1 Vacami cʼa, yin Nefi xquichʼo chiquij ri lokʼolej tak rutzijol achojchiquij xtzijon vi ri nataʼ. Re lokʼolej tak rutzijol reʼ yetzijon chirij ri José ri xucʼuex cʼa pan Egipto.

2 Can kitzij vi cʼa chi ri José riʼ xuyaʼ lokʼolej rutzijol chiquij ri rijaʼtzul rijaʼ. Man e cʼo ta cʼa qʼuiy lokʼolej tak rutzijol ri e nim chiquivech ri lokʼolej tak rutzijol ri xerutzʼibal rijaʼ. Rijaʼ xuyaʼ lokʼolej rutzijol chikij roj y chiquij ri kijaʼtzul apon. Ronojel reʼ tzʼibatel can chuvech ri xaxilej tak cʼakoʼj chʼichʼ.

3 Ri nataʼ xuqʼuis cʼa rutzijoxic chiquij ri lokʼolej tak rutzijol ri xeruyaʼ ri José riʼ. Cʼa cʼariʼ, xeroyoj pe ri rucʼajol y ri rumiʼal ri Laman y quereʼ xubij chique: Nucʼajol y numiʼal, can kitzij vi chi rix ix rucʼajol y rumiʼal ri nabey nucʼajol. Ninvajoʼ cʼa chi rix nivacʼaxaj ri nuchʼabel.

4 Ri Ajaf Dios rubin can quereʼ: Vi jeʼitakej ri nupixaʼ, xquixqʼuiyer pa ri ruvachʼulef. Vi xa man yeʼitakej ta ri nupixaʼ, xquixelesex cʼa el viqʼuin.

5 Vacami cʼa nucʼajol numiʼal, can kitzij vi chi man yitiquir ta yibe ka pa ri numukubal, vi man ninyaʼ ta can nabey jun turusanic pan iviʼ rix. Can vetaman vi cʼa chi vi yixqʼuiytisex pa ri chojmilej bey, man xquixel ta chiriʼ.

6 Roma cʼariʼ, vi rix yixetzelex, yin ninyaʼ can re turu sanic reʼ pan iviʼ: Chi ri etzelanic riʼ xtelesex na el iviqʼuin y xtiyaʼox pa quiviʼ ri iteʼ itataʼ.

7 Que cʼariʼ, roma cʼa ri nuturusanic, ri Ajaf Dios man xtuyaʼ ta kʼij chi xquixyojtej. Xa xtujoyovaj cʼa ivech rix y ri quivech ri ivijaʼtzul benek ruvech.

8 Xcʼulvachitej cʼa chi ri nataʼ xuqʼuis rutzijoxic chique ri rucʼajol y ri rumiʼal ri Laman. Cʼariʼ, xuben chi ri rucʼajol y ri rumiʼal ri Lemuel xejel apon chuvech.

9 Quereʼ cʼa xubij chique rijeʼ: Nucʼajol numiʼal, can kitzij vi, rix ix rucʼajol y rumiʼal ri rucaʼn nucʼajol. Ninyaʼ cʼa can pan iviʼ rix jun turusanic xa junan riqʼuin ri xinyaʼ can pa quiviʼ ri rucʼajol y rumiʼal ri Laman. Que cʼariʼ, man xquixyojtej ta jurayil. Ri ivijaʼtzul rix xtiturusex cʼa pa ruqʼuisibel.

10 Xcʼulvachitej cʼa chi tok ri nataʼ xuqʼuis rutzijoxic chique rijeʼ, jariʼ tok xchʼo quiqʼuin ri rucʼajol ri Ismael, jaʼ quiqʼuin conojel ri e aj pa rachoch ri Ismael.

11 Tok xuqʼuis ri rutzijonic quiqʼuin rijeʼ, xchʼo cʼa riqʼuin ri Sam y quereʼ xubij chire: Nim ruva akʼij rat y chukaʼ ri avijaʼtzul. Rat xtavichinaj cʼa ri ruvachʼulef, achiʼel cʼa ri Nefi ri achakʼ. Ri avijaʼtzul xtajilex riqʼuin ri rijaʼtzul rijaʼ. Rat xcatoc junan jubaʼ riqʼuin ri achakʼ y ri avijaʼtzul xtoc junan jubaʼ riqʼuin ri rijaʼtzul rijaʼ. Rat xcaturusex cʼa chijun acʼaslen.

