1 Ao e koro bukina bwa n ana bong Aati ae natin Iotam, are natin Utia, are uean Iuta, ao e a mwananga Retin are uean Turia, ma Bika are natin Remaria, are uean Iteraera, nako Ierutarem bwa a na buakanna, ma a aki kona ni kataea ana kai.

2 Ao e a tuangaki ana baronga Tawita, ni kangai: E a botaki Turia ma Eberaim. Ao e a rootaki n te maaku, ao a maaku naba ana botanaomata, n aiaron kain te buakonikai ngkana a ukaki n te ang.

3 Ao e taku te Uea nakon Itaia: Nako ngkai ni kaitibo ma Aati; ngkoe ma natim ae Teaiatuba, n tokin te karaanga man te nei are ieta n te kawai are kaan ma aban te tia uatii ni kamaraui kunnikai.

4 Ao ko na kangai nakoina: Tarataraiko, ao tai karongoa; ko na tai maaku, ke n akea angin nanom ibukin tabonritinga aika a bubu aikai ae uaai bukina, ibukin korakoran Retin ma Turia, ma natin Remaria.

5 Ngkai a tia Turia, Eberaim, ao natin Remaria ni booti nanoia i nanon te buakaka bwa a na kaaitarako, ni kangai:

6 Ti na ekaanako Iuta ao karekei kaangaanga nakoina, ao ti na karekea rauren nanoia are ti na kona ni karaoi iai ara waaki, ao ni katea temanna bwa e na uea i buakoia, eng, natin Tabeera.

7 Ma e taku te Uea ae te Atua: E na aki riki, ke ni koro bukina.

8 Bwa atuun Turia bon Tameteko, ao atuun Tameteko bon Retin; bwa i mwaain koron onobwi ma nimaua te ririki ao e na uruaki Eberaim ao e na mauna te botanaomata anne.

9 Ao atuun Eberaim bon Tamaria, ao atuun Tamaria bon natin Remaria. Ngkana ko aki kakoaua aei ao ko na aki kamaiuaki.

10 I rarikin aei ao e a manga taetae riki te Uea nakon Aati ni kangai:

11 Butiia te Uea ae Atuam bwa e na kaota te kanikina; butiia te kanikina iaon te aba ke ieta i karawa.

12 Ma e taku Aati: N na bon aki butiia, ke ni kata te Uea.

13 Ao e kangai: Ko na ongo ngkai, O te bata ae Tawita; e aki tau iroum kakuakia aomata, ma ko kan kakuaa naba Atuau?

14 Mangaia ae e na anganiko te kanikina te Uea—Taraia, e na bikoukou te kibono, ao e na bungia te nati te mwaane, ao e na aranna bwa Emanuera.

15 E na kana te bwata ma ana karewe te manibeeru, bwa e aonga n rabakau n tannako man te buakaka ao n rinea te raoiroi.

16 Bwa i mwaain ae na rabakau te ataei anne n tannako man te buakaka ao n rinea te raoiroi, ao e na kitanaki te aba ae ko ribaia irouia ana uea ni kauoman.

17 Ao te Uea e na karokoi iaom, ao iaoia am botanaomata, ao iaoia kanoan tamam, boong aika a tuai n roko, man te bong are nako iai Eberaim mai Iuta, are uean Aturia.

18 Ao e koro bukina bwa n te bong anne e na katang te Uea ni weteia naango mai aban Aikubita aika raroa, ma manibeeru mai aban Aturia.

19 Ao a na bane n roko, ao a na bane n tiku i nanon mwarua aika kamaroa, ao i nanon bwangabwangan taian bwa, ao iaon kaai aika kateketeke ni kabane, ao iaon buakoako ni kabane.

20 Ao n te bong naba anne, te Uea e na kabongana te mwariro ae kabooaki tangoana, irouna mai mainikun te karaanga, mai iroun uean Aturia, n imana atuum, buraen rangam; ao buaim naba.

21 Ao e na bon koro bukina bwa e na roko te bong are e na nako te aomata ni kamwarakea te kao te teei ma tiibu aika uoman;

22 Ao e na bon koro bukina bwa ruonakon mwaitin te miriki are reke mai irouia ao e na kona ni kang bwata; bwa e na kanaki te bwata ma ana karewe te manibeeru irouia aika maiu iaon te aba.

23 Ao e na bon koro bukina n te bong arei bwa taabo ngkoa aika te ngaa booia ake a maiu iai ngkoa kurebe aika te ngaa mwaitia, a na bane n riki bwa nnen taian kateketeke ma akanta.

24 Ao a na nako mwaane ma aia katebe ao aia kai ni katebe nakon te tabo anne, ngkai e na buta aon te aba anne n te kateketeke ma te akanta.

25 Ao tabuki ni kabane ake ana kenaki n te rereba, a na akea ae e nako iai bwa a maaka te kateketeke ma te akanta; ma e na riki bwa nnen kamwarakeaia taian kao, ao a toutoua aona taian tiibu.