1 Xcʼulvachitej cʼa chi xquiyaʼ rukʼij ri Ajaf. Cʼariʼ, xepe viqʼuin y xkasamajij cʼa ri cheʼ y can man etaman ta vi ri rutzil xkaben. Cʼariʼ, ri Ajaf binakel xucʼut chinuvech achique ninben chire ri rajajxic ri cheʼ richin ri nimalej jucuʼ.

2 Vacami cʼa, yin Nefi man xensamajij ta ri cheʼ achiʼel ri niquiben ri achiʼaʼ. Chukaʼ man xinben ta ri nimalej jucuʼ achiʼel ri rubanic ri quetaman ri achiʼaʼ. Yin xinben cʼa chire achiʼel ri rubanic ri xucʼut ri Ajaf chinuvech. Roma cʼariʼ, xa man junan ta ri xuben riqʼuin ri rubanic ri quetaman ri achiʼaʼ.

3 Binakel cʼa, yin Nefi xibe akʼanij pa ri juyuʼ y xichʼo akʼanij riqʼuin ri Ajaf. Ja cʼariʼ tok ri Ajaf xerucʼut chinuvech nimalej tak naʼoj.

4 Xcʼulvachitej cʼa chi xinqʼuis rubanic ri nimalej jucuʼ achiʼel cʼa ri xucʼut ri Ajaf chinuvech. Jariʼ tok ri nunimal xquitzʼet chi xa utz, y chi can jebel vi ri rubanic xkaben. Roma cʼariʼ tok rijeʼ xquichʼutinirisaj chic quiʼ chuvech ri Ajaf.

5 Xcʼulvachitej cʼa chi ri ruchʼabel ri Ajaf xpe riqʼuin ri nataʼ y xubij chire chi tikanucʼuʼ kiʼ y kojoc cʼa ka chupan ri nimalej jucuʼ.

6 Xcʼulvachitej cʼa chi tok xsaker rucaʼn kʼij, xkanucʼ cʼa ronojel. E kamolon pe chic pa ri tolan ruvachʼulef e qʼuiy ruvech cheʼ y chukaʼ tiʼij. Chukaʼ xekamol qʼuiy aj pa kʼayis cab y chʼakaʼ chic ri e cʼatzinel chike, achiʼel cʼa ri rubin can ri Ajaf chike. Cʼa cʼariʼ, xojbe ka pa ri nimalej jucuʼ, y e kacʼuan ri kejkaʼn, y ri kijatz, y ronojel ri cʼo kiqʼuin. Chikajujunal cʼa xojoc ka pa ri nimalej jucuʼ, achiʼel cʼa ri kajunaʼ. Que cʼariʼ, xojbe ka pa ri nimalej jucuʼ konojel roj quiqʼuin ri kixjayilal y ri kalcʼual.

7 Ri nataʼ xeralcʼualaj cʼa caʼiʼ rucʼajol pa ri tolan ruvachʼulef. Ri nimalaxel rubiniʼan Jacob y ri chakʼlaxel rubiniʼan José.

8 Xcʼulvachitej cʼa chi roj konojel xojbe cʼa ka pa ri nimalej jucuʼ. Xekacʼuaj cʼa ronojel ri cʼatzinel chike y ronojel ri xubij ri Ajaf chi tikacʼuaj cʼa el kiqʼuin. Ja cʼariʼ tok xkanim el kiʼ pa ruviʼ ri nimalej yaʼ. Jacʼa ri cakʼikʼ ri xnimon el kichin, y xojruchojmij cʼa el pa rubey ri ruvachʼulef sujun can.

9 Xojnim cʼa el qʼuiy kʼij roma ri cakʼikʼ. Ja cʼariʼ tok ri nunimal y ri rucʼajol ri Ismael, quiqʼuin ri quixjayilal, xquichop cʼastanen. Riqʼuin cʼa itzel quinojibal, xexajon y xebixan y xetzijon. Queriʼ cʼa, rijeʼ xquimestaj cʼa ri uchukʼaʼ ri xojrucʼuaj el chiriʼ, y xquijech cʼa quiʼ pa jun itzelilej naʼoj.

