Ri Rucaʼn Vuj richin ri Nefi

1 Xcʼulvachitej cʼa chi yin Nefi xitaneʼ chiquitijoxic ri nunimal. Ri katataʼ Leʼi qʼuiy xutzijoj chique rijeʼ chukaʼ. Xubij chique rijeʼ ri janíla ri xuben ri Ajaf pa quiviʼ tok xerelesaj pe pa ri ruvachʼulef Jerusalem.

2 Rijaʼ xtzijon cʼa chirij ri coyoval rijeʼ tok e cʼo pa ruviʼ ri yaʼ. Chukaʼ xutzijoj chi ri Dios xujoyovaj quivech tok xerucol y man xejikʼ ta chupan ri nimalej yaʼ.

3 Chukaʼ rijaʼ xtzijon quiqʼuin rijeʼ chirij ri ruvachʼulef sujun can ri quilon cʼa chic. Chukaʼ xubij chi ri Ajaf janíla xujoyovaj kavech tok xubij chike chi kojanimej el pa ri ruvachʼulef Jerusalem.

4 Rijaʼ xubij cʼa quereʼ: Can kitzij vi, yin nutzʼeton jun tzʼetonic. Pa ri tzʼetonic riʼxinnabej chi ri Jerusalem xa vulatajinek cʼa chic. Vi ta xojcʼojeʼ can pa Jerusalem, xojcom ta cʼa roj chukaʼ.

5 Stapeʼ cʼa roj e kacʼovisan pokon, can xkil vi ri ruvachʼulef sujun can, xchaʼ rijaʼ. Re ruvachʼulef reʼ janíla jebel chiquivech ri chʼakaʼ chic ruvachʼulef. Ri Ajaf rubanon jun cʼulanen tzij viqʼuin yin chi jareʼ jun ruvachʼulef ri xtiquichinaj ri vijaʼtzul. Ri Ajaf rusujun cʼa re ruvachʼulef reʼ chuve yin y chique ri valcʼual benek ruvech. Chukaʼ rusujun chique ri juley chic ri xqueʼelesex pe pa chʼakaʼ chic ruvachʼulef roma ri rukʼaʼ ri Ajaf.

6 Roma cʼariʼ, yin Nefi ninyaʼ lokʼolej rutzijol junan riqʼuin ri nubij ri Uxlabel ri cʼo viqʼuin. Ninbij cʼa chi man xtipe ta manjun, vi man ta xticʼamer pe roma ri rukʼaʼ ri Ajaf.

7 Roma cʼariʼ, re ruvachʼulef reʼ turusan can chique ri xqueruqʼuen pe ri Ajaf. Vi rijeʼ xtiquisamajij cʼa ri Ajaf, achiʼel cʼa ri pixaʼ ri e ruyaʼon can rijaʼ chique, re ruvachʼulef reʼ xtoc jun ruvachʼulef richin solcolpitajic. Roma cʼariʼ tok manjun bey xqueʼucʼuex ka pa ri tzʼapitajic. Xaxe cʼa vi xtiquiben ri itzel, xqueʼucʼuex cʼa ka pa ri tzʼapitajic. Vi janíla xtiquiben cʼa ri itzel xtetzelex cʼa can re ruvachʼulef chiquivech rijeʼ. Vi rijeʼ e choj, re ruvachʼulef xtiturusex benek ruvech chique.

8 Can kitzij vi chi jun utzilej naʼoj banon can, richin chi ri chʼakaʼ chic tinamit man niquinabej ta re ruvachʼulef reʼ vacami. Rijeʼ xa xtiquiquiraj ta quiʼ chuvech re ruvachʼulef, cʼa tok manek chic cʼojlibel richin niquichinaj.