12 Ri nataʼ Leʼi xchʼo cʼa quiqʼuin conojel ri e aj pa rachoch, achiʼel cʼa ri xunaʼ ri ránima rijaʼ y junan riqʼuin ri Ruxlabal ri Ajaf ri cʼo riqʼuin. Chiriʼ cʼa xcʼulvachitej chi rijaʼ xrijex. Cʼa cʼariʼ, xcom y xmuk ka.

13 Xcʼulvachitej cʼa chi jun caʼiʼ oxiʼ kʼij tok rijaʼ caminek chic, jariʼ tok ri Laman y ri Lemuel y ri rucʼajol ri Ismael xeʼoyover viqʼuin, roma ri rupixabanic ri Ajaf.

14 Roma yin Nefi, xa xchilabex cʼa chuve richin xintzijoj chique rijeʼ ri ruchʼabel ri Ajaf. Can qʼuiy vi ri xinchʼabalij chique y can que vi reʼ xuben ri nataʼ chukaʼ, tok manjani ticom. Qʼuiy chique ri chʼabel riʼ e tzʼibatel can chuvech ri chʼakaʼ chic xaxilej tak chʼichʼ vichin yin. Roma cʼa chuvech ri xaxilej tak chʼichʼ riʼ, tzʼibatel can qʼuiy ri xkabanalaʼ roj.

15 Nintzʼibaj cʼa chuvech re xaxilej tak chʼichʼ reʼ ri nunaʼ ri vánima y chukaʼ qʼuiy chire ri tzʼiban can chuvech ri xaxilej tak cʼakoʼj chʼichʼ. Ri vánima niquicot riqʼuin ri lokʼolej tzʼibanic y can ninchʼob vi rij pa vánima. Nintzʼibaj cʼa richin queriʼ ri valcʼual niquetamaj y niquil ri utz ri cʼo chupan.

16 Can kitzij vi, ri vánima niquicot quiqʼuin ri runaʼoj y ri rubanobal ri Ajaf. Jutakel ninchʼob rij pa vánima ri nutzʼeton y ri vacʼaxan.

17 Man riqʼuin vi riʼ, stapeʼ cʼa ri Ajaf, roma ri nim rutzil, can rucʼutun vi chinuvech nimalej y meyel tak samaj, ri vánima cʼa nusiqʼuij quereʼ: Joʼoc nuvech yin achin. Nibison cʼa ri vánima roma ri nutiojil. Nikʼaxon nucʼuʼx roma ri itzel nubanobal.

18 In sutivinek cʼa coma ri itzel tak yukʼbel y ri mac ri man cʼayef ta richin yinquichop.

19 Tok ninvajoʼ ta yiquicot, xa nijikʼijot cʼa ri nucʼuʼx coma ri numac. Man riqʼuin vi cʼariʼ, vetaman achojiqʼuin nucukuban vi nucʼuʼx.

20 Ri nu Dios in rutoʼon. Xiruyukej tok xincʼovijsaj cʼayeval pa ri tolan ruvachʼulef. Chukaʼ xiruchajij pa ruviʼ ri nimalej yaʼ.

21 Rijaʼ in runojisan riqʼuin ri rajovabal, cʼa acuchi ri nuchʼacul man nicochʼon ta chic.

22 Rijaʼ rusachon quinaʼoj ri vetzelanelaʼ, cʼa acuchi xecʼaracʼot vi chinuvech.

23 Can kitzij vi chi rijaʼ racʼaxan ri nimalej nuchʼoven pa kʼij. Chukaʼ ruyaʼon etamabel chuve pa tzʼetonic chakʼaʼ.

24 Pa kʼij nutijon nukʼij richin nichʼo akʼanij riqʼuin rijaʼ. Can nej akʼanij nutakon vi ri nuchʼabel. Cʼa cʼariʼ, ri lokʼolej tak takonaxelaʼ xekaka pe y xquiben lokʼolej samaj pa nuviʼ.

25 Ri Ruxlabal rijaʼ in rucʼuan cʼanej akʼanij pa quiviʼtak juyuʼ. Chukaʼ can e nutzʼeton vi nimalej tak banobel. Jun achin man nitiquir ta yerutzʼet ri banobel riʼ roma janíla e nim. Roma cʼariʼ tok xbitej chuve chi man quentzʼibaj can.

