1 Mbom hwɛ dodowara wɔ hɔ dɛm da no mu, na mobɔsoɛr ayɛ anwanwadwuma wɔ hɔn mu, ama maakaa m’ahyɛmu no a medzi ama adasamba, dɛ mebɛma me nsa do bio ne mpɛn a otsĩa ebien dze agye mo nkorɔfo a wɔyɛ Israel fifo no;

2 Na afei so, dɛ mebɛkaa anohoba a medze bɔɔ ɔwo, Nephi, na w’egya so no, dɛ mebɛkaa hom asefo; na dɛ hom asefo hɔn nsɛm befi m’anomu akɔ hom asefo hɔ; na me nsɛm bohwira mu edu asaase ano no ho ama aayɛ esusudze ama mo nkorɔfo a wɔyɛ Israel fifo;

3 Na osiandɛ me nsɛm bohwira mu akɔ ntsi—Amanamamfo dodowara bɛse dɛ: Bible! Bible! Yeenya Bible, na Bible biara nnyi hɔ bio.

4 Mbom dɛm na Ewuradze Nyankopɔn se: O nkwasea, wobenya Bible, na obefi Jewfo mu hɔ aba, me tsetse ahyɛmu mba no. Na ebɛn ndaase na wɔdze ma Jewfo no wɔ Bible no a hɔn nsa kã fi hɔn nkyɛn no ho? Nyew, Amanamamfo no kyerɛ dɛn? Ana wɔkaa Jewfo no hɔn awokõ, hɔn ndwumadzen, na hɔn yaw, na hɔn mbɔdzembɔ a wɔbɔe dɛ wɔdze nkwagye bɛbrɛ Amanamamfo no?

5 O hom Amanamamfo, ana hom kaa Jewfo no, me tsetse ahyɛmu mba no? Dabi, mbom hom apaa hɔn, na hom atan hɔn, na hom ammpɛ dɛ hom bɔhwehwɛ hɔn. Mbom hwɛ, medze ndzɛmba yi nyinara bɛsan egu hom tsir do; osiandɛ emi Ewuradze mo werɛ mmfir mo dɔm.

6 Hom nkwaseafo a hom bɛkã dɛ: Bible, yeenya Bible na yennhia Bible bio. Ana hom wɔ Bible bi kã Jewfo dze no ho?

7 Ana hom nnyim dɛ amanaman a ɔwɔ hɔ no hɔn dodow bor kor? Ana hom nnyim dɛ Emi, Ewuradze hom Nyankopɔn, na mabɔ adasa nyina, na dɛ mekaa hɔn a wɔwɔ po nsupruw nyina na dɛ Emi na midzi hen wɔ ɔsorsor nye asaase ase nyina; na medze me nsɛm ma adasamba, nyew, medze ma amanaman a wɔwɔ asaase yi nyina do mpo?

8 Dɛm ntsi hom hwinhwin, osiandɛ hom benya m’asɛm mbordo ntsi? Ana hom nnyim dɛ aman ebien hɔn dasegye dzi dase kyerɛ hom dɛ meyɛ Nyame, dɛ mekaa ɔman kor dɛ mbrɛ mekaa kor so? Dɛm ntsi nsɛm a mekã kyerɛ ɔman kor no ara na mekã kyerɛ kor so: Na aber a aman ebien no bɔbɔmu ayɛ kor no aman ebien hɔn dasegye so bɛyɛ kor.

9 Na meyɛ iyi ama ada edzi pefee akyerɛ dodowara dɛ metse dɛm ndeda, ndɛ na afebɔɔ; na mekã m’asɛm wɔ mankasa me pɛ do. Na osiandɛ makã asɛm kor ntsi mma hom nnsusu dɛ murunntum nnkã kor so; osiandɛ m’edwuma da ho ara ɔremmba ewiei; nna ɔremmba ewiei so ekodu dɛ nyimpa ne bra aba ewiei ana, nna nnyɛ dɛ ofitsi dɛm aber no na afebɔɔ.

10 Dɛm ntsi, osiandɛ hom wɔ Bible no ntsi, onnyi dɛ hom susu dɛ me nsɛm nyina wɔ mu; nna onnyi dɛ hom susu dɛ mamma kwan ma wɔannkyerɛw pii.

11 Na mehyɛ nyimpa nyina, hɔn a wɔwɔ boka, nye anee afamu nyina, nye etsifi na anaafo nyina, nye hɔn a wɔwɔ po nsupruw do, dɛ wɔnkyerɛw nsɛm a mekã kyerɛ hɔn no; na nwoma a wɔbɛkyerɛw no na mobɔhwɛ ho ebu wiadze atsɛn, obiara dɛ mbrɛ no ndwuma tse, dɛ mbrɛ wɔakyerɛw no.

12 Na hwɛ, mebɛkasa akyerɛ Jewfo no na wɔbɛkyerɛw, na mebɛkasa akyerɛ Nephifo so na wɔbɛkyerɛw; na mebɛkasa akyerɛ ebusuakuw binom so a wɔyɛ Israel fifo a meyi hɔn efi hɔ kɔ no na wɔbɛkyerɛw; na mebɛkasa so akyerɛ aman nyina a wɔwɔ asaase yi do na wɔbɛkyerɛw.

13 Na ɔbɛba dɛ Jewfo benya Nephifo hɔn nsɛm, na Nephifo benya Jewfo hɔn nsɛm; na Nephifo nye Jewfo benya Israel ebusuakuw a ayew no hɔn nsɛm; na Israel ebusuakuw a ayew no benya Nephifo nye Jewfo no hɔn nsɛm.

14 Na ɔbɛba dɛ mo nkorɔfo a wɔyɛ Israel fifo no, wɔbɔboaboa hɔn ano akɔ fie wɔ hɔnara hɔn asaase do; na m’asɛm so wɔbɔboaboa ano ayɛ no kor. Na mebɛkyerɛ hɔn a wɔkõ tsia m’asɛm na wotsia mo nkorɔfo a wɔyɛ Israel fifo no, dɛ meyɛ Nyame na dɛ Emi na menye Abraham dzii ahyɛmu dɛ mebɛkaa n’asefo afebɔɔ.