9 Que cʼariʼ, ri Ajaf Dios quereʼ rusujun can chuve yin Leʼi: Vi rijeʼ ri yeruqʼuen pe rijaʼ pa ri ruvachʼulef Jerusalem xquequitakej ri rupixaʼ, xqueqʼuiyer cʼa chuvech re ruvachʼulef reʼ. Queriʼ cʼa, rijeʼ xquechajix chiquivech ri chʼakaʼ chic ruvachʼulef richin queriʼ xaxe cʼa quichin rijeʼ re ruvachʼulef reʼ. Vi yequitakej ri rupixaʼ ri Ajaf, can xqueturusex vi cʼa chuvech re ruvachʼulef reʼ. Chiriʼ cʼa, manjun xtinakon quichin rijeʼ, ni ta chukaʼ xtimajon el ri ruvachʼulef quichinan. Utz xquecʼojeʼ cʼa can chiriʼ benek ruvech.

10 Cʼa cʼariʼ, tok napon cʼa ri kʼij tok nibiyin quiyojic y man niquinimalaʼ ta chic, jariʼ tok xtipe ka pa quiviʼ ri cʼajisabel ri xtuben rijaʼ ri can choj vi. Rijeʼ e quicʼulun chic qʼuiy turusanic pa rukʼaʼ ri Ajaf. Quetaman cʼa chic chirij ri rutzʼuquic re ruvachʼulef y ri quitzʼuquic conojel ri vinakiʼ. Chukaʼ quetaman cʼa chic chirij ri nimalej y meyel rusamaj ri Ajaf pa tok xtzʼucutej pe re ruvachʼulef. Chukaʼ cʼa, yaʼon chic uchukʼaʼ chique rijeʼ richin queriʼ yetiquir niquiben ronojel riqʼuin ri quicukubabel cʼuʼx. Chukaʼ conojel ri rupixaʼ, pa tok rutiquiribel pe, e cʼo quiqʼuin. Roma cʼa ri junelic rutzil ri Ajaf, rijeʼ e cʼamon vi pe pa re jebelilej ruvachʼulef sujun can. Can kitzij vi cʼa ninbij chive chi vi xtapon ri kʼij tok rijeʼ xtiquixovaj ri Lokʼolaxel richin ri Israel, ri kitzij Mesías, ri Lokʼolej Quelesanel, y ri qui Dios, jariʼ tok ri cʼajisabel ri xtuben ri jun ri can choj vi, xtipe ka pa quiviʼ.

11 Ja cʼariʼ tok rijaʼ xqueruqʼuen pe quiqʼuin rijeʼ chʼakaʼ chic nimalej tak tinamit. Cʼariʼ rijaʼ xtuyaʼ uchukʼaʼ chique ri e petenek, y xtumej cʼa el chiquivech ri e cʼo vaveʼ ri culef quichin ri quibeyomal. Cʼa cʼariʼ, xtuben chi xquequiratej y xquesocotej.

12 Tok xquecʼovisalan cʼa el e qʼuiy junaʼ, xquecʼojeʼ camisanic y nimalej vulatajic chiquicojol rijeʼ. Roma cʼariʼ, nucʼajol, ninvajoʼ chi ronojel reʼ nokaʼ cʼa chiʼicʼuʼx. Ninvajoʼ cʼa chi ninimaj ri nuchʼabel.

13 Ja ta cʼa quixcʼastej pa ri jun nimalej varan. Ja varan riʼ richin ri xibalbay. Ja ta cʼa queʼitotaj el ri ximibel achojiqʼuin ix ximon vi. Ja ximibel riʼ ri yequixim ri calcʼual ri achiʼaʼ, richin chi yeʼucʼuex el e chapon ka pa ri cʼojlibel richin ri junelic kʼaxomal y tʼujtubel cánima.

14 Quixcʼastej y quixyacatej pa ri pokolaj y queʼivacʼaxaj ri ruchʼabel ri jun rijilej tataʼaj ri nicʼaracʼot chic. Re tataʼaj reʼ man nej ta chic apon xticotzʼobaʼ pa ri tef y ri silan rumukubal. Chiriʼ cʼa, manjun biyajnel nitzʼolin pe chic. E jubaʼ chic kʼij apon, xtintzekelbej el ri bey quichin conojel ri e aj re ruvachʼulef.

