1 Vacami cʼa, yichʼo aviqʼuin rat, José, ri at ruqʼuisibel valcʼual. Rat xatalex tok xintij pokonal pa ri tolan ruvachʼulef. Pa ri kʼij tok janíla xibison yin, jariʼ tok ri ateʼ xaralaj.

2 Tuturusaj cʼa ri Ajaf re ruvachʼulef reʼ chave rat richin chi navichinaj, y chukaʼ richin chi xtiquichinaj ri avijaʼtzul quiqʼuin ri animal, richin queriʼ yixchajix cʼa chi utzil benek ruvech. Re ruvachʼulef reʼ can janíla vi jebel. Que cʼareʼ xtiban, vi xqueʼitakej cʼa ri rupixaʼ ri Lokʼolaxel richin ri Israel.

3 Vacami cʼa José, rat at ruqʼuisibel valcʼual y at nucʼamon pe chupan ri tolan ruvachʼulef acuchi xintij vi pokonal. Caruturusaj cʼa ri Ajaf benek ruvech. Ri avijaʼtzul rat man xtivulatej ta cʼa jurayil.

4 Can kitzij vi, rat at nucʼajol. Yin in rijaʼtzul ri José ri xchap el y xucʼuex ka pan Egipto. Can e nimaʼk vi ri cʼulanen tzij ri xuben ri Ajaf riqʼuin ri José riʼ.

5 Ri José riʼ can xutzʼet vi ri kakʼij roj. Ri Ajaf xusuj cʼa chire chi chiquicojol ri rijaʼtzul rijaʼ, ri Ajaf Dios xtuyec pe jun chojmilej rukʼaʼ ri rujayul ri Israel. Man ja ta riʼ ri Mesías, xa jun chic kʼabaj ri xtikʼaj cʼa el. Man riqʼuin vi riʼ, ri Ajaf man xtumestaj ta ri cʼulanen tzij ri xuben quiqʼuin rijeʼ, y ri Mesías xtikʼalajirisex chiquivech pa ri ruqʼuisibel tak kʼij roma ri uxlabel richin uchukʼaʼ. Xtiban queriʼ richin xquebeʼelesex chupan kʼekuʼm, cʼa pa sakil. Kitzij cʼa chi xqueʼelesex chupan ri evan kʼekuʼm y ri tzʼapitajic, cʼa pa ri solcopitajic.

6 Ri José riʼ can xjiquiban vi y queriʼ xubij: Ri Ajaf, nu Dios, xtuqʼuiytisaj jun tzʼetonel. Rijaʼ jun utzilej tzʼetonel chique ri vijaʼtzul yin.

7 Ri José riʼ can que vi reʼ xubij: Quereʼ xubij ri Ajaf chuve yin: Yin xtinqʼuiytisaj jun utzilej tzʼetonel chiquicojol ri avijaʼtzul rat. Rijaʼ xtilokʼokʼex cʼa chiquicojol ri avijaʼtzul. Xtinyaʼ cʼa chire ri tzʼetonel riʼ jun pixaʼ richin xtisamej cʼa pa quiviʼ ri avijaʼtzul. Je rijeʼ ri e rachʼalal rijaʼ. Ri samaj riʼ janíla rejkalen chiquivech rijeʼ. Xquerutijoj cʼa ri avijaʼtzul chique ri cʼulanen tzij ri xenben quiqʼuin ri atataʼ amamaʼ.

8 Xtinyaʼ cʼa chire rijaʼ jun pixaʼ richin queriʼ manjun ta chic samaj xtuben, xaxe cʼa ri samaj ri xtinbij yin chire. Xtinimirisaj cʼa rijaʼ viqʼuin yin, roma rijaʼ xtuben ri nusamaj yin.

9 Rijaʼ nim rukʼij achiʼel cʼari Moisés. Ja ri Moisés riʼ ri achique xinbij chi xtinyec cʼa el chivech rix, ri ix rujayul ri Israel, richin yerucol el ri nuvinak.

