1 Kunantaq ancha munasqay wawqeykuna, kay imaymanakunataqa ñawincharqani, Israelpa llapan wasinwan Wiraqochaq rimanakusqan rimanakuykunata yachanaykichispaq—

2 Qollanan unanchaqkunaq siminkuwan judiokunaman rimasqanta, qallariymantapachapuni miraymanta mirayman, Yayaq cheqaq iñeqkuna-huñunman cheqaq t’aqanmanwan yapamanta huñusqa kanankupaq pacha hamunankama; chaytaq huñusqa kanqaku wasinkupi, chashkikuyninkuq hallp’ankupi, llapan promesankuq hallp’ankupitaq yapamanta sayarichisqa kanqaku.

3 Kusirikunaykichispaqmi kay imaymanakunata rimariykichis, ancha munasqay wawqeykuna, umaykichista wiñaypaq hoqarinaykichispaq, wawaykichiskunaman Wiraqocha Yaya qonqa chay saminchaykunarayku.

4 Yachanin ashkha qankunamanta, hamunan imaymanakunamanta yachanaykichispaq maskamusqaykichista; chhaynaqa, yachanin aychanchis wañunanta yachasqaykichista; chaypiwanpas aychanchispin Yayata rikusun.

5 Ari, yachanin hamusqanchis Jerusalenpi kaqkunaman, Pay kikin runa-kurkunpi qhawachikunanta yachasqaykichista; nesitakunmi paykunaq chawpinkupi chhayna kanan, allinmi ancha hatun Kamaq aychapi runaq atiyninpi kanan, llapan runakunarayku wañunanpaq, llapa runakuna Paypa atiyninpi kanankupaq.

6 Wañuychu llapa runakunaman haykurqan, ancha hatun khuyapakuyniyoq Kamaqpa ruwanankuna hunt’akunanpaq, chhaynallatataqmi nesitakun kawsariypaq atiy; chay kawsariytaq runakunaman hamunan urmayrayku; urmaytaq hamurqan kamachi-p’akiyrayku; runakuna urmasqa wakisqankuraykutaq, Wiraqochaq ñawpaqenmanta qarqosqa karqanku.

7 Chhaynaqa, nesitakunmi mana tukukuyniyoq ñak’ariy kanan; mana mana-tukukuyniyoq kanman chayqa, kay waqlliqqa manan mana-waqlliqta churakuyta atinmanchu. Hinaqa, runaman ñawpaq kaq taripay chayamusqanqa, wiñaypaqmi kanman karqan. Chhayna kaspataq kay aychaqa, ismunanpaq, khakukunanpaqwan pacha mamanman urmanman karqan, mana hayk’aqpas hatarimunanpaq.

8 O Yayaq yachaysapa kaynin, khuyapakuynin, munakuyninpas! Aycha mana hayk’aqpas hatarinmanchu chayqa, Wiñay Yayaq ñawpaqenmanta urmaspa saqra wakiq angelman watasqan nunanchis kanman, mana hayk’aqpas hatarinanpaq.

9 Nunanchistaq pay hina tukupunman karqan, noqanchistaq saqra kaswan, saqraq angelninkuna, Yayanchispa ñawpaqenmanta t’aqasqa, llullakuykunaq taytawan qhepaspa, pay hina muchuypi; ari, ñawpaq tayta-mamanchiskuna q’otoqman rikch’arikuq; paytaq rikhurichikun yaqa k’anchaq angel hina, runakunaq wawankunatataq munachin pakallapi huñunakuykunaman, runakuna sipiyman, imaymana tutayaqpi pakallapi ruwaykunamanwan.

10 Hayk’a hatunmi, kay ñak’aqpa makinmanta ayqenanchispaq huk ñanta allchaq Yayanchispa sumaq kaynin! ari, chay ñak’aqmanta, wañuy, supay wasimanta ima; chaytataq noqa waqyani runa-kurkuq wañuynin, nunaq wañuynin ima, nispa.

11 Yayanchispa, Israelpa Qollananpa qespichinanpaq ñanraykutaq, kay rimarisqay wañuy, kay pachapi wañuy, wañusqankunata haywanqa; chay wañuytaq ayawasi.

12 Nunapi wañuy rimasqay wañuytaq, wañusqankunata haywanqa; kay nunapi wañuytaq supay wasi; chhaynaqa, wañuypas supay wasipas haywanankun wañusqankunata; supay wasitaq hark’asqa nunankunata kacharinan, ayapanpataq hark’asqa runakurkunkunata kacharinan; runakunaq runa-kurkun nunanpiwantaq huk huknikaqman yapamanta churasqa kanqa; kaytaq Israelpa Qollananpa kawsariyninpa atiyninwan.

