1 Kunantaq noqa Nephi rimarini Egiptoman apasqa Josemanta taytaypa rimasqan unanchaykunamanta.

2 Cheqaqtapunin llapan ch’awchunmanta pay unancharqan. Manataqmi askhachu qelqasqan unanchaykunamanta aswan hatun unanchaykuna kan. Noqaykumanta, hamuq mirayniykumantawantaqmi pay unancharqan. Bronse raphikunapitaq chaykuna qelqasqa kashan.

3 Joseq unanchayninkunamanta taytay rimayta tukusqan patamantaq, Lamanpa wawankunata waqyarqan, churinkunata ususinkunatawan, hinaspataq paykunaman nirqan: churiykuna, ususiykuna, phiwi churiypa churi-usinkuna, rimayniykunata uyarinaykichistan munayman.

4 Wiraqocha Yayan nirqan: Kamachiyniykunata waqaychasqaykichisman hinan kay hallp’api t’ikarinkichis, ichaqa, kamachiyniykunata mana waqaychasqaykichisman hinataqmi ñawpaqeymanta qarqosqa kankichis, nispa.

5 Ichaqa churi-ususiykuna, manan aya-panpayman urayuymanchu huk saminchayta qankunaman mana saqespayqa; yachanin apamusqa kanaykichis ñanpi apamusqa kankichis chayqa, manan chaymanta ayqerinkichischu.

6 Chhaynaqa, ñakasqa kankichis chayqa, saminchayniyta qankunaman saqesaq, qankunamanta chay ñakay horqosqa kananpaq, tayta-mamaykichispa umankuman urmananpaq.

7 Hinaqa saminchayniyraykun mana chinkanaykichista Wiraqocha angelrinqachu, chhaynaqa, khuyapakuyniyoqmi qankunawan ch’awchuykichispiwan wiñaypaq kanqa, nispa.

8 Lamanpa churi-ususinkunaman taytay rimariyta tukusqan patamantaq, ñawpaqenman Lemuelpa churi-ususinkunata apachimurqan.

9 Paykunamantaq rimarirqan: Churiykuna, ususiykuna, ishkaykaq churiypa churi-ususinkuna; Lamanpa churi-ususinkunaman saqesqay kikin saminchaykunallatataqmi qankunaman saqeni; chhaynaqa, manan lliwtapunichu chinkachisqa kankichis; ichaqa, saminchasqan ch’awchuykichis tukukuypi kanqa, nispa.

10 Paykunaman rimayta taytay tukusqan patamantaq, Ismaelpa churinkunaman rimarirqan, ari, llapan wasinpi kaqkunaman.

11 Paykunaman rimay tukusqan patamantaq Samta nirqan: Saminchasqan kanki, ch’awchuykipas; wawqeyki Nephi hinan kay hallp’ata chaskikunki. Ch’awchuykitaq ch’awchunwan yupasqa kanqa; qantaq kanki wawqeyki hinapuni, ch’awchuykitaq ch’awchun hina, saminchasqataq kanki llapan p’unchawniykikunapi, nispa.

12 Hinataq, llapan wasinman sonqonpi kasqanman hina, paypi kaq Wiraqochaq Nunanman hinapiwan rimay tukusqan pataman taytay Lehi machuyarqan. Hinataq pay wañurqan, p’anpasqataq karqan.

13 Hinataq, wañusqanmanta chikan p’unchawkunallaman, Laman, Lemuel, Ismaelpa churinkunapiwan noqa kontra phiñarikurqanku, Wiraqochaq anyayninkunarayku.

14 Paypa rimayninman hinan noqa Nephi, paykunaman rimarinaypaq kamachisqa rikukurqani. Imaymanakunatan paykunaman rimarqani, taytaypas manaraq wañushaqtin paykunaman rimarillarqantaq. Ashkhataq kay rimaykunamanta hukkaq raphikunapi qelqasqa kashan; aswan historia kaqmi hukninkaq raphikunapi qelqasqa kashan.

15 Kay raphikunapitaq nunaypa imaymanankunata qelqani, bronse raphikunapi qelqakunamantawantaq askhata qelqani. Qelqakunapin nunay kusirikun, chaytataq sonqoy yuyaymanan; wawaykunaq yachayninkupaq allin kayninkupaqwantaqmi qelqani.

16 Kusikunmi sonqoy Wiraqochaq imaymanankunapi; sonqoytaq pasaqlla yuyaymanan rikusqaykunapi, uyarisqaykunapi ima.

17 Chaypiwanpas, ancha sumaq ruwayninkunata sumaq kayninpi Wiraqocha qhawachiwarqanña chaypas, sonqoy qaparin: O noqa usuri qhari! Ari aychayraykun sonqoy llakikun; huchaykunaraykun nunay llakikun.

