5 T’aqa
Nephi, Yayaq willasqan kawsaynin qechuy munaqkunamanta t’aqakun. Zoram, Sam, Jakob, Jose, hoqkuna ima paywan rinku. Labanpa q’anchinan. Wiraqochaq Wasin ruwakun. Nephi inkanku utaq amachaqninku. Ankallinkuqkuna tunpa-yana aychaqarawan ñakasqa kanku. Kurakkuna, yachacheqkunapiwan sapaqchasqa kanku.
1 Hinataq noqa Nephi, Wiraqocha Yayayman anchatapuni waqyakurqani, wawqeykunaq phiñarikuyninkurayku.
2 Ichaqa, astawanmi noqa kontra phiñarikuyninku yapakurqan, chayraykutaq sipiwayta munarqanku.
3 Ari, noqa kontran rimapakurqanku: Noqanchista kamachiytan sullk’a wawqenchis yuyaykukun, payraykutaq askhata ñak’arirqanchis; chhaynaqa, haku sipirusun, rimayninkunarayku manaña astawan ñak’arinanchispaq. Manan kamacheqninchis pay kananta munanchischu, noqanchis kurak wawqenkunaqmi kay runakuna kamachiy, nispa.
4 Manan kay raphikunapichu qelqani noqa kontra llapan rimapakusqanku rimaykunata. Ichaqa, allinñan kawsayniy qechuy munasqanku nisqay.
5 Hinataq Wiraqocha niwarqan, noqa Nephi paykunamanta ayqenaypaq, noqawan llapan riy munaqkunapiwan purunman rinaypaq.
6 Chhaynataq noqa Nephi, aylluyta aparqani, Zoramta aylluntawan, kuraq wawqey Samta aylluntawan, sullk’a wawqeykuna Jakobta, Joseta, panaykunatapas, noqawan llapan riy munaqkunatawan. Noqawan riy munaqkunataq karqanku, Yayaq anyayninkunapi willayninkunapiwan, kreyiqkuna; chayraykutaq rimayniykunata uyarirqanku.
7 Karpaykutataq apakurqayku, imatapas apay atisqaykutawan; askha p’unchawkunataq purunpi purirqayku. Ashkha p’unchawkuna purisqayku patamantaq karpaykuta hatarichirqayku.
8 Llaqtaytaq munarqan chay hallp’ata Nephi nispa sutichanaykupaq; chhaynataq, Nephi nispa suticharqayku.
9 Noqawan llapan kaqkunataq paykuna kikinkuta: Nephiq llaqtan nispa waqyakurqanku.
10 Kallpachakurqaykutaq Wiraqochaq taripayninkunata, yuyaqankunata, kamachiyninkunatawan waqaychanaykupaq, Moisespa kamachisqa siminman hina imaymanakunapi.
11 Noqaykuwantaq Wiraqocha karqan, anchatapunitaq t’ikarirqayku. Muhukunata tarpuspaykutaq askhata pallarqayku. Uywakunata imayamana uywakunatawantaq uywayta qallarirqayku.
12 Noqa Nephitaq apamurqani bronse raphikunapi qelqasqa qelqakunata; taytaypaq Wiraqochaq makinpa ruwasqan sinkuta utaq kompastapas chay qelqasqata hina.
13 Hinataq anchatapuni t’ikariyta miraytawan chay hallp’api qallarirqayku.
14 Noqa Nephitaq Labanpa q’anchinanta hap’ispay, chayman rikch’akuqta askha q’anchinakunata ruwarqani, imaynapas lamanita nispa kunan waqyasqa runakuna noqaykuman hamuspa mana wañuchiwanankupaq; yacharqanin, noqata, wawaykunata, llaqtay waqyasqa runakunatawan cheqnikusqankuta.
15 Wasikuna ruwaytataq llaqtayman yachachirqani, imaymana kurkukunapi llank’ayta, killaypi, antapi, bronsipi, asiropi, qoripi, qolqepi, ancha sumaq metalkunapiwan; chaykunataq askhapuni karqan.
16 Noqa Nephitaq Wiraqochaq Wasinta ruwarqani, Salomonpa Wiraqochaq Wasinman rikch’akuqta; ichaqa manan ancha sumaq imaymanakunayoqtachu, manataq kay hallp’pi tarikurqanchu chayqa; chayraykun mana Salomonpa Wiraqochaq Wasinta hinatachu ruwayta atikunman karqan. Ichaqa, Wiraqochaq Wasinpa ruwayninqa, Salomonpa Wiraqochaq Wasinmanmi rikch’akurqan, ancha sumaqtaq ruwaynin karqan.
17 Hinataq noqa Nephi, llank’aysapa llaqtay kananta ruwarqani, makinkuwan llank’anankupaqwan.
18 Inkanku kanaypaqtaq munarqanku, ichaqa manan noqa Nephi munarqanichu inkayoq kanankuta; chaypiwanpas atiyniypi llapan kasqantan paykunapaq ruwarqani.
19 Hinan, wawqeykunawan Wiraqochaq rimayninkuna hunt’akurqan, paykunaq yachacheqninku, kamacheqninku kanaypaqwan paykunamanta Wiraqochaq rimarisqan. Chhaynataq kamacheqninku yachacheqninku ima karqani, Wiraqochaq kamachiyninman hina, wañuchiwayta munasqanku chay p’unchawkama.
20 Chhanaqa, hunt’akurqanmi Wiraqochaq rimayninkuna: Rimayniykikunata mana uyarinqakuchu chayqa, qarqosqan kanqaku Wiraqochaq ñawpaqenmanta, nispa Pay niwasqan. Hinataq ñawpaqenmanta qarqosqa karqanku.