13 Ancha hatunmi Yayanchispa ima ruwanankuna! Hoq niraqmantaqa Yayaq kusipawqarninqa, chaninkunaq nunankunatan haywanan, ayapanpataq chaninkunaq runa-kurkunkunata kacharinan; nunataq runa-kurkunman yapamanta churasqa kanqa, llapan runakunataq mana waqlleq mana wañoq ima wakinku; paykunataq kawsaq nunakuna kanku, aychapi noqanchis hina hunt’asqa yachayniyoq, ichaqa, hunt’asqan yachayninchis kanqa.

14 Chhaynaqa, llapan huchanchiskunamanta, qhelli kayninchismanta, q’alalla kasqanchismantawan hunt’asqa yachayniyoqmi kasun. Chaninkunataq kusikuyninkumanta, chaninchayninkumantawan hunt’asqa yachayniyoq kanqaku, ch’uyakaywan p’achasqa kaspanku; ari, chaninchaypa p’achanwan.

15 Hinataq, kay ñawpaq wañuymanta kawsayman llapan runakuna reqtinku, mana wañuq wakispanku, Israelpa Qollananpa taripana-tiyananpa ñawpaqenpi rikhurinanku. Hinamantaq taripana hamunqa, chaytaq Yayaq qollanan taripananman hina taripasqa kananku.

16 Yayaq kawsasqan hina cheqaqpunitaq kayta Yaya rimarqan, Paypa wiñay rimaynintaqmi, manataqmi chinkanmanchu—chanin kaqkunaqa chaninmi qhepanqaku, qhelli kaqkunataq qhelli qhepanqaku; chhaynaqa, chay qhelli kaqkunaqa saqra angelninkuna iman kanku, paykunapaq allichasqa wiñay ninamantaq rinqaku; muchuyninkutaq huk sallurumiyoq nina qocha hina kanqa, chaypa nina qallunkunataq wiñaypaqpuni wicharimun, mana tukukuyniyoqtaq.

17 O Yayanchispa hatun kaynin chaninchayninpiwan! Paymi llapan rimayninkunata ruwan, siminmantataq chaykuna lloqsimurqan, hunt’akunantaqmi kamachisqa-simin.

18 Ichaqa, chaninkunaqa, Israelpa Qollananpa qollanankunaqa, Israelpa Qollananpi kreyiqkunaqa, runakunaq muchuchiyninkunata atipaspa chaypa p’enqakuyninkunata atipaqkunaqa, pachaq qallariyninmantapacha paykunapaq allichasqa Yayaq qhapaq suyuntan chashkinqaku, wiñaypaqtaq kusikuyninku hunt’a kanqa.

19 O Israelpa Qollananpa, Yayanchispa khuyapayakuyninpa hatun kaynin! Paymi qollanankunata qespichin chay millay-millana ñak’aqmanta, supaymanta, wañuymanta, supay wasimanta, mana tukukuyniyoq ñak’ariy chay sallurumiyoq nina qochamantawan.

20 O Yayanchispa ancha hatun qollanan kaynin! Llapan imaymanakunatan Pay yachan, manataq imapas kanchu Paypa mana yachasqan.

21 Paytaq kay pachaman hamun, llapan runakunata qespichinanpaq, arunta uyarinqaku chayqa; Paymi llapan runakunaq nanayninkunata ñak’arin; ari, llapan kawsaqkunaq nanayninkunata, Adanpa ayllunmanta kaq qharikunaqta, warmikunaqta, wawakunaqta ima.

22 Paytaq kayta ñak’arin, llapan runakunaman kawsariy chayananpaq, hatun taripana p’unchawpi ñawpaqenpi sayarinankupaq.

23 Llapan runakunatataq kamachin huchankunamanta kutirimunankupaq, Israelpa Qollananpi hunt’asqa iñiyniyoq kaspa sutinpi unuchakunankupaq; mana chayqa, manan Yayaq qhapaq suyunpi qespichisqa kayta atinkumanchu.

24 Mana yuyayninkuman kutirimunqakuchu, nitaq sutinpi kreyinqakuchu chayqa, nitaq unuchakunqakuchu, manataq tukukuykamachu takyanqaku chayqa, kondenasqan kanqaku; Wiraqocha Yaya, Israelpa Qollananmi khaynata nin.

25 Chhaynaqa Paymi huk kamachisqa-simita qon, mana kamachisqa-simi qosqa kasqanpitaq mana muchuchiy kanchu; mana muchuchiy kasqanpitaq mana kondenasion kanchu; mana kondenasion kasqanpitaq, Israelpa Qollananpa khuyapakuyninkuna paykunata mañakun ñak’ariyrayku; Paypa atiyninwan qespichisqa kasqankurayku.

