1 Bisan pa niana, ang kangiob dili sama sa nasinati atol sa iyang paghigwaos, nga sa una gaan ra ang iyang gihatag nga kasakit sa yuta sa Zabulun, ug sa yuta sa Neptali, ug pagkahuman niana mihatag og mas bug-at nga kasakit atol sa ilang panaw padulong sa Pulang Dagat tabok sa Jordan sa mga nasod sa Galilea.

2 Ang katawhan nga nagpakabuhi sa kangitngit nakakita og talagsaong kahayag; sila nga nanagpuyo sa yuta sa anino sa kamatayon, kanila ang kahayag midan-ag.

3 Imong gipadaghan ang mga nasod, ug gidugangan ang kalipay—naglipay sila sa imong atubangan sama sa kalipay atol sa ting-ani, ug sama sa kamaya sa mga tawo dihang gibahin na nila ang ilang nailog.

4 Kay imong gibali-bali ang yugo nga iyang pangpas-an, ug ang yayonganan nga tukon sa iyang abaga, ang bunal sa iyang tigpanlupig.

5 Kay ang matag pakig-away sa manggugubat giubanan og alingogngog nga kaguliyang, ug mga sapot nga naumog sa dugo; apan kini magdala og sunog ug makapadilaab nga sugnod.

6 Kay alang kanato ang usa ka bata natawo, alang kanato ang usa ka anak nga lalaki gihatag; ug ang kagamhanan igatungtong sa iyang abaga; ug ang iyang ngalan pagatawagon og Kahibulongan, Magtatambag, Ang Dios nga Makagagahom, Ang Amahan nga walay kataposan, Ang Prinsipe sa Kalinaw.

7 Sa kauswagan sa iyang pangagamhanan ug kalinaw walay kataposan, ibabaw sa trono ni David, ug sa ibabaw sa iyang gingharian, aron sa pagtukod niini, ug aron sa pagtuboy niini gamit ang paghukom ug gamit ang kaangayan sukad karon, gani hangtod sa hangtod. Ang kadasig sa Ginoo sa mga Panon mao ang mohimo niini.

8 Ang Ginoo mipadala sa iyang pulong ngadto kang Jacob ug kini midan-ag sa Israel.

9 Ug ang tanan nga katawhan mahibalo, gani ang Ephraim ug ang mga lumulupyo sa Samaria, nga mibati og garbo ug kamapahitas-on sa kasingkasing:

10 Ang mga bloke nga tisa mangatumpag, apan magtukod kita gamit ang mahalong mga bato; ang mga sicomoro gipamutol, apan ilisan nato kini og mga tugas.

11 Busa ang Ginoo mopahimutang og mga kaaway ni Resin batok kaniya, ug mohiusa sa iyang mga kaaway;

12 Ang mga Sirianhon mag-una ug ang mga Filistehanon maulahi; ug magnganga sila nga molamoy sa Israel. Tungod niining tanan ang iyang kasuko wala mahunong, apan ang iyang kamot nakalugway sa gihapon.

13 Kay ang katawhan dili moduol ngadto kaniya nga misakit kanila, ni sila mangita sa Ginoo sa mga Panon.

14 Busa ang Ginoo moputol gikan sa Israel sa ulo ug sa ikog, sa sanga ug sa bugang sulod lamang sa usa ka adlaw.

15 Ang karaang tawo, siya ang ulo; ug ang propeta nga nagtudlo og mga bakak, siya ang ikog.

16 Kay ang mga pangulo niini nga katawhan mao ang mipahisalaag kanila; ug sila nga ilang gipangulohan gilaglag.

17 Busa ang Ginoo dili malipay sa ilang mga batan-ong lalaki, ni adunay kaluoy sa mga walay amahan ug sa mga biyuda; kay ang matag usa kanila tigpakaaron-ingnon ug tigbuhat og daotan, ug ang matag ba-ba naglitok og binuang. Tungod niining tanan ang iyang kasuko wala mahunong, apan ang iyang kamot nakalugway sa gihapon.

18 Kay ang kadaotan nagdilaab sama sa kalayo; molamoy kini sa mga sampinit ug mga tunok, ug mosunog sa mga kalibonan sa kalasangan, ug mosulbong kini sama sa pagsulbong sa aso.

19 Pinaagi sa kaligutgot sa Ginoo sa mga Panon ang yuta mongitngit, ug ang katawhan mahisama sa sugnod sa kalayo; walay tawo nga moluwas sa iyang igsoon.

20 Ug mangilog siya pinaagi sa tuo niyang kamot ug gutomon; ug mokaon siya gamit ang iyang wala nga kamot ug dili sila mabusog; silang matag usa mokaon sa unod sa iyang kaugalingong bukton—

21 Si Manases, Ephraim; ug si Ephraim, Manases; sila magkauban nga mobatok sa Juda. Tungod niining tanan, ang iyang kasuko wala mahunong, apan ang iyang kamot nakalugway sa gihapon.