18 Muyurisqan kashani, ruwanalla p’isturiwaq wateqaykunarayku, huchakunarayku ima.

19 Kusirikuyta munaqtiytaq huchaykunarayku sonqoy waqan; chaypiwanpas yachanin pipi konfiyasqayta.

20 Yayaymi yanapaqniy karqan; Paymi ñak’ariyniykuna chawpinta purunpi pusawarqan, Paytaqmi ancha hatun p’uytuq ununkuna patapi waqaychawarqan.

21 Aychay rupharinankaman munakuyninwan hunt’ariwarqan.

22 Ñawpaqeypi khatatatanankukaman awqaykunata tutayachirqan.

23 P’unchawpin waqayniyta uyariwarqan, tutapitaq yachayta rikuykunapi qowarqan.

24 P’unchawpin ñawpaqenpi kallpachakurqani ancha allin yaya-rimarikuypi; ari, hanaqmanmi aruyta seqariyachirqani; angelkunataq urayamuspanku serviwarqanku.

25 Nunanpa raprankunapitaq ancha suni orqokuna pataman runa-kurkuy apasqa karqan. Ancha hatun imaymanakunatataq ñawiykuna rikurqan, ari, runakunapaq sinchi hatunta; chayraykutaq, chaykunata mana qelqanaypaq kamachisqa karqani.

26 Chhayanaqa, chay ancha hatun imaymanakunata rikurqani chayri, runakunaq wawankunaman urayamuyninpi ancha hatun khuyapakuywan paykunaman Wiraqocha hamurqan chayri, imanaqtintaq sonqoyri waqan, imanaqtintaq nanay wayq’opi nunayri sayan, aychaytaq chinkarin, kallpaytaq ch’usaqyan llakikuyniykunaraykuri?

27 Imanaqtintaq aychayraykuri huchawan atipachikuyman? Ari, imanaqtintaq wateqaymanri pachata qoyman sumaq kawsayniyta chinkachinanpaq, nunaytawan ñak’arichinanpaq, sonqoypi saqra tiyananpaqri? Imanaqtinmi phiñarikuni awqayraykuri?

28 Rikch’ariy nunay! Amaña huchallikuypi urmayñachu. Kusirikuy sonqollay, amaña nunaypa awqan maypi kananpaq qoychu.

29 Amaña yapamanta phiñarikuychu awqaykunarayku, amaña kallpayta pisipachiychu ñak’ariyniykunarayku.

30 Kusirikuy sonqollay! Wiraqochaman khaynata waqyarikuy: O Wiraqocha wiñaypaqmi yupaychasayki, ari, qanpin nunay kusirikunqa, Yayay, qespiyniypa qaqan.

31 O Wiraqocha kutichikapunchu nunayta? Qesouchiwankichu awqaykunaq makinkunamanta? Khatatatachiwankichu huchaq ñawpaqenpi?

32 Wisq’asqalla ñawpaqeypi kachun supay wasiq punkun, sonqoypas nunaypas p’akillisqa kasqanrayku! O Wiraqocha, amayá chaninchayniykiq punkunta ñawpaqeypi wisq’aychu, llanp’u wayq’oq ñanninta purinaypaq, sumaq panpa ñanpi mana pantay kanaypaq.

33 O Wiraqocha, chaninchayniykiq mantanwan p’isturiway! Allicharipuway ñanta O Wiraqocha, awqaykunamanta ayqenaypaq! Ñawpaqeypi ñanta cheqaqcharipuway! Ama imatapas ñanhiypi mushk’akunaypaq churaychu, ichaqa, ñawpaqeypi ñanniyta picharipuway; amataq ñanniyta qenchaychu, awqaykunaq ñannintayá aswanqa.

34 O Wiraqocha qanpin konfiarqani, wiñaypaqtaq qanpi konfiasaq. Manan konfiasaqchu aychaq makinpi; yachanin aychaq makinpi konfiansan churaq runa ñakasqa kasqanta. Ari, ñakasqan runapi konfiansan churaq utaq aychata makinta hina churaq runa.

35 Ari, yachanin mañakuqman askhata Yaya qonanta. Ari, qowanqan Yayay chanin kaqta mañakuqtiy; chhaynaqa, qanmanmi aruyta hoqarisaq; ari, qantan waqyarikusayki Yayay, qespiyniypa qaqan. Wiñaypaqmi qanman aruy seqarinqa, qaqay, wiñay kawsaq Yaya. Hinataq kachun.