1 Kunantaq ancha munasqay wawqeykuna, ñanninta haykusqaychis pataman ima ruwanaykichismanta chikallantapas sonqoykichispi yuyayaymanasqaykichistan yuyayni; ichaqa, imanaqtinmi kaykunata sonqoykichispi yuyaymanankichis?

2 Manachu yuyarinkichis—Qollanan Nunata chashkisqaykichis patamanqa angelkunaq siminkuwanmi rimawaqchis, nispa nisqayta? Kunanri, imaynatataq kachakunaq siminkuwanri rimayta atiwaqchis, mana Qollanan Nunawanri?

3 Qollanan Nunaq atiyninwanmi angelkunaqa rimanku; chhaynaqa, Cristoq rimayninkunatan rimanku. Chhaynataq qankunata nirqaykichis, kusikuychis Cristoq rimayninkunapi, nispa; Cristoq rimayninkunan nisunkichis llapan ima ruwanaykichistapas.

4 Kay simikunata rimasqay pataman kaykunata mana hamut’ankichischu chayqa, mana mañakuspaykichisrayku, mana takasqaykichisrayku iman chay hina kanqa; chhaynaqa, manan k’anchaymanchu apamusqa kankichis, ichaqa, tutayaqpin wañunaykichis.

5 Hinaqa, yapamantan nisaykichis—ñanninta haykunkichis, Qollanan Nunatataq chashkinkichis chayqa, paymi qhawachisunkichis llapan ruwanaykichiskunata.

6 Cristoq yachachiyninmi kay, manataq astawan yachachiy qosqachu kanqa, ichaqa, qankunaman aychapi Pay kikin qhawachikusqan patamanña. Aychapi Pay kikin qankunaman qhawachikusqan patamantaq, qankunaman nisqasuykichiskunata ruwanaykichispaq kallpachakunkichis.

7 Kunantaq noqa Nephi, mana astawan niyta atinichu, Nunan rimayniyta hark’an; runakunaq mana kreyiyninkurayku, huchallikuyninkurayku, mana yachayninkurayku, ch’ila umankuraykupiwantaq llakikunaypaq saqesqa kani. Manan yachayta mashkankuchu, manataqmi ancha hatun yachayta hamut’ankuchu, paykunaman sut’intapuni qosqa kaqtin, rimay hina ch’uyaña kanman chaypas.

8 Kunantaq ancha munasqay wawqeykuna, rikushanin sonqoykichispi yuyaymanasqaykichista, nanawantaqmi kaymanta qankunaman rimanay. Yayaman-rimarikuyta runaman yachacheq Nunata uyariwaqchis chayqa, yachawaqchismi Yayaman rimarikunaykichista; millay nunaqa manan runataqa yayaman-rimarikuyta yachachinchu, Yayaman mana rimarikunanpaqmi ichaqa payta yachachin.

9 Ichaqa, qankunata niykichis pasaqlla yayaman-rimarikunaykichista, amataq sayk’uychischu; amataq imatapas Wiraqochapi ruwaychischu, ichaqa, ñawpaqtaraq Taytaman Cristoq sutinpi rimarikuqtiykichisña, ruwayniykichista qankunapaq qollanachinanpaq, nunaykichispa allin kayninpaq ruwayniykichis kananpaq.