1 Man riqʼuin vi riʼ, xa kitzij chi chupan ri kʼij riʼ, yin xtinben jun samaj chiquicojol rijeʼ ri xtiquimey. Jariʼ, richin ninkʼalajirisaj chi man numestan ta ri nucʼulanen tzij ri nubanon can quiqʼuin ri calcʼual ri achiʼaʼ. Xucʼul riʼ ri katzij richin xtinyuk chic nukʼaʼ chique rijeʼ rucaʼn mul, richin xquentzolij pe chic ri nuvinak, ri e aj rujayul ri Israel.

2 Que cʼa chukaʼ riʼ, man numestan ta ri nusujun chave rat Nefi y chukaʼ chire ri atataʼ. Nusujun cʼa chive chi xtinnataj cʼa ri ivijaʼtzul, y chi ri quichʼabel ri ivajaʼtzul xtel cʼa el pa nuchiʼ yin chique ri chʼakaʼ chic ivijaʼtzul. Ri nuchʼabel yin xquechʼabalix cʼa chuvech chijun re ruvachʼulef richin chi xticʼojeʼ cʼa jun retal chiquivech ri nuvinak ri e aj rujayul ri Israel.

3 Roma cʼa ri nuchʼabel xquechʼabalix el, can e qʼuiy vi chique ri Gentiliʼ xtiquibij quereʼ: ¡Jun Lokʼolej Vuj! ¡Jun Lokʼolej Vuj! ¡Can cʼo vi can chic kiqʼuin roj jun Lokʼolej Vuj, y manek banel richin ta cʼo jun chic Lokolej Vuj!

4 Man riqʼuin vi riʼ, quereʼ nubij ri Ajaf Dios: Can e nacanuc vi rijeʼ. Kitzij cʼa chi xticʼojeʼ quiqʼuin rijeʼ jun Lokʼolej Vuj. Riʼ elenek cʼa pe quiqʼuin ri e aj Judá, ri ojer nuvinak yin achojiqʼuin xinben vi ri cʼulanen tzij. ¿Achique cami cʼa ri tioxbel niquiyaʼ rijeʼ chique ri e aj Judá roma ri Lokʼolej Vuj ri xquicʼul quiqʼuin? ¿Achique cami cʼa nicajoʼ ta niquibij ri Gentiliʼ riqʼuin reʼ? ¿La nokaʼ cami chiquicʼuʼx rijeʼ ri quibiyinen, y ri quisamaj, y ri quikʼaxomal ri xquicʼovisaj ri e aj Judá tok can xquitij vi quikʼij richin chi xequitijoj ri Gentiliʼ chire ri colotajic?

5 Rix Gentiliʼ, ¿la e inatan cami jubaʼ rix ri e aj Judá ri can je vi rijeʼ ri ojer nuvinak yin? Mani. Xa icʼajisan quivech, y e ivetzelan, y man irayin ta chic yeʼitoʼ. Yin xa can xquentzolij vi cʼa conojel reʼ pan iviʼ rix, roma yin ri Ajaf man numestan ta ri nuvinak.

6 Rix ix nacanuc ri nibij quereʼ: Jun Lokʼolej Vuj, can cʼo vi can chic kiqʼuin roj jun Lokʼolej Vuj, y manek chic nicʼatzin ta chike jun chic Lokʼolej Vuj. ¿La cʼo ta cami iviqʼuin rix jun Lokʼolej Vuj vi man ta coma ri e aj Judá?

7 ¿La man ivetaman ta cami chi man xaxe ta jun tinamit cʼo? ¿La man ivetaman ta chi yin ri Ajaf i Dios e nutzʼucun conojel vinakiʼ, y man yenmestaj ta ri e cʼo chiquivech ri chʼitiʼ tak ruvachʼulef chupan ri nimalej yaʼ? ¿La man ivetaman ta cʼa chi yin yinajavarisan pa ri caj y chukaʼ cʼa chuvachʼulef, y nincʼuaj ri nuchʼabel chique ri calcʼual ri achiʼaʼ ri e cʼo pa conojel ri tinamit chuvech chijun re ruvachʼulef?