10 Xtinyec cʼa el ri Moisés richin xqueberelesaj el ri avinakul rat chupan ri ruvachʼulef Egipto.

11 Man riqʼuin vi riʼ, xtinqʼuiytisaj cʼa jun tzʼetonel chiquicojol ri avijaʼtzul rat. Xtinyaʼ cʼa uchukʼa chire rijaʼ richin xtuqʼuen pe ri nuchʼabel chique ri avijaʼtzul. Man xaxe ta xtiyaʼox uchukʼaʼ chire richin xtuqʼuen pe ri nuchʼabel, xa chukaʼ richin xqueruyukʼuj rijeʼ chire ri nuchʼabel ri tzijon chic chiquicojol.

12 Roma cʼariʼ, ri avijaʼtzul rat xquetzʼiban cʼa, y ri rijaʼtzul ri Judá xquetzʼiban chukaʼ. Cʼa cʼariʼ, ri xtiquitzʼibaj ri avijaʼtzul rat y ri xtiquitzʼibaj ri rijaʼtzul ri Judá, can xquetun vi. Xtiquitun cʼa quiʼ richin xquequiyoj ri tijonic man e kitzij ta, y xquequitanabaʼ ri cʼaxinic, y xtiquitiquiribaʼ ri uxlanibel cʼuʼx chiquicojol ri avijaʼtzul. Chukaʼ pa ri ruqʼuisibel tak kʼij, ri tzʼibanic riʼ xquequitijoj ri avijaʼtzul chiquij ri catiʼt quimamaʼ. Chukaʼ xquequitijoj cʼa rijeʼ chique ri nucʼulanen tzij ri nubanon can quiqʼuin, nichaʼ ri Ajaf.

13 Chupan tok cʼa manek ruchukʼaʼ, ri tzʼetonel riʼ xticovirisex el riqʼuin ruchukʼaʼ. Jariʼ xtibanatej tok xtichapatej chic ri nusamaj chiquicojol ri nuvinak, richin xcatinpabaʼ chic jun bey rat, ri at rujayul ri Israel, nichaʼ ri Ajaf.

14 Queriʼ cʼa, ri José riʼ xuyaʼ pe lokʼolej rutzijol y quereʼ xubij: Can kitzij vi, ri Ajaf xtuturusaj ri tzʼetonel riʼ. Ri xquerayin richin xtiquivulaj, xa xtisach cʼa quicʼuʼx, roma can xtikʼajer vi ri rusujun can ri Ajaf chuve yin chirij ri vijaʼtzul. Vaveʼ cʼa, yin can jic vi vetaman chi xtikʼajer re sujunic reʼ.

15 Ri tzʼetonel riʼ xtucʼuaj cʼa ri nubiʼ yin. Ja chukaʼ riʼ ri rubiʼ ri rutataʼ. Rijaʼ xtuben cʼa junan jubaʼ achiʼel yin. Roma achique ri xtuqʼuen pe ri Ajaf riqʼuin ri rukʼaʼ ri tzʼetonel riʼ, ja cʼariʼ xtuyaʼ ri colotajic chique ri nuvinakul yin roma ri ruchukʼaʼ ri Ajaf.

16 Queriʼ cʼa, ri José riʼ xuyaʼ lokʼolej rutzijol queré xubij: Reʼ can vetaman vi, achiʼel cʼa can vetaman vi ri sujunic chirij ri Moisés. Ri Ajaf quereʼ rubin cʼa chuve: Yin xquenchajij ri avijaʼtzul rat benek ruvech.

17 Ri Ajaf rubin cʼa can quereʼ: Yin xtinqʼuiytisaj jun achin rubiniʼan Moisés. Xtinyaʼ cʼa ruchukʼaʼ riqʼuin jun chojilej cheʼ, y xtinyaʼ utzilej etamabel chire rijaʼ richin nitzʼiban. Man riqʼuin vi cʼariʼ, xa man can ta xtincoropij cʼa ri rakʼ rijaʼ y man qʼuiy ta xtichʼo. Man xtinben ta cʼa chi janíla utz nichʼo. Xa xtintzʼibaj cʼa ri nupixaʼ chire rijaʼ riqʼuin ri ruviʼ nukʼaʼ yin. Xtinyaʼ cʼa riqʼuin rijaʼ jun tzijonel.