15 Man riqʼuin vi riʼ, ri Ajaf can in relesan vi pe pa ri xibalbay. Nutzʼeton cʼa rucʼojlemal rijaʼ. Ri Ajaf yirukʼetej benek ruvech riqʼuin ri rukʼa ri rajovabal.

16 Ninvajoʼ cʼa chi yeʼitakej ri pixabanic y ri Kʼatoj tzij richin ri Ajaf. Jareʼ cʼa ri rurayin ri vánima, pa rutiquiribel pe.

17 Kʼaxovinek cʼa nucʼuʼx binakel roma ri nubis. Nuxibin viʼ roma ri rucovil ivánima. Riqʼuin cʼa jubaʼ ri Ajaf ri i Dios xtipe chivij riqʼuin chinojel ri royoval rijaʼ. Riqʼuin cʼariʼ, xquixelesex cʼa el y xquixvulatej cʼa jumul.

18 Riqʼuin cʼa jubaʼ jun etzelanic xtipe chivij rix chiquij cʼa ri iyaj mamaj ivijaʼtzul. Cʼa cʼariʼ, xquixsocotej riqʼuin ri tzaqʼuibel y xtipe ivayijal. Xquixetzelex cʼa y xquixcʼuex el, xa achiʼel cʼa ri rurayibal ri itzel vinek y ri ruchapitajic ri nuben rijaʼ.

19 Ja ta cʼa, nucʼajol, chi man ta xquepe ronojel reʼ chivij rix, xa ta yixoc na jun vinakul chaʼon y turusan roma ri Ajaf. Man riqʼuin vi riʼ, can tiban cʼa ri rurayibal rijaʼ, roma xa choj ri rubeyal benek ruvech.

20 Rijaʼ rubin cʼa cʼa can quereʼ: Vi yeʼitakej cʼa ri nupixaʼ, can xquixqʼuiyer vi pa ri ruvachʼulef. Vi xa man yeʼitakej ta cʼa ri nupixaʼ, can xquixelesex vi el viqʼuin yin.

21 Quixyacatej cʼa pe, nucʼajol, chupan ri pokolaj y quixoc achiʼaʼ. Titijaʼ cʼa ikʼij riqʼuin jun inojibal y jun ivánima. Titunubaʼ cʼa iviʼ riqʼuin ronojel ri utz, richin chi man yixchap ta ka. Que ta reʼ, ri vánima xtiquicot ta iviqʼuin y xticʼojeʼ ta quicoten pa nucʼuʼx tok xquinel el pa re ruvachʼulef reʼ. Que ta cʼareʼ chukaʼ, man ta xquinucʼuex cʼa ka pa ri mukubel riqʼuin bis y kʼaxomal pa vánima.

22 Can tibanaʼ cʼa queriʼ, richin chi man ta xquixetzelex cʼa riqʼuin jun nimalej etzelanic. Quereʼ cʼa chukaʼ, man xtiqʼuen ta ka chive ri royoval ri jun Dios can choj vi, cʼa pa ri ivulatajic. Can ja vi reʼ ri jumul vulatajic quichin ri cʼaslemal y ri chʼaculaj.

23 Quixcʼastej cʼa nucʼajol y ticusaj ri toʼbel richin ri chojmilal. Queʼitotaj el ri ximibel achojiqʼuin ix ximon vi. Quixel pe pa ri kʼekuʼm y quixyacatej pe pa ri pokolaj.

24 Man tipabaʼ chic iviʼ chuvech ri ichakʼ. Janíla e jebel ri xekʼalajirisex chuvech y rijaʼ can e rutaken vi ri pixaʼ tok xojel pe pa Jerusalem. Rijaʼ oquinek jun samajibel pa ri rukʼaʼ ri Dios richin chi yojruqʼuen pe pa ri ruvachʼulef sujun can. Vi man ta xcʼoje rijaʼ, xojcom ta roma vayijal pa ri tolan ruvachʼulef. Man riqʼuin vi cʼariʼ, rix irayin nicamisaj rijaʼ. Rijaʼ yalan xbison cʼa ivoma rix.