8 ¿Achique cʼa roma tok yixxebeloj roma cʼo chi xticʼul chʼakaʼ chic nuchʼabel? ¿La man ivetaman ta chi ri jiquibanic quichin caʼiʼ tinamit can niquickʼalajirisaj vi chivech rix chi yin in Dios, y chi yin ninnataj ri jun tinamit achiʼel cʼa ri jun chic? Roma cʼariʼ tok ninchʼabalij ri chʼabel chire ri jun tinamit junan riqʼuin ri ninchʼabalij chire ri jun chic. Cʼariʼ, tok ri caʼiʼ tinamit xtiquitun quiʼ, jariʼ tok ri jiquibanic quichin ri caʼiʼ tinamit xtiquitun quiʼ chukaʼ.

9 Ninbij cʼa queriʼ richin ninkʼalajirisaj chivech chi yin xa in junan ivir, vacami, y benek ruvech apon, y chukaʼ chi ninbij cʼa ri nuchʼabel achiʼel ri ninvajoʼ yin. Xa roma cʼa nubin can jun chʼabel, man rucʼamon ta chi rix ninojij chi man yitiquir ta ninbij jun chic chʼabel. Ri nusamaj yin xa manjani tiqʼuis cʼa, y can man xtiqʼuis ta vi, cʼa tok xtiqʼuis ri achin, y chukaʼ man xtiqʼuis ta pe chiriʼ, ni ta chukaʼ jumul y benek ruvech.

10 Roma cʼariʼ, xa roma cʼo chic iviqʼuin rix jun Lokʼolej Vuj man rucʼamon ta chi ninojij chi e rucʼuan cʼa checonojel ri nuchʼabel. Man rucʼamon ta chukaʼ ninojij chi man nubanon ta chi e tzʼibatajinek can chʼakaʼ chic.

11 Roma cʼariʼ, yin ninbij chique ri achiʼaʼ pa ri relebal kʼij, y pa ri rukajibal kʼij, y chukaʼ pa ri rajquikʼaʼ kʼij, y pa ri rajxocon kʼij, y pa ri chʼitiʼ tak ruvachʼulef chupan ri nimalej yaʼ, chi rijeʼ tiquitzʼibaj cʼa ri chʼabel ri ninbij chique. Roma can quiqʼuin vi ri vuj ri xquetzʼibatej can, yin xtinkʼet cʼa tzij pa quiviʼ ri e aj re ruvachʼulef, chiquijujunal ri vinakiʼ chiquij cʼa ri quibanobal, junan riqʼuin ri tzʼiban can.

12 Roma can kitzij vi, yin xquichʼo quiqʼuin ri e aj Judá y rijeʼ xtiquitzʼibaj can ri nuchʼabel. Xquichʼo chukaʼ quiqʼuin ri Nefiʼiʼ y chukaʼ rijeʼ xtiquitzʼbaj can. Xquichʼo cʼa chukaʼ quiqʼuin ri chʼakaʼ chic rijaʼtzul ri rujayul ri Israel, ri e nucʼuan cʼa el, y rijeʼ chukaʼ xtiquitzʼibaj can. Chukaʼ xquichʼo cʼa quiqʼuin conojel ri tinamit chuvech re ruvachʼulef y rijeʼ xtiquitzʼibaj can chukaʼ.

13 Cʼariʼ xticʼulvachitej chi ri e aj Judá xtiquicʼul ri chʼabel quichin ri Nefiʼiʼ, y ri Nefiʼiʼ xtiquicʼul ri chʼabel quichin ri e aj Judá. Ri Nefiʼiʼ y ri e aj Judá chukaʼ xtiquicʼul ri chʼabel quichin ri ijaʼtzul richin ri Israel ri e sachinek. Cʼariʼ chukaʼ, ri ijaʼtzul richin ri Israel ri e sachinek xtiquicʼul ri chʼabel quichin ri Nefiʼiʼ y ri e aj Judá.

14 Cʼa cʼariʼ, xticʼulvachitej chi ri nuvinak ri e aj rujayul ri Israel xquemol pe chic chupan ri ruvachʼulef acuchi cʼo vi ri quichin rijeʼ. Ri nuchʼabel xtimol cʼa pe chukaʼ y xe jun xtumol cʼa pe chukaʼ y xe jun xtuben. Cʼariʼ, xtincʼut chiquivech ri niquipabaʼ quiʼ chuvech ri nuchʼabel, y chiquivech cʼa ri nuvinak ri e aj rujayul ri Israel, chi ja yin in Dios y chi yin xinben jun cʼulanen tzij riqʼuin ri Abraham chi cʼo chi xtinnataj ri rijaʼtzul rijaʼ benek ruvech.