1 Ao ngkai, Ngai ae Iakobwa, I a manga taetae riki nakoimi, tariu aika a tangiraki, ni kaineti ma te mwanga ae raoiroi are I a tia ni moan taekinna.

2 Bwa taraia, taian berita ake ti a tia ni karekei a kaineti ma te maiu n rabwata; mangaia ae n aron are e a tia ni kaotaki nakoiu, a mwaiti kanoara aika a na mate n te rabwata ibukin akean aia koaua, ma e ngae n anne, ao e na nanoangaia aika a mwaiti te Atua; ao natira a na manga kamaiuaki, bwa a na reke irouia te atatai ni koaua ibukin aia Tia Kaboia.

3 Mangaia ae n aron are I a tia n taekinna nakoimi, e bon riai Kristo—bwa aio te ara are I a tia n anganaki iroun te anera n te kabanea n tairiki—bwa e na kaoti i buakoia Iutaia, i buakoia ake e moamoa riki buakakaia n te aonaba; ao a na tauria iaon te kaibangaki—bwa e ataia Atuara bwa bon ti aio te kawai, ao bon akea riki te aba teuana iaon te aonaba ae kan taura Atuaia.

4 Bwa ngke arona bwa a karaoaki taian kakai aika a korakora n aaba riki ake tabeua ao a na tia n rairinanoia, ao n ataia bwa bon ngaia Atuaia.

5 Ma ngkai e korakora te waki ibukin nakoanibonga aika kewe ma te buakaka, ake a mena i Ierutarem a kamoamoa nakoina, bwa e aonga n tauraki.

6 Mangaia ae ngkai e korakora aia bure, ao e na riki nakoia te uruaki, te rongo, aoraki aika kamamate, ao te tiritiri; ao aomata ake a aki mate a na kamaenakoaki nakon aaba aika kakaokoro.

7 Ma taraia, e taku te Uea ae te Atua: Ngkana e roko te bong are a na kakoauaai iai ae bon Ngai te Kristo, ao ngkanne I a tia ni karaoa au berita ae tabu ma tamaia are ana botaki n te iriko, iaon te aonaba, iaon aban rikiia.

8 Ao e na koro bukina bwa a na bane ni manga botaki man taabo ake a tia ni kamaenakoaki nako iai, mai aban marawa, ao mai mwakoron te aonaba aika aua; ao a na korakora abaia Tientaire imatau, n aron ana taeka te Atua, ni uotia nako ni kaokia nakon aban rikiia.

9 Eng, a na riki ueaia Tientaire bwa taama aika taan tararuaia, ao aia uea aine bwa tiina aika taan tararuaia; mangaia ae a korakora ana tuea te Uea nakoia Tientaire, bwa e a tia n taekin, ao antai ae kan ngureakin?

10 Ma taraia, te aba aio, e taku te Atua, e na riki bwa abami ni bwaibwai, ao a na kakabwaiaki Tientaire iaon te aba aio.

11 Ao e na riki te aba aio bwa te aba n inaomata ibukiia Tientaire, ao a na akea te uea iaon te aba aio, aika ana teirake ni kaaitaraia Tientaire.

12 Ao N na kamatoa te aba ni kaitaraia aaba nako.

13 Ao ane e buakana Tion, e na mate, n aron are taekinna te Atua.

14 Bwa ane e katea te uea ni kaitaraai, e na mate, bwa Ngai ae te Uea, ae Uean karawa N na riki bwa aia Uea, ao n riki bwa te oota nakoia n aki toki, nakoia aika a ongo au taeka.

15 Mangaia ae ibukin aio are a na kakoroaki iai bukin au berita aika a tabu ake I a tia ni karaoi nakoia natiia aomata, ake N na karaoi nakoia n te maiu n rabwata, ao N na riai ni kamaunai mwakuri ni karaba aika bwain te roo, ma taian tiritiri, ao mwakuri aika a bati n ribaki.

16 Mangaia are, ane e teirake ni buakana Tion, te Iutaia ke te Tientaire, ke ae te toro ke ae tiaki, ke te mwaane ke te aine; a na mate, bwa bon ngaiia kabekaaun te aonaba; bwa aomata ake tiaki ibukiu bon ngaia kaitarau, n aron are e taekinna te Atua.

17 Bwa N na kakoroi bukin au tuea ake I a tia n taekin nakoia natiia aomata, are N na karaoi nakoia n tain maiuia n rabwata—

18 Mangaia ae tariu aika a tangiraki, e taku te Atua: N na karawataia kanoam i nanon baia Tientaire; e ngae n anne ao N na kamaraua nanoia Tientaire, ao a na riki n ai aroia taama nakoia; mangaia ae a na kakabwaiaki Tientaire ao ni warekaki i buakon te bata are Iteraera.

19 Mangaia e N na katabua te aba aio ibukiia kanoam, ao nakoia naba ake a na warekaki i buakoia kanoam n aki toki, n riki bwa aban rikiia, bwa bon te aba ae rine riki iaoia aaba riki tabeua e taku te Atua nakoiu, mangaia ae N na taraia bwa aomata ni kabane ake a maeka iaon te aba arei a na taromauriai, e taku te Atua.

20 Ao ngkai tariu aika kam tangiraki, n nooran ae e a tia Atuara ae nanoanga n anganiira te atatai ni kaineti ma bwaai aikai, ti riai n uringnga, ao ni kaaki ara bure, ao n aki nou baraaki, bwa ti aki teweaki nako; e ngae n anne ao ti a bon tia ni kaeaki nako man aban rikira; ma ti a tia ni kairaki nakon te aba ae tamaroa riki, bwa e a tia te Uea ni katauraoa marawa bwa kawaira, ao ti a mena iaon te atimwakoro i marawa.

21 Ma e korakora ana kakabwaia te Uea nakoia ake a mena iaon atimwakoron marawa; mangaia are e a taekinaki ikai atimwakoro, ao a mwaiti riki taian aba i rarikin aio, ao a kaainaki naba irouia tarira.

22 Bwa taraia, e a tia te Uea ae te Atua ni kaira nako man te tai teuana nakon teuana te bata are Iteraera, n aron nanona ma kukureina. Ao taraia ngkai, e a uringiia te Uea aomata ni kabane ake a tia ni kairaki nako, mangaia e uringira naba.

23 Mangaia ae kakukurei nanomi ao uringnga bwa kam bon inaomata ni karaoi oin nanomi—n rinea te kawai nakon te mate are aki totoki ke te kawai nakon te maiu ae akea tokina.

24 Mangaia ae tariu aika kam tangiraki, raoiakiningkami nakon nanon te Atua, ao tiaki n aron nanon te riaboro ma te rabwata; ao uringnga, ngkana kam a tia n raoiakiningkami nakonte Atua, bwa bon ti rinanon ana akoi te Atua are kam na kamaiuaki iai.

25 Mangaia ae ke na kautiko te Atua man te mate ni mwaakan te mangauti, ao man te mate ae e aki totoki ni mwaakan te mwakuri ni kamaiu, bwa ko aonga ni butimwaeaki nakon uean te Atua, ae akea tokina, bwa ko aonga n neboia n ana akoi te Atua. Amen.