1 Hinataq taytayman Wiraqocha rimarqan, ari, mosqokuyninpin khaynata nirqan: Saminchasqan kanki, Lehi, ruwasqaykikunamanta. Ancha iñiysapa kasqaykimanta, kamachisqaykunata kay runakunaman willasqaykimanta imataqmi wañuchiyta munasunkiku, nispa.

2 Chhaynataq, mosqokuyninpi taytayman Wiraqocha kamachirqan, ayllunta apayukuspa purunman lloqsinanpaq.

3 Hinataq Wiraqochaq rimayninman uyakuq kaspa, Wiraqochaq kamachisqanman hina ruwarqan.

4 Hinaspataq purunman lloqsirqan. Wasinta, chashkikuyninpa hallp’anta, qorinta, qolqenta, ancha sumaq imankunatawantaq saqerqan. Manataq imatapas paywan aparqanchu, ichaqa ayllunta, mikhunakunata, karpakunallatawan; purunmantaq lloqsirqan.

5 Puka Mamaqocha pataq sispallantataq pay hamurqan; Puka Mamaqochaq aswan sispayninpi kaq kantukuna purunpin pay purirqan; aylluntinwantaq chay purun hallp’api purirqan. Paykunataq karqanku: Mamay Sariah, kurak wawqeykuna Laman, Lemuel, Sam ima.

6 Chhaynataq, kinsa p’unchaw purunpi puriqtin huk qheshwapi karpanta hatarichirqan, huk mayu patapi.

7 Hinataq rumimanta huk usnuta ruwarqan, huk aypaytataq Wiraqochaman munachirqan, Wiraqocha Yayanchistataq añaycharqan.

8 Puka Mamaqochaman haykuq mayutataq Laman nispa suticharqan, chay hatun wayq’otaq karqan mayoq siminpa kantunpa sispayninpi.

9 Puka Mamaqochaman mayuq unun haykusqanta rikuspataq taytayqa Lamanta nirqan: Ichapas kay mayu hina kawaq, llapa chaninchaypa pukyunmantaq mana samaspa haykuwaq, nispa.

10 Lemuelmanpas rimarillarqantaqmi: Ichapas kay qheshwa hina kawaq, qaqa, allin takyasqa, mana-kuyoq ima Wiraqochaq kamachiyninkuna waqaychaypi! nispa.

11 Khaynatataq rimarqan Laman, Lemuelpiwan k’ullu umayoq kasqankurayku. Askha imaymanakunapin taytanku kontra rimapakurqanku: Yanqa imaymanakunata rikuq runan, Jerusalen hallp’amantan lloqsichiwanchis, chashkikuyninchis hallp’ata, qorinchista, qolqenchista, ancha sumaq kapuwasqanchiskunatawan saqespanchis purunpi wañunanchispaq; kaytataq pay ruwarqan sonqonpa waq’a yuyayninkunarayku, nispa.

12 Khaynatataq Laman, Lemuelpiwan, kurakkuna kaspanku, taytanku kontra rimapakurqanku. Kamaqninku Yayaq ruwayninkunata mana reqsispankutaq khaynata rimapakurqanku.

13 Manataqmi kreyirqankuchu, haqay hatun Jerusalen llaqta unanchaqkunaq rimayninkunaman hina thuñikunanta. Jerusalenpi taytayta sipiy munaq Judiokuna hinan paykuna karqanku.

14 Chhaynataq, taytayqa Nunawan hunt’a kaspa, wapu kallpawan paykunata anyarqan Lemuel qheshwapi, ñawpaqenpitaq khatatatarqanku. Paykunata tutayacheqtintaq, mana pay kontra rimayta qhariykacharqankuchu. Chhaynataq, paypa kamachisqanman hina ruwarqanku.

15 Taytaytaq huk karpapi tiyarqan.

16 Hinataq noqa Nephi, waynallaraq karqani chaypas, hatun runan karqani. Yayaq pakasqa imaymanakunata yachayta munaspataq Wiraqochaman rimarikurqani, Paytaq watukamuwarqan, sonqoyta llanp’uyacheqtintaq taytaypa llapan rimasqan simikunata kreyirqani; chayraykutaq mana pay kontra ankallikurqanichu, imayna wawqeykuna ruwasqankuta hina.

17 Samtataq rimarirqani, Qollanan Nunanwan Wiraqocha yachachiwasqan imaymanakunata payman willaspa. Hinataq rimayniykunapi kreyirqan.

18 Ichaqa Laman, Lemuelpiwanqa manan rimasqaykunata uyariyta munarqankuchu. Rumi sonqoyoq kasqankumanta llakikuspataq paykunarayku Wiraqochata waqyakurqani.

19 Hinataq khaynata Wiraqocha rimariwarqan: Saminchasqan kanki, Nephi, iñiyniykirayku; k’uchiy-k’uchin mashkawarqanki k’umuykukusqa sonqowan.

20 Kamachiyniykunata waqaychankichis chayqa, t’ikarinkichismi, prometisqa hallp’aman pusasqataq kankichis; ari, qankunapaq allichasqay hallp’aman, llapa hallp’akunamanta akllasqa hallp’aman.

21 Wawqeykikuna qan kontra ankallikunqaku chaytaq, Wiraqochaq ñawpaqenmanta t’aqasqa kanqaku.

22 Kamachiyniykunata waqaychanki chaytaq, wawqeykikunaq kamacheqninku yachacheqninkupiwanmi kanki.

23 Noqa kontra ankallikunanku p’unchawpitaq, nanaq ñakaywan paykunata ñakasaq, manataq ch’awchuyki patapi kallpayoqchu kanqaku, ichaqa, noqa kontra ch’awchuykipas ankallikuqtillan.

24 Noqa kontra qhepa wawaykikuna ankallikunqaku chayqa, hasut’in ch’awchuykipaq paykuna kanqaku, allin yuyayman paykunata kutirichimunankupaq.