1 Can kitzij vi, xcʼulvachitej chi yin Nefi janíla xichʼo akʼanij riqʼuin ri Ajaf nu Dios, roma ri coyoval ri nunimal.

2 Man riqʼuin vi riʼ, ri coyoval rijeʼ chuvij xa xnimer. Jariʼ tok xquitij quikʼij richin yinquicamisaj.

3 Rijeʼ xexebeloj cʼa chuvij y quereʼ xquibij: Ri kachakʼ nrajoʼ nucʼ uaj kabey. Roj kacʼovisan cʼa qʼuiy cʼayeval roma rijaʼ. Tikacamisaj cʼa richin chi man yojquinek ta chic ri ruchʼabel. Can kitzij vi chi roj man xtikayaʼ ta kʼij richin chi rijaʼ xtoc ri ucʼuey kabey. Roma cʼa xa ja roj ri oj nimalaxelaʼ oj rucʼamon richin nikakʼet tzij pa quiviʼ re vinakiʼ reʼ.

4 Vaveʼ cʼa, yin man nintzʼibaj ta chuvech re xaxilej tak chʼichʼ reʼ ronojel ri xquixebelaʼ chuvij. Xa utz cʼa chi ninbij chi xquirayij xinquicamisaj.

5 Xcʼulvachitej cʼa chi ri Ajaf xirupixabaj chi yin Nefi quinel cʼa el quiqʼuin rijeʼ, y quinanimej cʼa pa ri tolan ruvachʼulef quiqʼuin conojel ri xcajoʼ xebe viqʼuin.

6 Xcʼulvachitej cʼa chi yin Nefi xinmol ri nuchinamit y chukaʼ ri Zoram riqʼuin ri ruchinamit rijaʼ y ri nunimal Sam riqʼuin ri ruchinamit rijaʼ. Chukaʼ xenmol ri nuchakʼ Jacob y José y chukaʼ ri vanaʼ, y conojel chic ri xcajoʼ xebe viqʼuin. Ri xcajoʼ xincachibilaj, je cʼa rijeʼ ri xequinimaj ri pixabanic y ri kʼalajirisanic richin ri Dios. Roma cʼariʼ xquinimaj ri nuchʼabel yin.

7 Xkaqʼuen cʼa pe ri kamoʼc y ronojel chic ri xojtiquir. Cʼa cʼariʼ, xojbiyin qʼuiy kʼij chupan ri tolan ruvachʼulef. Tok ob biyirinek chic qʼuiy kʼij, xkaben ri kamoʼc.

8 Ri nuvinak xcajoʼ cʼa chi xkayaʼ ri rubiʼ ri cʼojlibel riʼ Nefi. Roma cʼariʼ, ja Nefi ri rubiʼ xkayaʼ chire.

9 Conojel ri in cachibilan xquibiniʼaj quiʼ ri ruvinak ri Nefi.

10 Xkatij cʼa kakʼij richin yekatakej chi utzil conojel ri kʼatoj tzij y ri pixabanic y ri pixaʼ richin ri Ajaf, achiʼel cʼa ri nubij ri rupixaʼ ri Moisés.

11 Ri Ajaf cʼo kiqʼuin y janíla xojbeyomirisex. Xojticon cʼa, y tok xmolotej ri katicoʼn, can janíla vi qʼuiy xuyaʼ. Xkachop quiqʼuiytisaxic kʼataj chicopiʼ y molaj chicopiʼ y conojel ruvech chicopiʼ.

12 Yin Nefi chukaʼ xenqʼuen pe ri retal banobel ri e tzʼibatel can chuvech ri xaxilej tak cʼakoʼj chʼichʼ. Chukaʼ xinqʼuen pe ri sirisic chʼichʼ o ri cʼutbel bey ri xunucʼ ri Ajaf richin ri nataʼ, achiʼel cʼa nubij ri tzʼiban can.

13 Xcʼulvachitej cʼa chi janíla xojbeyomirisex y xojvinaker chupan ri ruvachʼulef riʼ.

14 Yin Nefi xinqʼuen pe ri tzaqʼuibel richin ri Laban y xenben qʼuiy tzaqʼuibel ri junan quibanic riqʼuin. Roma riqʼuin cʼa jubaʼ, ri vinakiʼ ri quibiniʼan ri Lamaniʼ xquepe ka chikij y xkojquicamisaj. Yin vetaman chi can xinquetzelaj vi yin, y xequetzelaj ri valcʼual y chukaʼ ri chʼakaʼ chic ri quibiniʼan ri nuvinak yin.

15 Xentijoj cʼa ri nuvinak richin xquipabaʼ nimalej jay. Chukaʼ xentijoj richin xequisamajij conojel ruvech cheʼ, y covilej chʼichʼ, y buyul kʼana chʼichʼ, y cʼakoʼj chʼichʼ, y chaʼon chʼichʼ, y kʼana chʼichʼ, y saka chʼichʼ, y jebel tak chʼichʼ ri janíla e cʼo chiriʼ.

16 Yin Nefi, xinpabaʼ jun lokʼolej runimajay ri Ajaf junan jubaʼ ri rubanic riqʼuin ri lokʼolej runimajay ri Ajaf ri xupabaʼ ri Salomón. Xa man xpabex ta riqʼuin janíla beyomal, roma xa e manek chupan re ruvachʼulef reʼ. Roma cʼariʼ, manek banel richin xpabex ta can achiʼel vi ri lokʼolej rachoch ri Ajaf ri xuben ri Salomón. Man riqʼuin vi riʼ, ri rubaniquil junan jubaʼ riqʼuin ri xuben ri Salomón y can jebel vi ri rusamajixic.