26 Ñak’ariymi hunt’an chaninchayninpa mañakusqanta, llapan mana kamachisqa-simi chashkiqkunata, qespichisqataq paykuna kanku chay ancha millay ñak’aqmanta, wañuymanta, supay wasimanta, saqramanta, sallurumiyoq nina qochamantawan, chaytaq mana tukukuyniyoq ñak’ariy; yapamantataq Yayaman kutichisqa kanku, paykunaman kawsay qoq Israelpa Qollanan Yayaman.

27 Ichaqa, ay kamachisqa-simi qosqa kaq runamanta, ari, noqanchis hina Yayaq llapan kamachiyninkunayoq kaspa chay kamachisqa-simi p’akiqmanta, probasion p’unchawninkuna usuchiqmanta, ancha millaypunin chay runaq kaynin!

28 O chay saqraq atoqrayay ruwayninkuna! O runakunaq anchayayninku, usphu kayninku, upa kayninkupiwan! Yachayniyoq kaspanku hamawt’a kanankupaq yuyakunku, manataq Yayaq kunsejunta uyarinkuchu, huk qayllamantaq churanku, paykuna kikinkumanta yachasqankuta yuyaspanku; chhaynaqa, yanqapaqmi yachaysapa kayninku, manataq imapipas paykunata sirvinchu. Wañunqakun paykuna.

29 Ichaqa allinmi yachayniyoq kay, Yayaq kunsejunta paykuna kasunku chayqa.

30 Ichaqa, ay kay hallp’aq imaymanankunaman hina qhapaqkunamanta! Qhapaq kasqankuraykun wakchakunata alqochanku, llanp’u sonqokunayoqta qatikachanku, sonqonkutaq qhapaqyayninkunapi churasqa; chhaynaqa, qhapaqyayninkunan Yayanku. Paykunawanmi qhapaqyayninkupas chinkanqa.

31 Ay mana uyariy munaq upakunamanta! Wañunqakun.

32 Ay mana rikuy munaq ñawsakunamanta! Paykunapas wañunqakun.

33 Ay mana p’akillisqa sonqoyoqkunamanta! Huchallikuyninkumanta yachaymi paykunata qhepa p’unchawpi k’irinqa.

34 Ay llullakuqmanta! Supay wasiman choqasqan kanqa.

35 Ay munashaspa wañucheq runa-wañucheqmanta! Wañunqan pay.

36 Ay map’akuykuna ruwaqkunamanta! Supay wasiman choqasqan kanqaku.

37 Ari, ay rikch’aykuna yupaychaqkunamanta. Llapan saqrakunaq saqranmi paykunapi kusikun.

38 Qhepatapuniqa, ay huchankupi wañuqkunamanta! Yayamanmi kutirinqaku, uyantataq rikunqaku, huchankupitaq qhepanqaku.

39 O ancha munasqay wawqeykuna, yuyariychis chay Qollanan Yaya kontra huchallikuy ancha millay kasqanta; chay atoqrayaq saqraq wateqayninkunapi urmay millay kaynintawan! Yuyariychis—aycha kaq yuyayniyoq kayqa wañuymi; nuna yuyayniyoq kaytaq wiñay kawsay.

40 O ancha munasqay wawqeykuna, uyariychis rimayniykunata. Israelpa Qollananpa hatun kayninta yuyariychis. Ama niychischu: k’araq imaymanakunatan rimariwanchis, nispa; chhaynata ruwankichis chayqa, cheqaqkaq kontran rimankichis. Kamaqniykichispa rimayninkunatan rimarirqaykichis. Yachanin, cheqaqniyoq rimaykuna llapan qhellikaykuna kontra k’araq kasqanta; ichaqa, chaninkunaqa manan chaykunata manchakunkuchu, cheqaqtan munakunku manataq pantachisqachu kanku.

41 Chhaynaqa ancha munasqay wawqeykuna, hamuychis Wiraqochaman, Qollanan kaqman. Yuyariychis ñanninkuna chanin kasqanta. Runapaq ñanqa k’ikllullan, ichaqa siwkllan ñawpaqenpi mast’arikun, punku waqaychaqtaq Israelpa Qollanan; manataq ima warmatapas chaypi llank’achinchu, nitaq hukniraq ñan kanchu, ichaqa punkullanta. Manan Payqa yukasqa kayta atinmanchu, Wiraqocha Yayan sutin.