18 Que cʼa chukaʼ reʼ xubij ri Ajaf chuve: Yin xtinqʼuiytisaj ri Ajaf chuve: Yin xtinqʼuiytisaj jun tzʼetonel chique ri avijaʼtzul y xtinyaʼ chire rijaʼ jun tzijonel. Chukaʼ xtinyaʼ chire ri tzʼetonel chi xtutzʼibaj ri retal quibanobal ri avijaʼtzul chique ri avijaʼtzul e petenek. Cʼariʼ, ri tzijonel riʼ xtuchʼabalij chique.

19 Rijaʼ xquerutzʼibaj ri chʼabel ri can vetaman vi chi rucʼamon richin xquebe cʼa quiqʼuin ri avijaʼtzul. Jariʼ xtuben xa achiʼel vi ri avijaʼtzul xquechʼo ta pe quiqʼuin rijeʼ chupan ri pokolaj. Yin vetaman cʼa ri quicukubabel cʼuʼx rijeʼ.

20 Rijeʼ xquechʼo cʼa pe chupan ri pokolaj. Tok e kʼaxinek chic el qʼuiy iyaj mamaj ijaʼtzul, ja cʼariʼ, tok xtiquichʼabalij chique ri cachʼalal rijeʼ chi titzolin pe quicʼuʼx. Xticʼulvachitej cʼa chi ri achique xtiquichʼabalij rijeʼ, xtibe quiqʼuin chojilej tak chʼabel.

21 Roma ri quicukubabel cʼuʼx rijeʼ, ri quichʼabel xqueʼel el pa nuchiʼ yin chique ri cachʼalal, je rijeʼ ri avijaʼtzul rat. Roma ri quicukubabel cʼuʼx rijeʼ, xtinyaʼ cʼa uchukʼaʼ chique ri quichʼabel ri xa manek cuchukʼaʼ. Riqʼuin cʼariʼ, xtokaʼ cʼa chiquicʼx rijeʼ ri cʼulanen tzij ri xinben quiqʼuin ri quiteʼ quitataʼ ojer.

22 Vacami cʼa, José nucʼajol, que cʼa riʼ xuyaʼ lokʼolej rutzijol ri ojer nataʼ.

23 Vacami cʼa, rat at turusan roma ri cʼulanen tzij riʼ. Roma cʼa ri avijaʼtzul rat man xquevulatej ta. Rijeʼ xa xtiquinimaj ri ruchʼabel ri vuj.

24 Xtiyacatej cʼa jun chiquicojol rijeʼ ri xtuben qʼuiy utz riqʼuin ri xtubij y riqʼuin ri xtuben. Riqʼuin cʼa ri janíla rucukubabel cʼuʼx, rijaʼ xtoc cʼa jun samajibel pa rukʼaʼ ri Ajaf. Chiriʼ cʼa, rijaʼ xqueruben qʼuiy nimalej tak samaj y achique ri nim nutzʼet ri Dios. Riqʼuin cʼariʼ, rijaʼ xtuben chi qʼuiy xtitzolix chic chire ri rujayul ri Israel y chique ri quijaʼtzul ri avachʼalal.

25 Vacami cʼa, nim ruva akʼij rat José. Can kitzij vi, rat cʼa at alcʼual na. Roma cʼariʼ, tanimaj ri ruchʼabel ri Nefi, ri animal. Vi rat naben queriʼ, xtiban cʼa chave achiʼel ri chʼabel ri nutzijon can. Man tamestaj cʼa ri ruchʼabel ri atataʼ ri jubaʼ chic man nicom. Amen.