1 Vacami cʼa, yin Nefi man yitiquir ta nintzʼibaj ronojel ri xetzijox chiquicojol ri nuvinakul. Chukaʼ man yitiquir ta yitzʼiban janíla utz, achiʼel cʼa yitiquir yichʼo. Roma cʼa tok jun achin nichʼo riqʼuin ri ruchukʼaʼ ri Uxlabixel, ja ri ruchukʼaʼ ri Uxlabixel nucʼuan el ri chʼabel riʼ pa ri cánima ri vinakiʼ.

2 Man riqʼuin vi riʼ, xa kitzij chi e cʼo e qʼuiy ri niquicovirisaj ri cánima chirij ri Uxlabixel, y rijaʼ manek rucʼojlibal quiqʼuin. Roma cʼariʼ, xa niquitorij el qʼuiy ri tzʼibatel can y niquinojij chi can manek vi quejkalen.

3 Man riqʼuin vi riʼ, yin Nefi can nutzʼiban vi can ri achique nutzʼiban can, y ninnojij chi janíla rejkalen. Can janíla vi nim ri rejkalen chique ri nuvinakul yin. Yin junelic yichʼo akʼanij riqʼuin ri Dios coma rijeʼ, y chakʼaʼ ri ruyaʼal runakʼ nuvech niquichʼekebaʼ ri ruchʼaquet nuviʼ coma rijeʼ. Can yichʼo vi akʼanij riqʼuin ri nu Dios riqʼuin cukubabel cʼuʼx, y vetaman chi rijaʼ xtracʼaxaj ri nuchʼoven.

4 Yin vetaman cʼa chi ri Ajaf Dios xtuturusaj cʼa ri nuchʼoven richin queriʼ utz xtiban chique ri nuvinakul. Xtiyaʼox uchukʼaʼ chique ri chʼabel ri xintzʼibaj can, y xa man can ta utz yitiquir yitzʼiban. Ri chʼabel riʼ yeruyukʼ cʼa ri vinakiʼ richin niquiben ri utz. Yerutijoj cʼa rijeʼ chique ri xequibanalaʼ ri quiteʼ quitataʼ. Nichʼabalin chirij ri Jesús y yeruyukʼ richin niquinimaj rijaʼ, y richin yecochʼon cʼa pa ri ruqʼuisibel, y jariʼ ri cʼaslen jumul.

5 Can cof vi cʼa nichʼo chirij ri mac, achiʼel cʼa nichʼo rukʼalajirisanen ri kitzij. Roma cʼariʼ tok manjun achin xtoyover cʼa riqʼuin ri chʼabel ri xintzʼibaj can, xaxe cʼa vi rijaʼ xa richin ri ruxlabal ri itzel vinek.

6 Yin yiquicot riqʼuin ri kʼalajirisanen, y yiquicot riqʼuin ri kitzij. Yiquicot cʼa riqʼuin ri nu Jesús, roma rijaʼ relesan el ri vánima pa xibalbay.

7 Cʼo ri nulokʼokʼebel chique ri nuvinakul. Chukaʼ janíla nincukubá nucʼuʼx riqʼuin ri Cristo, chi yin xquentzʼet e qʼuiy ri manek quitzʼilol chuvech ri rukʼatbel tzij.

8 Cʼo nulokʼokʼebel chique ri e aj Judá. Ninbij aj Judá roma yichʼo chiquij rijeʼ achojiqʼuin in elenek vi pe.

9 Chukaʼ cʼo nulokʼokʼebel chique ri Gentiliʼ. Man riqʼuin vi riʼ, xa man yitiquir ta yinoyoben pa vánima pa ruviʼ manjun chique rijeʼ. Xaxe vi xqueyukʼ chire ri Cristo y xqueʼoc chupan ri oquibel ri chʼutiʼn ruvech, y xquebiyin chupan ri bey ri nibe cʼa pa ri cʼaslen, y can xtiquitzekelbej vi pe ri bey riʼ, cʼa tok xtiqʼuis ri kʼij richin ri quitejtobenic.

10 Vacami cʼa, vachʼalal ri ix nucʼuʼxlan, y chukaʼ rix ix aj Judá, y rix ix aj chijun re ruvachʼulef, tivacʼaxaj cʼa re chʼabel reʼ y tinimaj cʼa ri Cristo. Vi man ninimaj ta cʼa re chʼabel reʼ, xa tinimaj cʼa ri Cristo. Vi can ninimaj vi cʼa ri Cristo, can que chukaʼ riʼ xtinimaj re chʼabel reʼ, roma can e richin vi ri Cristo. Ja rijaʼ ri yoyon chuve quichin re chʼabel reʼ, y yequitijoj conojel vinakiʼ richin niquiben ri utz.

11 Vi reʼ xa man e ruchʼabel ta ri Cristo, tichʼoboʼ cʼa queriʼ rix. Roma pa ruqʼuisibel kʼij, ri Cristo xtukʼalajirisaj chivech rix riqʼuin uchukʼaʼ y nimalej cʼojlemal, chi reʼ can e ruchʼabel vi rijaʼ. Chuvech cʼa ri rucʼojlibal rijaʼ, rix y yin xtikatzulubelaʼ kiʼ. Cʼa cʼariʼ, xtivetamaj chi ja rijaʼ ri biyon pe chuve chi tintzʼibaj cʼa ronojel reʼ, stapeʼ cʼa man can ta yitiquir chi utzil.

12 Nincʼutuj cʼa chire ri Tataʼixel pa rubiʼ ri Cristo, chi qʼuiy chike roj, vi man can ta konojel, xkojtiquir xkojcolotej chupan ri rajavaren rijaʼ pa ri nimalej y ruqʼuisibel kʼij.

13 Vacami cʼa, vachʼalal ri ix nucʼuʼxlan, y rix ivonojel ri ix aj ri rujayul ri Israel, y chukaʼ rix ivonojel ix cʼo chijun re ruvachʼulef, yin yichʼo iviqʼuin achiʼel cʼa jun ri nichʼabalin ta pe chupan ri pokolaj: Quiriʼ cʼa, cʼa tok xtipe ri nimalej kʼij riʼ.

14 Rix ri man nivajo ta niqʼuen ri rutzil ri Dios y man ninimaj ta ri quichʼabel ri e aj Judá, ni ta chukaʼ ri nuchʼabel yin, ni ta chukaʼ ri chʼabel ri xtubij pe ri Rucarneʼl ri Dios, can kitzij vi cʼa ninbij chive jumul, quiriʼ cʼa. Roma cʼa chupan ri ruqʼuisibel kʼij, re chʼabel reʼ xquixquetzelaj can rix.

15 Ri achique ninjiquibaʼ chuvech re ruvachʼulef, xticʼamer cʼa pe chivij rix pa ri kʼatbel tzij. Queriʼ cʼa, ri Ajaf rubin can chuve y cʼo chi ninnimaj rutzij. Amen.