1 Kunantaq Jakob, qanta rimarisayki: Purunpi ñak’ariyniypa ñawpaqkaq churiymi kanki. Erqe kayniykipin ñak’ariykunata ancha llakikuytawan muchurqani, wawqeykikunaq millay kayninkurayku.

2 Chaypiwanpas Jakob, purunpi ñawpaq paqariq churiy, yachankin Yayaq hatun kayninta; allin kayniykipaqmi ñak’ariyniykikunata Pay saminchanqa.

3 Chhaynaqa, saminchasqan nunayki kanqa, sumaqllataq wawqeyki Nephiwan tiyanki; Yayayki serviypitaq p’unchawniykikuna tukukunqa. Chhaynaqa, yachanin Kutichikapuqmiyki allinpuni kasqanrayku, kutichikapusqa kasqaykita. Rikurqankin pachakunaq hunt’akuyninpi runakunapaq qespichiyta apamunanpaq Pay hamunanta.

4 Waynakayniykipin kusiqellpunta rikurqanki; chhaynaqa, saminchasqan kanki aychapi Pay servinan runakuna hina. Nunaqa kaqllan qaynap’unchawpas, kunanpas, wiñaypaqpas. Runaq urmasqan pachamantataq ñan allichasqaña, qespitaq qespiy.

5 Allintataqmi runakuna yachachisqa kanku, allinta mana-allinmanta reqsinankupaq. Runakunamantaq kamachisqa-simi qosqa kan. Manataq ima aychapas kamachisqa-simiwan chaninchasqachu; utaq, kamachisqa-simiwanmi runakuna wit’usqa kanku. Ari, kay pachapi kamachisqa-simiq wit’usqanmi karqanku, nunapi kaq kamachisqa-simiq qarqosqantaq sumaq kaqmanta kanku, usuritaq wiñaypaq kanku.

6 Chayraykutaqmi Qollanan Hawisqapi, Qollanan Hawisqa ukhunta qespiy hamun; Yayaq-munakuyninwan cheqaqwan ima hunt’a Pay kasqanrayku.

7 Pay kikintaq munachikun hucharayku arpay hina, kamachisqa-simi munasqanta hunt’ananpaq, p’akillisqa sonqoyoq p’akillisqa nunayoq ima kaqkunapaq; manataqmi pimanpas kamachisqa-simiq munayninkuna kutichisqa kanmanchu.

8 Chhaynaqa, hayk’a chaninniyoqmi hallp’api tiyaqkunaman kay imaymanakuna yachachiy, Yayaq ñawpaqenpi mana ima aychapas tiyayta atinanta yachanankupaq, ichaqa, Qollanan Hawisqaq chaninninkunawan, khuyapakuyninwan, yayaq-munakuyninwan ima. Paytaq aychapi kawsayninta qon, yapamantataq kawsayninta hoqarikapun Nunaq atiyninwan, wañusqakunaq kawsarinankuta wakichinanpaq; Paytaq kawsariqkunamanta ñawpaqkaq.

9 Chhaynaqa, ñawpaqkaq ruru Yayapaq, Paytaq runakunaq llapan wawankunarayku rimarinqa, Paypi kreyiqkunataq qespichisqa kanqaku.

10 Llapa runakunarayku rimarisqanraykutaq, llapan runakuna Yayaman rinku. Chhaynaqa, Paypa ñawpaqenpin sayarinku, Paypa taripasqan kanankupaq, Paypi kaq cheqaqman hina, qollanan kayman hinapiwan. Chhaynaqa, Qollanan kaqpa qosqan kamachisqa-simiq munayninqa, chaywan kushka muchuchiypa hunt’ayninmi; kay kushka kaq muchuchiytaq kusikuywan kushka kaq kontra, ñak’ariypa munaynin hunt’akunanpaq.

11 Kananpunin llapan imaymanakunapi kontra. Mana chhayna kaqtinqa, purunpi ñawpaq paqareq churiy, manan chaninchay kanmanchu ni millay ruwaypas, ni qollanan kaypas, ni ñak’ariypas, ni allinpas, ni mana-allinpas. Chhaynaqa, llapan imaymanakunapas hukllapin kanman. Hukllapi kanman chayqa, wañusqa hinan kanman, mana kawsayniyoq mana wañuyniyoq, mana waqlliyniyoq ni mana-waqlliqniyoq; mana kusikuyniyoq ni ñak’ariyniyoqpas; mana allin yuyayniyoq ni mana-allin yuyayniyoqpas.

12 Chhaynaqa, yanqapaqmi kamasqa kanman karqan, manataq ima rasonpas kanmanchu karqan kamasqa kanapaq. Chhaynaqa, Yayaq yachaysapa kaynintan, wiñaypaq munayninkunatapas, atiynintapas, khuyakuynintapas, Yayaq chaninchaynintapas qolluchisqa karqan.

13 Manan kamachisqa-simi kanchu ninkichis chayqa, manan hucha kanchu nillankichistaqmi. Manan hucha kanchu ninkichis chayqa, manan chaninchaypas kanchu nillankichistaqmi. Mana chaninchay kanchu chayqa, manan kusikuypas kanchu. Mana chaninchay ni kusikuypas kanchu chayqa, manan muchuchiy ni ñak’ariypas kanchu. Mana kay imaymanakuna kanchu chayqa, manan Yayapas kanchu. Mana Yaya kanchu chayqa, manan noqanchispas ni pachapas kanchu; manan imaymanakuna kamay kanmanchu karqan, ni ruwanapaqpas, nitaq ruway chaskinapaqpas; chhaynaqa, llapan imaymanakunan ch’usaqyanman karqan.