17 Xcʼulvachitej cʼa chi yin Nefi xinben chi ri nuvinak xesamej chi utzil y chi xesamej riqʼuin ri quikʼaʼ.

18 Xcʼulvachitej cʼa chi rijeʼ xcajoʼ chi yin xinoc ri rutataʼal ri quitinamit. Chiriʼ cʼa, yin Nefi man xinvajoʼ ta chi cʼo jun rutataʼal ri tinamit. Man riqʼuin vi riʼ, xinben achique ri xitiquir coma rijeʼ.

19 Can kitzij vi cʼa chi ri ruchʼabel ri Ajaf chique ri nunimal can xkʼajer vi. Xubij cʼa rijaʼ chi yin xquinoc ri ucʼuey quibey y ri quitijonel. Can que vi cʼariʼ, ja yin ri ucʼuey quibey y ri quitijonel, achiʼel cʼa ri xuchilabej ri Ajaf chuve. Queriʼ xinben, cʼa pa ri kʼij tok xcajoʼ xinquicamisaj.

20 Que cʼari, xkʼajer ri ruchʼabel ri xubij can ri Ajaf chuve. Queriʼ cʼa xubij chuve: Vi rijeʼ man xtiquinimaj ta ri achʼabel, xa xqueʼelesex cʼa el riqʼuin ri Ajaf. Vaveʼ cʼa, rijeʼ can xeʼelesex vi el riqʼuin rijaʼ.

21 Rijaʼ xuben cʼa chi jun etzelanic xkaʼ pa quivi roma ri itzel quibanobal, y can cʼayef vi ri etzelanic riʼ. Rijeʼ xquicovirisaj ri cánima chirij ri Ajaf. Jariʼ tok xeʼoc junan jubaʼ riqʼuin jun covilej abej. Tok rubanon can, rijeʼ e sek, y janíla e jebel, y utz yevachin. Man riqʼuin vi riʼ, ri Ajaf Dios xuben chi kʼek xuben ri quitzʼumal, richin queriʼ man yekaʼ ta chiquivech ri nuvinak yin.

22 Quereʼ cʼa nubij ri Ajaf: Vi rijeʼ man nitzolin ta pe quicʼuʼx chupan ri itzel quibanobal, yin xtinben chique chi can itzel vi yevachin chiquivech ri avinak rat.

23 Xqueʼetzelex cʼa chukaʼ ri rijaʼtzul ri xtixolon quiqʼuin ri quijaʼtzul rijeʼ. Rijeʼ xqueʼetzelex cʼa riqʼuin jun etzelanic can junan vi. Queriʼ cʼa xubij ri Ajaf, y can xbanatej vi.

24 Roma cʼa ri etzelanic ri xkaʼ pa quiviʼ, rijeʼ xeʼoc jun kʼoralej vinek, y e nojinek riqʼuin itzel y novinek naʼoj. Rijeʼ xequicanoj cʼa ri camisanelaʼ tak chicopiʼ pa ri tolan ruvachʼulef.

25 Quereʼ cʼa ri Ajaf xubij chuve: Rijeʼ xqueʼoc jun nakonbel chiquivech ri avijaʼtzul rat richin chi xquequikʼakʼirisaj rijeʼ richin queriʼ xquinquinataj. Queriʼ cʼa, vi ri avijaʼtzul man xquinquinataj ta, ni ta chukaʼ man xtiquinimaj ta ri nuchʼabel, jariʼ tok xquequichʼitalaʼ can ri avijaʼtzul, cʼa pa ri quivulatajic.

26 Xcʼulvachitej cʼa chi yin Nefi xentek chi utzil ri Jacob y ri José richin xeʼoc teuchunelaʼ y tijonelaʼ pa quiviʼ ri nuvinakul chupan re ruvachʼulef.

27 Xcʼulvachitej cʼa chi oj cʼo chiriʼ riqʼuin quicoten.

28 E kʼaxinek can junvinek lajuj junaʼ tok xojel pe chupan Jerusalem.

29 Chuvech ri xaxilej tak chʼich ri xinben, yin Nefi xintzʼibaj can ri retal quibanobal ri nuvinak, cʼa pa ri kʼij riʼ.

30 Xcʼulvachitej cʼa chi ri Ajaf Dios quereʼ xubij chuve: Tabanaʼ chʼakaʼ chic xaxilej tak chʼichʼ. Xtatzʼibaj cʼa chiquivech qʼuiy ri nikaʼ chinuvech yin, richin queriʼ utz xtuben chique ri avinak.

31 Roma cʼariʼ, yin Nefi xintakej ri rupixá ri Ajaf y xinbebanaʼ re xaxilej tak chʼichʼ reʼ achojchuvech nutzʼiban vi can ronojel reʼ.

32 Xintzʼibaj cʼa ri nikaʼ chuvech ri Dios. Vi nikaʼ chiquivech ri nuvinak achique ri nikaʼ chuvech ri Dios, rijeʼ utz xtiquitzʼet cʼa ri xintzʼibaj chuvech re xaxilej tak chʼichʼ reʼ.

33 Vi ri nuvinak nicajoʼ niquetamaj ri chʼakaʼ chic chirij ri quibanobal ri nuvinak, cʼo chi niquinicʼoj rupan ri chʼakaʼ chic xaxilej tak chʼichʼ.

34 Xa cʼatzinel chuve yin chi ninbij chi cavinek junaʼ e kʼaxinek chic y kacʼulvachin chic oyoval y chʼeyonic quiqʼuin ri kachʼalal.