1 Chhaynataq noqa Nephi, Wiraqochawan rimasqaymanta, taytaypa karpanman kutirqani.

2 Hinataq taytay rimariwarqan: Huk mosqokuytan mosqokurqani, chay mosqokuypitaq Wiraqocha kamachiwarqan, qan wawqeykikunapiwan Jerusalenman kutinaykichispaq.

3 Labanmi judiokunaq qelqanta, ñawpaykikunaq ayllusaphintawan hap’in; chaykunataq bronsemanta ruwasqa raphikunapi qelqasqa kanku.

4 Chayraykutaq Wiraqocha kamachiwarqan, qan, wawqeykikunapiwan Labanpa wasinman rinaykichispaq, chay qelqakunata hap’ispa kay purunman apamunaykichispaq.

5 Kunantaq wawqeykikuna rimapakunku, ancha sasan kamachiwasqaykiku, nispa; ichaqa, manan noqachu kayta paykunaman kamachirqani, Wiraqochaq kamachiyninmi.

6 Chhaynaqa riy, churiy, Wiraqochaq yanapasqanmi kanki mana rimapakurqaykirayku, nispa.

7 Hinataq noqa Nephi taytayta nirqani: risaqmi, ruwamusaqtaq Wiraqochaq kamachisqanta. Yachanin runakunaq wawankunaman Wiraqocha mana ima kamachiytapas qosqanta, paykunaman kamachisqanta hunt’anankupaq ñanta mana allichaspaqa, nispa.

8 Kay simikunata uyarispataq, anchatapuni taytay kusikurqan, Wiraqochaq saminchasqan kasqayta yachaspa.

9 Noqa Nephitaq, wawqeykunapiwan, karpaykuta apayukuspa purunpi puriyta qallarirqayku Jerusalen hallp’aman rinaykupaq.

10 Hinaspataq Jerusalen hallp’aman chayaspayku rimanakurqayku.

11 Mayqen kaqniyku Labanpa wasinman haykunaykupaqtaq watuypi choqarqayku. Hinataq Lamanpi watuy chayarqan, Lamantaq Labanpa wasinman rispa, wasinpi tiyashanankama paywan rimarqan.

12 Lamantaq Labanmanta mañakurqan bronse raphikunapi qelqakunata; chay raphikunapitaq karqan taytaypa ayllusaphin.

13 Hinataq, Laban phiñarikuspa ñawpaqenmanta qarqorqan, manataq qelqakunata qoyta munarqanchu. Hinaspataq Laban payta nirqan: suwan kanki, sipisaykin, nispa.

14 Ichaqa, ñawpaqenmanta Laman ayqekurqan, noqaykumantaq willawarqanku Labanpa ruwasqan imaymanakunata. Anchatapunitaq llakikurqayku, wawqeykunataq purunpi taytayman kutipunankupaq hinaña kasharqanku.

15 Ichaqa, khaynata paykunata nirqani: Imaynan Wiraqocha kawsan noqanchispas kawsanchis chhaynan, mana purunpi taytanchisman kutisunchu, Wiraqochaq kamachiwasqanchiskunata hunt’ananchiskama.

16 Chhaynaqa, hakuyá iñiysapa kasun Wiraqochaq kamachiyninkuna waqaychaypi. Haku taytanchispa chashkikuyninpa hallp’anman, chaypitaq qorita, qolqeta, imaymana qhapaqyaykunatawan saqerqan chayqa. Kay llapantataq ruwarqan Wiraqochaq kamachiyninkunarayku.

17 Yacharqantaqmi runakunaq millay-ruwayninkurayku Jerusalen thuñisqa kananta.

18 Unanchaqkunaq rimasqankunatataq mana munasqakuchu karqan; chhaynaqa, chay hallp’api taytay tiyanman, chay hallp’amanta lloqsinanpaq kamachisqa kasqan pataman chayqa, paypas wañunmanmi. Chayraykun chay hallp’amanta lloqsinan karqan.

19 Yachaysapa kaymi Yayapi kan kay qelqakunata hap’inanchispaq, taytanchiskunaq rimayninta wawanchiskunapaq qhepachinanchispaq;

20 Llapa qollanan unanchaqkunaq siminkuq rimasqan rimayninkunata; kay pachaq qallariyninmanta kunan p’unchawkama, Yayaq atiyninwan Nunanpiwan paykunaman qosqan rimaykunata ima paykunapaq qhepachinanchispaq.

21 Khaynata rimaspataq wawqeykunata uynichirqani, Yayaq kamachisqankuna waqaychaypi iñiysapa kanankupaq.

22 Chhaynataq, chashkikuyniyku hallp’aman rirqayku, qoriykuta, qolqeykuta, ancha sumaq imaymanaykutawantaq huñukapurqayku.

23 Kaykunata huñuqtiykutaq, yapamanta Labanpa wasinman rirqayku.

24 Labanpa kasqanman haykuqtiykutaq, bronse raphikunapi qelqakunata qowanankupaq mañakurqayku, chay rantitataq qoriykuta, qolqeykuta, ancha sumaq imaymanaykutawan payman munachirqayku.

25 Kapuwaqniykuta rikuspa, ancha askha kasqantawan rikuspa imataq, Labanqa chaykunata munapakurqan; chayraykutaq qarqowarqanku. Kapuwaqniykuta hap’ikunanpaqtaq sipiwanankupaq warmankunata kamachirqan.

26 Hinataq Labanpa warmankunaq ñawpaqenkuta ayqekuspayku, kapuwaqniykuta saqenayku karqan, chayraykutaq Labanpa makinman qhapaq kayniyku chayarqan.

27 Purunman ayqekuqtiykutaq Labanpa warmankuna mana aypawarqankuchu; huk mach’aypitaq pakakurqayku.

28 Lamantaq noqawan taytaypiwan phiñarikurqan, chhaynallatataq Lemuelpas phiñarikurqan, Lamanpa rimayninkunawan apachikusqanrayku. Hinataq Laman Lemuelpiwan k’ireq rimaykunawan rimawarqanku sullk’a wawqenkunaman, huk k’aspiwantaq noqaykuta p’anawarqanku.

29 K’aspiwan p’anawashaqtinkutaq, Wiraqochaq kachan ñawpaqeykupi rikhurimurqan, khaynatataq paykunata nirqan: Imanaqtinmi sullk’a wawqeykichista k’aspiwan p’anankichis? Manachu yachankichis qankunaq kamacheqniykichispaq payta Wiraqocha akllasqanta, kaytaq millay-ruwayniykichiskunarayku? Yapamantan Jerusalenman rinkichis, Wiraqochataq makiykichispi Labanta churanqa, nispa.

30 Rimariwasqanku patamantaq kachaqa ripurqan.

31 Kachaq ripusqan patamantaq, Laman Lemuelpiwan yapamanta rimapakuyta qallarirqanku: Imaynatataq Wiraqochari Labanta makinchisman churanman? Labanqa kallpasapa runan, pishqa chunka runakunatataq kamachiyta atinman; ari, pishqa chunka runakunatan sipiyta atinman, chayri imanaqtintaq mana noqanchistari? nispa.