14 Kunantaq churiykuna kay imaymanakunata qankunaman niykichis, allin kayniykichispaq, yachanaykichispaqwan. Kanmi Yaya, llapan imaymanakunatataq kamarqan, hanaqpachatapas, pachatapas, chaykunapi kaq llapan imaymanakunatapas; ruwanapaq imaymanakunatapas, ruway chaskinapaq imaymanakunatapas.

15 Runarayku wiñay-wiñaypaq munayninkuna ruwananpaq, ñawpaq tayta-mamanchis kamasqan pataman, uywakunata, urpikunata, huk rimaypiqa, llapan kamasqa kaqkuna patamanqa, nesitakunmi kontra kanan; hark’asqa ruru kawsaq sach’aq kontranpi; huknin misk’i kaspa, hukninkaqtaq p’oshqo.

16 Chayraykun runaman Wiraqocha Yaya qorqan, pay kikinmanta imatapas ruwananpaq. Chhaynaqa, manan runa pay kikinmanta imatapas ruwanmanchu, mana mayqen kaqpas payta inkitanmanchu chayqa.

17 Noqa Lehitaq, ñawinchasqay imaymanakunaman hina yuyani, qelqasqa kasqanman hina Yayaq huk angelnin hanaqpachamanta urmasqa kasqanta; chhaynataq saqraman tukurqan, Yayaq ñawpaqenpi mana-allin kaqta mashkaspa.

18 Hanaqpachamanta urmasqanrayku, wiñaypaq usuri kaspantaq, llapan runakunaq ñak’ariyninkuta mashkarqan. Chhaynataq chay ñawpa mach’aqway, saqra, llapan llullakuykunaq taytan, Evata nirqan: Hark’asqa rurumanta mikhuy, manataqmi wañunkichu, ichaqa, Yaya hinan kanki, allinta mana allintawan yachaspa, nispa.

19 Hark’asqa rurumanta Adan Evapiwan mikhusqanku patamantaq, Eden pawqarmanta qarqosqa karqanku, hallp’ata chakranankupaq.

20 Wawakunatataq apamurqanku, ari, pachaq llapan ayllunta.

21 Runakunaq wawankunaq p’unchawninkunataq hatunyachisqa karqan, Yayaq munayninman hina, aychapi kanankukama huchankumanta kutirimunankupaq. Chhaynataq kawsayninku probasqa kanapaq tukurqan; p’unchawninkutaq hatunyachisqa karqan runaq wawankunaman Wiraqocha Yayaq qosqan kamachiykunaman hina. Kamachiykunatan Pay qorqan, llapan runakuna huchankumanta kutirimunankupaq; llapan runakunamanmi Pay qhawachirqan, taytamanankuq huchankunarayku chinkasqa kasqankuta.

22 Adan mana kamachita p’akinmanchu karqan chayqa, manan urmanmanchu karqan, ichaqa Eden pawqarpin qhepanman karqan. Llapan kamasqa imaymanakunataq kamasqa kasqanku pataman imayna kasqallankupi qhepankuman karqan, wiñaypaqtaq qhepankuman karqan mana tukukuyniyoq kaspa.

23 Mana wawayoqtaq kankuman karqan; chhaynataq llunp’aq-kaypi qhepankuman karqan, ñak’ariyta mana reqsisqankurayku mana kusikuyniyoq kaspa; huchallikuyta mana yachasqankurayku allin kaqta mana ruwaspa.

24 Ichaqa, llapan imaymanakuna yachaq yachaysapa kayninpin llapan imaymanakunapas ruwasqa karqanku.

25 Runakuna kanankupaq Adan urmarqan, runakunataq kanku kusikuyniyoq kanankupaq.

26 Hawisqataq hamunqa pachakunaq hunt’akuyninpi, urmaymanta runakunaq wawankunata kutichikapunanpaq. Urmaymanta kutichikapusqa kasqankuraykutaq, wiñaypaq qespi tukunku, allinta mana-allinmanta reqsispanku; paykuna kikinkumanta imatapas ruwanankupaq, manataq paykuna patapi llank’asqa kanankupaqchu, ichaqa, chay hatun p’unchawpi kamachisqa-simiq muchuchiyllanwan, Yayaq qosqan kamachiykunaman hina.

27 Chhaynaqa, qespin runakuna aychaman hina kanku, paykunapaq llapan allin kaq imaymanakunataq paykunaman qosqa kan. Qespitaq kanku, qespi-kayta wiñay kawsaytawan akllanankupaq, llapan runakunaq hatun chawpichayninrayku; utaq hark’asqa kayta wañuytawan akllanankupaq, saqraq hark’ayninman atiyninmanwan hina. Llapa runakuna pay hina usuri kanankutan pay mashkan.

28 Kunantaq churiykuna, hatun Chawpichaqta qhawanaykichista, ancha hatun kamachiyninkunata ima uyarinaykichistan munani; iñiysapataq kaychis rimayninkunawan, wiñay kawsaytataq akllaychis Qollanan Nunanpa munayninman hina;

29 Amataq wiñay wañuyta akllaychischu aychaq munayninman hina, chaypi mana-allin kasqanman hina; chaytaq saqraq nunanman atiyta qon hark’ay atinanpaq, supay wasiman apanasuykichispaq, kikin suyunpi qankuna patapi kamachinanpaq.

30 Kay chikan rimaykunatataq llapaykichisnman rimarirqaykichis churiykuna, probasionniypa qhepa p’unchawninkunapi; allin kaqnintataq akllarqani unanchaqpa rimayninman hina. Manataqmi imatapas munanichu, ichaqa wiñaypaq nunaykichispa allin kaynillanta. Hinataq kachun.