26 Can que vi riʼ, e nutzʼeton nimalej tak banobel. Ri Ajaf, pa ri lokʼolej rukajinen, petenek chiquicojol ri vinakiʼ riqʼuin janíla rujoyovabal. ¿Achique cʼa roma tok nokʼ ri vánima y ri nucʼuʼx nicanej can pa ri cʼojlibel richin kʼaxomal? ¿Achique cami roma niyojtej ri nuchʼacul y nanimej ri vuchukʼaʼ roma ri nucʼayeval?

27 ¿Achique cʼa roma xquimacun roma ri nutiojil? ¿Achique roma tok ninyaʼ kʼij chire ri itzel yukʼbel? Riqʼuin cʼareʼ, ri itzel vinek noc pa vánima richin nuyoj ri vuxlanibel cʼuʼx y nunek ri vánima. ¿Achique cʼa roma tok yinoyover roma ri netzelan vichin?

28 ¡Cacʼastej cʼa vánima! Manek chic tayaʼ aviʼ pa mac. ¡Caquicot nucʼuʼx! Man tayaʼ chic kʼij chire ri netzelan richin ri vánima.

29 Man catoyover chic roma ri vetzelanelá. Man tavelesaj ri vuchukʼaʼ roma ri nucʼayeval.

30 ¡Caquicot cʼa vánima! Cachʼo akʼanij riqʼuin ri Ajaf riqʼuin ronojel avuchukʼaʼ y tabij chire quereʼ: Rat, Ajaf, yin xtinyaʼ cʼa akʼij benek ruvech. Ri vánima can xtiquicot vi aviqʼuin rat ri nu Dios. Ja rat ri abej richin ri nucolotajic.

31 Rat, Ajaf, ¿la xtacol cʼa cami ri vánima? ¿La xquinavelesaj cʼa el pa quikʼaʼ ri vetzelanelaʼ? ¿La xtaben chuve chi xquicʼaracʼot chuvech ri mac?

32 Quetzʼapix cʼa ri ruchiʼ ri xibalbay chinuvech yin, roma paxinek ri vánima y chʼuchʼujirinek ri nucʼuʼx. Rat, Ajaf, man tatzʼapij cʼa chinuvech yin ri oquibel richin ri achojmilal, richin chi xquitiquir xquibiyin pa ri utzilej cʼojlibel, y richin chi can cof vi yicʼojeʼ pa ri chojilej bey.

33 ¡Rat, Ajaf, quinapisaʼ cʼa riqʼuin ri tziek richin ri achojmilal! ¡Tanucʼuʼ cʼa jun rubeyal richin queriʼ xquinanimej chiquivech ri vetzelanelaʼ! ¡Tachojmirisaj ri bey chinuvech! Man cʼa tayaʼ jun pajqʼuibel pa nubey yin. Xa takʼalajirisaj cʼa ri bey chinuvech. Man tatzʼapij cʼa ri nubey yin, xa tatzʼapij ri bey quichin ri vetzelanelaʼ.

34 Rat, Ajaf, nucukuban cʼa nucʼuʼx aviqʼuin rat, y can junelic vi xtincukubaʼ cʼa nucʼuʼx aviqʼuin. Man xtincukubaʼ ta nucʼuʼx riqʼuin ri chʼaculaj. Yin vetaman cʼa chi etzelan ri nucukubaʼ rucʼuʼx riqʼuin ri chʼaculaj. Can etzelan vi cʼa ri nucukubaʼ rucʼuʼx riqʼuin jun achin o nuben chi ri chʼaculaj noc ri rutoʼbel.

35 Vetaman cʼa chi ri Dios can xtuyaʼ vi chi utzil chire ri nicʼutun chire. Ri nu Dios xtuyaʼ cʼa chuve yin vi utz ri nincʼutuj chire. Roma cʼariʼ, xtinjotobaʼ ri nuchʼabel aviqʼuin, y can xquichʼo vi akʼanij aviqʼuin rat. At nu Dios y at abej richin ri nuchojmilal. Can kitzij vi chi benek ruvech ri nuchʼabel nijoteʼ akʼanij aviqʼuin rat, at nuxeʼel y ri nu Dios Jumul. Amen.