10 Cʼariʼ, yin Nefi janíla xinxibij viʼ. Riqʼuin cʼa jubaʼ ri Ajaf xtoyover ta kiqʼuin y xkojrusoc ta cʼa roma ri ketzelal, y cʼariʼ xtojjikʼ ta ka, cʼanej chuxeʼ ri nimalej yaʼ. Roma cʼariʼ, xichʼo choj quiqʼuin ri nunimal. Ja cʼariʼ tok rijeʼ xeʼoyover viqʼuin y quereʼ xquibij chuve: Roj man xtikayaʼ ta kʼij chire ri kachakʼ richin nucʼuaj kabey.

11 Cʼa cʼariʼ, ri Laman y ri Lemuel xinquichop y xinquixim riqʼuin coloʼ y janíla xinquipokonirisaj. Man riqʼuin vi cʼariʼ, ri Ajaf xuyaʼ kʼij richin xquiben queriʼ chuve, richin chi xtukʼalajirisaj cʼa ri ruchukʼaʼ. Que cʼa chukaʼ riʼa, xtukʼalajirisaj cʼa chiquivech chi xtikʼajer ri ruchʼabel chiquij ri e itzel.

12 Xcʼulvachitej cʼa chi xinquixim, xa cʼa acuchi man xitiquir ta chic xisilon. Ja cʼariʼ tok ri cʼutbel bey ri xuben can ri Ajaf chike, man xsamej ta chic.

13 Roma cʼariʼ tok man quetaman ta chic acuchi xquiqʼuek vi rubey ri nimalwj jucuʼ. Cʼa cʼariʼ, xpe pa kaviʼ jun nimalej camisanel job y jun nimaley y xicʼanilej cakʼikʼ. Ja cʼariʼ tok oxiʼ kʼij xojrutzolij pe riqʼuin jubaʼ xquijikʼ chupan ri yaʼ. Man riqʼuin vi riʼ, man xinquisol ta.

14 Chupan cʼa ri rucaj kʼij tok oj rutzolin pe ri cakʼikʼ, jariʼ tok can xicʼo vi chic ruviʼ xuben ri ruchukʼaʼ ri cakʼik.ʼ

15 Ja cʼariʼ tok xa jubaʼ chic xkajoʼ richin man xojjikʼ ka chuxeʼ ri yaʼ. Cajiʼ kʼij xojtzolitej cʼa chikij pa ruviʼ ri yaʼ. Ja cʼariʼ tok ri nunimal xquitzʼet chi ri cʼajisabel ri nuben ri Dios can cʼo vi pa quiviʼ rijeʼ, y vi man ta xtitzolin cʼa quicʼuʼx chupan ri itzel quibanobal, xa xquecom ta cʼa. Roma cʼariʼ tok xequisol ri ximibel ri cʼo pa ri rukul nukʼaʼ. Can kitzij vi cʼa chi janíla e sipojinek chic, y ri rukul ri vaken chukaʼ janíla xesipoj, y can janíla vi xekʼaxon.

16 Man riqʼuin vi cʼariʼ, xincukubaʼ nucʼuʼx riqʼuin ri nu Dios, y xinyalaʼ cʼa rukʼij chijun kʼij. Man xixebeloj ta cʼa roma ri xintij pokon.

17 Ri nataʼ Leʼi qʼuiy cʼa xubij chique ri nunimal, chukaʼ chique ri rucʼajol ri Ismael. Man riqʼuin vi riʼ, rijeʼ can xquixibij vi ri xabachique ri xchʼo pa nuviʼuin. Ri nteʼ nataʼ e rijixinek chic y janíla pokon xquitij coma ri calcʼual. Roma cʼariʼ tok xeyavej y cʼo chi e cʼo pa chiʼat.

