1 Vacami cʼa, yichʼo aviqʼuin rat, Jacob. Ja rat at nabey valcʼual tok in cʼo chupan ri kʼij richin ri nucʼayeval pa ri tolan ruvachʼulef. Can kitzij vi chi rat acʼovisan pokon y nimalej bis pa ri avalcʼualanen. Ja cʼareʼ cʼulvachitajinek can roma ri quicovirinen ri animal.

2 Man riqʼuin vi riʼ, Jacob, at nabey valcʼual tok in cʼo pa ri tolan ruvachʼulef, rat avetaman ri nimalej rutzil richin ri Dios. Rijaʼ xtuben chi coma ri akʼaxomal, rat xtachojmirisaj aviʼ.

3 Roma cʼariʼ, rat xcaturusex y xcacʼojeʼ chi utzil riqʼuin ri animal Nefi. Rat xtasamajij cʼa ri Ajaf chupan ri acʼaslen. Roma cʼariʼ, yin vetaman chi rat at elesan pe pa mac roma ri ruchojmilal ri Lokʼolej Avelesanel. Rat atzʼeton cʼa chi pa ri rutzʼakatajic ri junaʼ, rijaʼ xtipe richin xtuqʼuen pe ri colotajic quichin ri vinakiʼ.

4 Rat pa ri avalcʼualanen atzʼeton ri rucʼojlemal rijaʼ. Roma cʼariʼ, rat at turusan achiʼel ri xqueruturusaj rijaʼ tok cʼo riqʼuin ri ruchʼacul. Ri Uxlabel xa junan cʼa rubanic ivir, vacami, y benek ruvech. Ri rubeyal can chojmirisan vi pe tok xtzak ri achin, y ri colotajic man tojon ta.

5 Ri achiʼaʼ e tijon cʼa chi utzil richin queriʼ quetaman cʼa ruvech ri utz y ri itzel. Ri pixaʼ niyaʼox chique conojel ri vinakiʼ. Manjun vinek niban choj roma ri pixaʼ, o pa jun chic chʼabel, roma ri pixaʼ, ri vinakiʼ yecʼuk el. Kitzij cʼa chi rijeʼ xeʼelesex el roma ri pixaʼ aj ruvachʼulef. Chukaʼ roma cʼa ri pixaʼ aj uxlabel, man niquil ta apon achique ri can utz vi. Cʼa cʼariʼ, can xquebison vi jumul.

6 Roma cʼariʼ, ri elesanic pa mac nipe cʼa roma ri nuben ri Lokʼolej Mesías. Rijaʼ nojinek cʼa quiqʼuin utzil y kitzij.

7 Can kitzij vi chi rijaʼ nusuj riʼ pa jun camelabel coma ri mac. Riqʼuin cʼariʼ nuben chi nikʼajer ri rurayibal ri pixaʼ pa quiviʼ checonojel ri paxinek ri cánima y chʼuchʼuj ri cuxlabal. Xa manek cʼa chic banel richin nikʼajer ri rurayibal ri pixaʼ pa ruviʼ manjun chic.

8 Roma cʼariʼ, can janíla vi cʼatzinel chi yetijox ri vinakiʼ ri e cʼo chuvech re ruvachʼulef chire ronojel reʼ. Riqʼuin cʼariʼ, xtiquetamaj chi manjun vinek nitiquir nicʼoje acuchi cʼo vi ri Dios vi man ta coma ri ruchojmilal, ri rujoyovabal, y ri rutzil ri Lokʼolej Mesías. Rijaʼ nuyaʼ can ri rucʼaslen riqʼuin ri ruchʼacul, y nuqʼuen chic el jun bey riqʼuin ri ruchukʼaʼ ri Uxlabel. Can que vil reʼ, rijaʼ nuben ri cʼastajibel quichin ri caminakiʼ y ja rijaʼ ri nabey niyacatej.

9 Queriʼ cʼa, ja rijaʼ ri nabiyajinek akʼanij cʼa chuvech ri Dios, y can xticʼutun vi pa quiqʼuexel ri calcʼual ri achiʼaʼ. Ri yeniman richin rijaʼ, can xquecolotej vi.

10 Xa roma cʼa rijaʼ nicʼutun pa quiqʼuexel conojel ri vinakiʼ, can conojel vi yeʼapon cʼa riqʼuin ri Dios. Roma cʼariʼ, yecʼojeʼ chuvech rijaʼ richin queriʼ nukʼet cʼa tzij pa quiviʼ. Rijaʼ nuben cʼa queriʼ riqʼuin ri kitzij y ri chʼajchʼojil ri cʼo riqʼuin. Roma cʼariʼ, ri rurayibal ri rupixaʼ ri ruyaʼon can ri Lokʼolaxel niquiben chi can nipe vi ri cʼajisabel. Ja cʼajisabel riʼ can jiquiban vi y can chʼaron vi riqʼuin ri quicoten ri jiquiban can. Ri quicoten y ri cʼajisabel niquiben cʼa chi nikʼajer ri rurayibal ri tojbalil mac.