25 Janíla ninxibij viʼ y yicʼaracʼot, roma riqʼuin cʼa jubaʼ xtutij chic pokon ivoma rix. Rix ikʼaban chirij rijaʼ y ibin chi rijaʼ xucanoj ruchukʼaʼ y ri rukʼatbel tzij pan iviʼ rix. Vaveʼ cʼa, yin vetaman chi rijaʼ man rurayin ta ri uchukʼaʼ y ri kʼatbel tzij pan iviʼ rix. Rijaʼ can xaxe vi rurayin ri rucʼojliemal ri Dios y ris junelic rutzil ivech rix.

26 Rix ix xebelovinek chirij rijaʼ, roma can cof vi chʼovinek can iviqʼuin. Nibij chi rijaʼ cof chʼovinek chic iviqʼuin, y chi petenek chic ri royoval chivij. Man riqʼuin vi riʼ, xa kitzij chi ri rucovil ri rutzij rijaʼ, can ja covil riʼ richin ri ruchukʼaʼ ri ruchʼabel ri Dios ri cʼo riqʼuin. Ri achique rix nibij oyoval chire, xa can ja vi riʼ ri kitzij. Riʼ junan riqʼuin ri kitzij ri cʼo riqʼuin ri Dios. Ri ichakʼ man xtiquir ta xrevej ri kitzij riʼ tok xerukʼalajirisaj ri ivetzelal rix.

27 Cʼo cʼa chi ri ruchukʼaʼ ri Dios nicʼ ojeʼ riqʼuin rijaʼ, richin queriʼ yixrupixabaj cʼa chi tinimaj tzij. Vaveʼ cʼa, xa man ja ta rijaʼ ri xbanon cʼa chi xchʼo. Xa can ja vi ri Ruxlabal ri Ajaf ri cʼo riqʼuin, ri xbanon chi cʼo chi xchʼo iviqʼuin y chi man xtiquir ta xukʼil riʼ.

28 Vacami cʼa, yichʼo chave rat Laman, nucʼajol, y chukaʼ chive rix Lemuel y Sam y chive rix nucʼajol ri can ix rucʼajol vi ri Ismael. Vacami cʼa, vi rix ninimaj ri nubij ri Nefi, xa man xquixsach ta cʼa. Vi xtinimaj ri nubij rijaʼ, ninyaʼ cʼa can jun nuturusanic pan iviʼ. Ja cʼariʼ ri nabey nuturusanic.

29 Vi xa man xtinimaj ta ri nubij rijaʼ, jariʼ tok xtinvelesaj cʼa el iviqʼuin rix ri nabey nuturusanic y xticʼojeʼ cʼa can pa ruviʼ rijaʼ.

30 Vacami cʼa, yichʼo aviqʼuin rat, Zoram. Kitzij chi rat ri at rusamajel ri Laban. Man riqʼuin vi riʼ, rat xacʼamer pe pa ri ruvachʼulef Jerusalem. Vetaman cʼa chi rat at jun choj rachibil ri nucʼajol Nefi benek ruvech.

31 Rat can at choj vi. Roma cʼariʼ, ri avijaʼtzul rat xtiturusex riqʼuin ri rijaʼtzul rijaʼ. Rijeʼ xqueyaloj pa quiqʼuiyirinen chuvech re ruvachʼulef reʼ. Can xaxe vi ri itzel quibanobal xquepaban o xqueyojon richin ri quiqʼuiyirinen junelic chuvech re ruvachʼulef.

32 Ri Ajaf ruturusan cʼa can re ruvachʼulef reʼ, richin chi manjun xtinakon quichin ri avijaʼtzul riqʼuin ri rijaʼtzul ri nucʼajol. Roma cʼariʼ, vi yeʼatakej ri rupixaʼ ri Ajaf, can que vi riʼ xtibanatej chave.