1 Kunantaq noqa Nephi, mana llapantachu qelqayta atini llaqtay purapi yachachisqa kasqanta; manataqmi rimaypi hina kallpasapachu qelqaypi kani. Qollanan Nunaq atiyninwan runa riman chayqa, Qollanan Nunaq atiyninmi chayta apan runakunaq wawankunaq sonqonkuman.

2 Ichaqa, askhan kanku Qollanan Nuna kontra sonqonku rumiyachiqkuna, hinataq mana paykunapi maypi kanan kanchu; chhaynataq ashkha qelqasqa imaymanakunata choqanku, yanqapaqtaq chayta kachinku.

3 Ichaqa, noqa Nephi qelqasqayta qelqarqani, ancha hatun chaninniyoqtataq kachini, llaqtaypaqpuni astawanqa. Pasaqllan paykunarayku p’unchawpi yayaman-rimarikuni, ñawiykunataq tutanpi sawnayta paykunarayku apiyachin; Yayaymantaq iñiypi rimarikuni, yachanitaqmi waqyakuyniyta uyarinanta.

4 Yachanitaqmi Payman rimarikuyniykunata, llaqtaypa allin kayninpaq Wiraqocha Yaya qollanachinanta. Usphu kayniypi qelqasqay rimaykunatataq paykunapaq atiysapa ruwasqa kanqa; allin ruwanankupaqmi rimayniykuna paykunata inkitan, taytankunamanta paykunata yachachin; Jesusmanta riman, Paypi kreyinankupaq tukukuykamataq takyanankupaq ima paykunata inkitan, kaytaq wiñay kawsay.

5 Cheqaqpi sut’i kasqanman hinataq allin kallpawan hucha kontra rimarin, chhaynaqa, manan pipas phiñarikunqachu qelqasqay simikunawanqa, ichaqa saqraq nunanmanta kaq runallan.

6 Kusiqellpukunin sut’in kaqpi, kusiqellpukunin cheqaq kaqpi; kusiqellpukunin Jesusniypi, Paymi nunayta supay wasimanta kutichikapurqan.

7 Khuyapakuyniyoqmi llaqtaypaq kani, hatuntaq Cristopi iñiyniy, askha mana ima qhelliyoq nunakunawan taripanan tiyananpi tupanaypaq.

8 Khuyapakuyniyoqmi judiopaq kani—Judio nispaqa nini, haqay hamusqay runakunamanta nisqayrayku.

9 Hawarunakunapaqpas khuyapakuyniyoqmi kani; ichaqa, manan mayqenkaqninkupaqpas suyakuyniy kayta atinmanchu, ichaqa Cristowan allichanakuqtillanku, k’ikllu punkunta haykuqtinku, wiñay kawsayman pusaq siwkneq ñanninta pureqtillanku; probakuna p’unchaw tukukunankama kay ñanta qateqtillanku ima.

10 Kunantaq ancha munasqay wawqeykuna, judiopas, pachaq tukukuyninkunapas, kay simikunata uyariychis, Cristopitaq kreyiychis; kay simikunapi mana kreyinkichischu chayqa, Cristopi kreyiychis. Cristopi kreyinkichis chayqa, kreyinkichismi kay simikunapi. Cristoq rimayninkunan, Paytaq kaykunata qowarqan, llapan runakunamantaq yachachin allin ruwanankupaq.

11 Mana Cristoq rimayninkunachu chayqa, qankuna taripaychis, Criston qhepa p’unchawpi atiywan ancha hatun kusiqellpuwan ima qhawachisunkichis, kaykuna rimayninkuna kasqanta. Qankuna noqapiwantaq uyapura sayarisunchis taripananpa ñawpaqenpi; hinataq usphuña karqani chaypas kaykuna qelqanaypaq Paypa kamachisqan kasqayta yachanaykichis.

12 Taytamantaq rimarikuni Cristoq sutinpi, noqanchismanta ashkha, manaña llapanchischu chaypas, chay ancha hatun qhepa p’unchawpi qhapaq-suyunpi qespichisqa kananchispaq.

13 Kunantaq ancha munasqay wawqeykuna, Israelpa wasinmanta llapan kaqkuna, pachaq llapan k’uchunkuna, qankunamanmi rimariykichis, ñut’u hallp’amanta qapariqpa arun hina: Qankunawanña allillan, chay hatun p’unchaw hamunankama.

14 Yayaq sumaq kayninmanta mana malliqkuna, judioq rimayninkuna mana yupaychaqkuna, ni rimayniykunatapas, nitaq Yayaq Chitanpa siminmanta lloqsimunan rimayninkunatapas yupaychaqkuna, wiñaypaqmi qankunamanta kacharparikuni; qhepa p’unchawpin kay rimaykuna kondenasunkichis.

15 Kay pachapi inturisqaytaq taripana tiyanaq ñawpaqenpi qankuna kontra apamusqa kanqa; khaynatan Wiraqocha kamachiwarqan, kasunaytaqmi. Hinataq kachun.