11 Ninbij cʼa chave rat ri at nabey valcʼual tok in cʼo pa ri tolan ruvachʼulef, chi nicʼatzin cʼa chi ronojel cʼo ri ruchʼarojriʼil. Vi man ta queriʼ, man ta nitiquir nibanatej cʼa ri ruchojmilal. Man ta yebanatej cʼa chukaʼ ri etzelal o ri chojmilal o ri bis o ri utz o ri itzel. Vi xa ta queriʼ, cʼo cʼa chi conojel xaxe ta jun quibanon. Chiriʼ cʼa, vi ja ta ronojel xe jun, jariʼ nicanej ta can achiʼel jun caminek. Vi ta queriʼ manek ta cʼaslen y manek ta camic. Chukaʼ manek ta tzʼilol o chʼajchʼojil, manek ta quicoten o bis, manek ta utzil o etzelal.

12 Que ta cʼariʼ, ronojel tzʼucutajinek ta cʼa y xa manek ta rejkalen. Roma cʼariʼ, xa manek ta roma xtzʼucutej. Vi ta cʼa quereʼ xbanatej can xa nivulatej ta cʼa ri retamabal ri Dios y chukaʼ ri jumul rurayibal. Yevulatej ta chukaʼ ri ruchukʼaʼ y ri rujoyovabal y ri rukʼatoj tzij ri Dios.

13 Vi ta nabij cʼa chi manek pixaʼ, nabij ta chukaʼ chi manek ruchojmilal. Cʼa cʼariʼ, vi ta manek ruchojmilal, xa manek ta chukaʼ quicoten. Vi ta manek cʼa ruchojmilal o quicoten, manek ta chukaʼ kʼaxomal o cʼajistabel. Vi ta manek cʼariʼ, xa manek ta cʼa Dios. Vi ta manek Dios, oj manek ta roj y chukaʼ manek ta cʼa re ruvachʼulef. Man ta tiquirel richin xetzʼucutej conojel ri yebanon y conojel ri achojchique niban vi. Roma cʼariʼ, cʼo chi conojel xesachtej ta el.

14 Vacami cʼa, nucʼajol, ninbij ronojel reʼchive rix richin chi yixqʼuiyer y nivetamaj. Roma cʼa, can cʼo vi jun Dios y rijaʼ e rutzʼucun ronojel. E rutzʼucun ri caj y ri ruvachʼulef y conojel ri e cʼo chiriʼ. E rutzʼucun cʼa conojel ri yebanon y conojel ri achojchique niban vi.

15 Rijaʼ xerutzʼuc cʼa ri nabey kateʼ katataʼ y ri aj pa kʼayis chicopiʼ y ri aj xicʼ chicopiʼ. Can conojel vi xerutzʼuc cʼa rijaʼ. Tok rubanon chic ronojel riʼ, rijaʼ xuben chukaʼ chi ronojel cʼo ri ruchʼarojriʼil. Xuben cʼa queriʼ richin chi nuben chi nikʼajer ri jumul rurayibal chique ri achiʼaʼ. Roma cʼariʼ tok xcʼojeʼ ri ruvech cheʼ chʼaʼoj rij chuvech cʼa ri cheʼ richin ri cʼaslen. Ri jun qʼuey y ri jun chic quiʼ.

16 Cʼa cʼariʼ, ri Ajaf xuyaʼ kʼij richin chi ja ri vinek nichaʼon achique ri nuben rijaʼ. Man riqʼuin vi riʼ, ri achin man nitiquir ta nuchaʼ ri nuben vi man niyukʼ ta rijaʼ roma ri jun o roma ri jun chic.

17 Yin, Leʼi, roma ri achique nusiqʼuin y ri achique tzʼibatel can, ninnojij chi jun takon naxel richin ri Dios xtzak el chupan ri caj. Rijaʼ xucanoj cʼa ri achique itzel chuvech ri Dios. Roma cʼariʼ tok xoc jun itzel vinek.

18 Roma cʼa rijaʼ xtzak el chupan ri caj, xa xuchop cʼa rutijic kʼaxomal jurayil. Cʼa cʼariʼ, xurayij chi conojel ri achiʼaʼ xquitij kʼaxomal. Jacʼa rijaʼ ri ojer cumetz y ri itzel vinek ri can ja vi rijaʼ ri tataʼaj richin ronojel ri tzʼucuj tzij. Roma cʼariʼ tok rijaʼ quereʼ xubij chire ri Eva: Tatijaʼ ri ruvech re cheʼ chʼaʼoj rij y man xquixcom ta cʼa. Xa xtivetamaj ri utz chuvech ri itzel y quereʼ cʼa, xquixoc junan jubaʼ riqʼuin ri Dios.

19 Tok ri Adán y ri Eva xquitij cʼa ri ruvech ri cheʼ chʼaʼoj rij, ja cʼariʼ tok xeʼelesex el chupan ri cotzʼijbel rubiniʼan Edén. Cʼa cʼariʼ, cʼo chi xquisamajij ri ruvachʼulef.

