanta?

5 Hawarunakuna, yuyarirqankichischu ñawpa rimanakusqay llatay judiokunamanta? Manan, aswanmá paykunata ñakarqankichis, cheqnikurqankichis, manataq paykunata yapamanta hatarichiyta yuyarirqankichischu. Ichaqa, kikin umaykichismanmi kaykunata kutirichisaq; noqa Wiraqochaqa manan llaqtayta qonqarqanichu.

6 Huk Rimanakuy Qelqa, kapuwanchismi huk Rimanakuy Qelqa, manataqmi nesitanchischu astawan Rimanakuy Qelqata, nispa niq upakuna; kanmanchu qankunapaq Rimanakuy Qelqa judiokuna mana kankumanchu chayri?

7 Manachu yachankichis hukmanta aswan ashkharaq llaqtakuna kasqanta? Manachu yachankichis noqa Wiraqocha Yayaykichis llapan runakunata kamasqayta, mamaqochaq wat’ankunapi kaqkunamanta yuyarisqayta; wichay hanaqpachapi, pachanpi kaq pachapi ima kamachisqayta; runakunaq wawankunaman rimayniy apamusqayta; ari, pachaq llapan llaqtankunamanpas?

8 Imanaqtinmi rimapakunkichis rimayniykunamanta astawan chaskinaykichismanta? Manachu yachankichis ishkay llaqtakunaq sut’inchayninku noqa Yaya kasqaymanta qankunapaq sut’inchaq kasqanta? hoq llaqtata hinallataq hoq llatataq yuyarisqayta? Chhaynaqa, hoq llaqtaman rimasqay kikin simikunallatataqmi hoq llaqtamanpas rimarini. Ishkaynin llaqtakuna kushka puriqtinkutaq, ishkaynin llaqtakunaq sut’inchayninkupas kushkalla purinqaku.

9 Kaytataq ruwani, ashkha runakunaman kaqlla qayna p’unchawpas, kunan p’unchawpas, wiñaypaqpas kasqayta qhawachinaypaq; rimayniykunatataq rimarini munayniyman hina. Huk rimayta rimasqayraykuqa, manan yuyanaykichischu manaña astawan rimayta atinayta; ruwayniyqa manan tukusqaraqchu, manataqmi tukusqachu kanqa runaq tukukuyninkama, nitaq chay pachamantapas, ni wiñaypaqpas.

10 Chhaynaqa, huk Rimanakuy Qelqayoq kasqaykichisraykuqa, manan yuyanaykichischu llapan rimayniykunayoq kasqanta; manataqmi yuyanaykichischu mana astawan qelqachisqaytaqa.

11 Llapan runakunatan kamachini, intiq lloqsimunan qayllapipas, intiq haykunan qayllapipas, qayllarinapipas, qheparinapipas, mamaqochaq wat’ankunapipas paykunaman rimasqay simikunata qelqanankupaq. Qelqasqa kanan qelqakunamantan runakunata taripasaq, sapanka runata ruwasqanman hina, qelqasqa kasqanman hina.

12 Rimarisaqmi judiokunaman, paykunataq chayta qelqanqaku; rimarillasaqtaqmi nefitakunamanpas, paykunataq chayta qelqanqaku; Israelpa wasinmanta huk hallp’aman pusasqay hukkaq ayllukunamanpas rimarillasaqtaq, paykunataq chayta qelqanqaku; kay pachamanta kaq llapan llaqtankunamanpas rimarillasaqtaqmi, paykunataq chayta qelqanqaku.

13 Hinataq, judiokuna nefitakunaq rimayninkunayoq kanqaku; nefitakunataq judiokunaq rimayninkunayoq kanqaku; nefitakuna judiokunapiwantaq, Israelmanta chinkasqa ayllunkunaq rimayninyoq kanqaku; Israelmanta chinkasqa ayllukunataq nefitakunaq judiokunaqpiwan rimayninkunayoq kanqaku.

14 Israelpa wasinmanta kaq llaqtaytaq, wasinkuman huñusqa kanqaku, paykunaq kaq hallp’ankuman; rimayniypas hukllapin huñusqa kanqa. Israelpa wasinmanta kaq llaqtay kontra, rimayniy kontrapiwan maqanakuqkunamantaq qhawachisaq, Yaya kasqayta, ch’awchunta wiñaypaq yuyarinaypaq Abrahanwan rimanakusqayta.