42 Waqyakuqmantaq Pay kicharinqa; hamawt’akunata, yachayniyoqkunata, yachayninkurayku anchayaq runakunata, yachaysapa kayninkurayku, qhapaqyayninkurayku ima anchayaq qhapaqkunata—ari, paykunatan Pay alqochan; kay imaymanakunata mana choqanqakuchu, Paypa ñawpaqenpitaq upa kasqankuta mana yuyanqakuchu chayqa, nitaq ullpuykukuypichu hamunqaku chayqa, manan paykunaman Pay kicharinqachu.

43 Ichaqa yachaysapaq, allin umayoqpa ima imaymanankunaqa wiñaypaqmi paykunamanta pakasqa kanqa; ari, qollanankunapaq allichasqa kusikuy.

44 Ancha munasqay wawqeykuna, rimayniykunata uyariychis! P’achaykunatan horqokuni, ñawpaqeykichispitaq chhapchini; llapan rikuq ñawinwan qhawariwananpaqtaq, qespiyniypa Yayanmanta mañakuni. Chhaynaqa, qhepa p’unchawpin yachankichis, llapan runakuna ruwasqankuman hina taripasqa kaqtinku, Israelpa Yayan, nunaymanta huchaykichiskunata chhapchirisqayta rikusqanta, k’anchayniyoq ñawpaqenpi sayasqayta, yawarniykichismanta chhapchirikusqayta.

45 Ancha munasqay wawqeykuna, kutiriychis huchaykichiskunamanta. Usqhaylla watay munasoqniykichispa chaqnankunamanta chhapchirikuychis. Qespiyniykichispa qaqan Yayaman hamuychis.

46 Chaninkunaman chaninchay qokunan k’anchayniyoq p’unchawpaq nunaykichista allichaychis, taripana p’unchawpaqpuni, millay manchakuypi mana khipuchakunaykichispaq; ch’uyatapuni huchaykichismanta mana yuyarinaykichispaq, hinaspataq kayta niwaqchis: Qollanan, qollanan taripayniykikuna O Llapa Atiyniyoq Wiraqocha Yaya—ichaqa, yachanin huchaykunata; kamachi-simiykikunatan p’akirqani, noqaqmi huchaykuna, saqrataqmi atipawarqan, ancha millay muchuyninpa hap’ikusqantaqmi kani, nispa.

47 Ichaqa wawqeykuna, nesitakunchu kay ancha millaykuna imayna kasqanmanta qankuna yuyarichinay? Manchachiymanchu nunaykichista yuyayniykichis ch’uya kaqtin? Sut’inchu qankunawan kayman, cheqaqpa sut’in kayninman hina, mana ima huchayoq kawaqchis chayri?

48 Qollanan kawaqchis chayqa, qollanan kaymantan rimariykichisman; ichaqa, manataq qollananchu kankichis, yachacheqniykichista hinatataq qhawariwankichis chayqa, nesitakunmi imata hucha qosqanta qankunaman yachachinay.

49 Anchatapunin huchata nunay cheqnin, anchatapunitaq sonqoy kusikun chaninchaypi; Yayaypa qollanan sutintataq yupaychasaq.

50 Hamuychis wawqeykuna, llapan ch’akichikuqkuna hamuychis unukunaman; mana qolqeyoqtaq hamuspa rantikuy, mikhuytaq; ari, rantikuy vinota ñukñutawan, mana ima qolqewan, mana ima chaninwan.

51 Chhaynaqa, ama qolqeta tukuychischu mana ima chaninniyoq kaqpi, nitaq llank’ayniykichistapas mana saksachiy ateqpi. K’uchillaña uyariwaychis yuyariychistaq rimarisqay simikunata; Israelpa Qollananmantaq hamuychis, k’uchikuychistaq mana wañuqpi mana waqlleqpiwan; wapu kaqpi nunaykichis kusikunantataq saqeychis.

52 Ancha munasqay wawqeykuna, yuyariychis Yayaykichispa rimayninkunata, pasaqlla Payman p’unchawpi rimarikuychis, tutanpitaq qollanan sutinta añaychaychis. Sonqoykichis kusikunanta saqeychis.

53 Qhawariychis Wiraqochaq rimanakuyninkuna imayna hatun kasqanta, imayna hatuntaq runakunaq churinkunawan hamuyninkuna kasqanta. Ancha hatun kaynin, khuyapayakuynin, munakuyninrayku imataq noqanchisman prometiwarqanchis ch’awchunchis mana llapanpunichu kay aychaman hina chinkachisqa kanankumanta; ichaqa, Paysi paykunata qhawanman; qhepa p’unchawkunapitaq Israelpa wasinpi cheqaq palqaman wakipunqaku.

54 Kunantaq wawqeykuna, astawanmi qankunaman rimariyman, ichaqa paqarinña rimayniykunaq puchunta rimarisaykichis. Hinataq kachun.