18 Roma cʼa ri quibis y ri rukʼaxon cánima, y roma ri itzel ri quibanalon ri nunimal, rijeʼ jubaʼ man xecom y xebe ta riqʼuin ri qui Dios. Can que vi riʼ, ri saka rusumal quiviʼ rijeʼ jubaʼ chic man xkaka cʼa pa ri pokolaj. Roma cʼariʼ, jubaʼ man xekamuk can chupan ri nimalej yaʼ.

19 Chiriʼ cʼa, ri Jacob y ri José cʼa e alcʼualaʼ na, y cʼatzinel cʼa chique chi yeʼilix. Rijeʼ xebison cʼa roma ri pokon xutij ri quiteʼ. Chukaʼ ri vixjayil yin xokʼ, y xuben lokʼolej chʼoven riqʼuin ri Dios, y queriʼ chukaʼ xquiben ri valcʼual. Man riqʼuin vi cʼa ronojel reʼ, man xchʼuchʼujir ta ri cánima ri nunimal richin ta xinquisol.

20 Xa can manjun vi chic, xaxe cʼa ri ruchukʼaʼ ri Dios, ri jubaʼ man xeruvulaj rijeʼ, ja cʼariʼ ri xchʼuchʼujirisan ri cánima. Roma cʼariʼ, tok rijeʼ xquitzʼet chi xa jubaʼ man xejikʼ cʼanej chuxeʼ ri yaʼ, jariʼ tok xtzolin pe quicʼuʼx chupan ri achique xquiben chuve. Riqʼuin cʼariʼ, rijeʼ xinquisol.

21 Xcʼulvachitej cʼa chi tok rijeʼ xinquisol, jariʼ tok xinchop ri cʼutbel bey y can xsamey vi achiʼel ri xinvajoʼ. Cʼa cʼariʼ, xichʼo akʼanij riqʼuin ri Ajaf. Tok nubanon cʼa chic ri lokʼolej chʼoven riʼ, xtaneʼ cʼa ri cakʼikʼ, y xtaneʼ chukaʼ ri job, y xcʼojeʼ jun nimalej silan.

22 Cʼa cʼariʼ, xinqʼuek rubey ri nimalej jucuʼ, y xkachop chic binen pa ruviʼ ri yaʼ pa ruchojmil ri ruvachʼulef sujun can.

23 Xcʼulvachitej cʼa chi xojbiyin qʼuiy kʼij pa ruviʼ ri yaʼ, xa cʼa tok xojapon pa ri ruvachʼulef sujun can. Chiriʼ cʼa, xojkaka el chuvech ri ruvachʼulef, y xkaben ri kamoʼc. Cʼariʼ, xkayaʼ rubiʼ ri ruvachʼulef riʼ y xubinaiʼaj ri ruvachʼulef sujun can.

24 Xcʼulvachitéj cʼa chi xkachop rusmajixic ri ulef y xekatic ri kijatz kacʼuan. Xekayaʼ cʼa pan ulef conojel ri kijatz ri xekaqʼuen pe pa ri ruvachʼulef Jerusalem. Cʼa cʼariʼ, janíla xeqʼuiyer vi. Que cʼariʼ, can janíla vi xojturusex.

25 Xcʼulvachitej cʼa chi xojbiyaj pa ri tolan ruvachʼulef chupan ri ruvachʼulef sujun can. Chiriʼ cʼa, xkanabej chi e cʼo conojel ruvech chicopiʼ pa ri qʼuechelaj. Xekil ri váquix y ri achij váquix, y ronojel quivech quiej, y ri tzuntzun y ri aj pa kʼayis tzuntzun, y conojel ruvech chicopiʼ ri e cʼo pa kʼayis ri yecʼatzin chire ri achin. Chukaʼ xekil conojel ruvech chʼichʼ, ri kʼana chʼichʼ, y ri saka chʼichʼ, y ri biyul chʼichʼ.