1 Ug karon, si Jacob namulong og daghan pa nga butang ngadto sa akong katawhan niana nga panahon; apan kini lamang nga mga butang ang akong gipasulat, kay ang mga butang nga akong gisulat igo na alang kanako.

2 Ug karon ako, si Nephi, misulat pa og daghan sa mga pulong ni Isaias, kay ang akong kalag nahimuot sa iyang mga pulong. Tungod kay akong ipahisama ang iyang mga pulong ngadto sa akong katawhan, ug ipadala ko kini ngadto sa tanan nakong mga anak, kay tinuod gayod nga nakakita siya sa akong Manunubos, sama nga ako nakakita kaniya.

3 Ug ang akong igsoon, si Jacob, nakakita usab kaniya sama nga ako nakakita kaniya; mao nga, akong ipadala ang ilang mga pulong ngadto sa akong mga anak aron sa pagpamatuod ngadto kanila nga ang akong mga pulong tinuod. Mao nga, pinaagi sa mga pulong sa tulo, ang Dios miingon, akong pamatud-an ang akong pulong. Bisan pa niana, ang Dios mipadala og dugang pa nga mga saksi, ug iyang gipamatud-an ang tanan niyang mga pulong.

4 Tan-awa, ang akong kalag nahimuot sa pagpamatuod ngadto sa akong katawhan sa katinuod sa pag-anhi ni Kristo; kay, tungod niini nga katuyoan ang balaod ni Moises gihatag; ug ang tanang butang nga gihatag sa Dios ngadto sa tawo, gikan pa sa sinugdanan sa kalibotan, nagsimbolo kaniya.

5 Ug usab ang akong kalag nahimuot sa mga pakigsaad sa Ginoo nga iyang gihimo sa atong mga amahan; oo, ang akong kalag nahimuot sa iyang grasya, ug sa iyang kaangayan, ug gahom, ug kaluoy sa mahinungdanon ug mahangtoron nga plano sa kalingkawasan gikan sa kamatayon.

6 Ug ang akong kalag nahimuot sa pagpamatuod ngadto sa akong katawhan nga gawas kon moanhi si Kristo ang tanang katawhan malaglag gayod.

7 Kay kon walay Kristo walay Dios; ug kon walay Dios wala usab kita, kay wala usab unta ang paglalang. Apan adunay Dios, ug siya si Kristo, ug siya moanhi sa kahingpitan sa iyang kaugalingong panahon.

8 Ug karon akong isulat ang pipila ka pulong ni Isaias, nga kon si kinsa man sa akong katawhan ang makakita niini nga mga pulong unta mobayaw sa ilang mga kasingkasing ug magmaya alang sa tanang katawhan. Karon mao kini ang mga pulong, ug mahimo ninyong ipahiangay kini diha kaninyo ug sa tanang tawo.