20 Rijeʼ xecʼojeʼ cʼa calcʼual y ja cʼariʼ ri quijaʼtzul conojel ri vinakiʼ ri e cʼo chuvech re ruvachʼulef.

21 Xeyaloj cʼa ri quicʼaslen ri calcʼual ri achiʼaʼ, achiʼel cʼa ri xrajoʼ ri Dios, richin chi xtzolin quicʼuʼx tok cʼa e cʼo na riqʼuin ri quichʼacul. Roma cʼariʼ, ri quicʼaslen vaveʼ xa jun cʼaslen richin tejtobenic. Xeyaloj cʼa ri quicʼaslen, achiʼel cʼa ri rupixaʼ ri xuyaʼ ri Dios chique ri calcʼual ri achiʼaʼ. Rijaʼ can xubij vi chique rijeʼ chi titzolin cʼa pe quicʼuʼx. Xucʼut cʼa chiquivech conojel ri vinakiʼ chi rijeʼ e sachinek chic, xa roma ri nabey quiteʼ quitataʼ xquikʼej ri rupixaʼ.

22 Can kitzij vi cʼa, chi vi ta ri Adán man ta xukʼej ri pixaʼ, man ta xtzak cʼa rijaʼ. Xa xcanej ta can pa ri cotzʼijbel rubiniʼan Edén. Chukaʼ, conojel ri e tzʼucun can cʼo ta chi xecʼojeʼ na can, junan achiʼel ri quibanon toko xetzʼucutej. Can que vi riʼ, xecanej ta can benek ruvech y man ta jun bey xeqʼuis.

23 Manek ta xecʼojeʼ cʼa ri calcʼual. Queriʼ cʼa, e cʼo ta can pa chʼajchʼojil. Man ta xequicot, roma man ta quetaman ruvech ri bis. Man ta xquiben ri utz, roma man ta quetaman ri mac.

24 Man riqʼuin vi riʼ, vaveʼ cʼa, checonojel xa e banatajinek riqʼuin ri utzilej runojibal ri etamayon ronojel.

25 Ri Adán xtzak richin chi yecʼojeʼ na ri vinek. Ri vinek e cʼo cʼa, richin chi nicʼojeʼ na jumul quiquicoten.

26 Ri Mesías xtipe cʼa pa ri rutzʼakatisanic ri junaʼ, richin chi xquerelesaj el ri calcʼual ri achiʼaʼ chupan ri tzakinen. Rijeʼ, xa roma e elesan chic el chupan ri tzakinen, can e solcopin vi cʼa jumul. Quetaman cʼa ri utz chuvech ri itzel. Niquichaʼ rijeʼ achique niquiben. Man xabachique ta niban ka chique. Xaxe cʼa pa ri nimalej y ruqʼuisibel kʼij xtibanatej ri cʼajisabel ri rucʼuan ri kʼatoj tzij, achiʼel cʼa ri niquibij ri rupixaʼ ri e ruyaʼon pe ri Dios.

27 Roma cʼariʼ, ri vinakiʼ e solcopin tok a cʼo riqʼuin ri quichʼacul. Yaʼon chique rijeʼ ronojel ri cʼatzinel chique. Yaʼon cʼa kʼij chique rijeʼ richin chi niquichaʼ ri solcopitajic y ri cʼaslen jumul. Riʼ niyaʼox cʼa chique roma ri nimalej kʼaxabel tzij ri xban pa quiviʼ conojel ri vinakiʼ. Chukaʼ yaʼon cʼa kʼij chique rijeʼ richin chi niquichaʼ ri tzʼapitajic y ri camic, achiʼel cʼa ri tzʼapitajic y ri uchukʼaʼ richin ri itzel vinek. Rijaʼ nurayij cʼa chi conojel ri vinakiʼ niquitij kʼaxomal, achiʼel cʼa ri nutij rijaʼ.

28 Vacami cʼa, nucʼajol, ninvajoʼ chi titzeklbej cʼa re Kʼaxey Tzij reʼ y queʼitakej ri rupixaʼ rijaʼ. Ninvajoʼ cʼa chi queʼ inimaj chi utzil ri ruchʼabel y tichaʼ cʼa ri cʼaslen richin jumul, achiʼel ri nrajoʼ ri Lokʼolej Ruxlabal.

29 Ninvajoʼ chukaʼ chi man nichaʼ ta cʼa ri camic richin jumul, achiʼel ri rurayibal ri chʼaculaj y ri itzel ri cʼo chupan. Ja ri itzel riʼ, ri nuyaʼ uchukʼaʼ chire ri ruxlabal ri itzel vinek richin yixruchop y yixrucʼuaj cʼa pa xibalbay. Chiriʼ cʼa, ri itzel vinek riʼ xtukʼet tzij pan iviʼ pa ri rajavaren rijaʼ.

30 Quereʼ cʼa, nucʼajol, e nuchʼabalin chive re jun, caʼiʼ, oxiʼ chʼabel reʼ pa ri ruqʼuisibel tak kʼij richin ri nutejtobenriʼil. Nuchaʼon el ri e utz tak chʼabel quiqʼuin ri ruchʼabel ri yaʼol lokʼolej rutzijol. Can manek vi chic jun nurayibal. Xaxe cʼa ninvajoʼ chi utz ruvech ri ivuxlabal, tibe kʼij tibe sek. Amen.