1 Xcʼulvachitej cʼa chi tok in chʼovinek chic riqʼuin ri Ajaf, xitzolin pa rumoʼc ri nataʼ.

2 Xcʼulvachitej cʼa chi rijaʼ xchʼo viqʼuin, y quereʼ xubij chuve: Yin xinben jun achicʼ. Chiriʼ cʼa ri Ajaf xubij chuve chi rat y ri animal cʼo chi yixtzolin pa Jerusalem.

3 Chiriʼ cʼa riqʼuin ri Laban, cʼo ri retal quibanobal ri e aj Judá, y chukaʼ ri retal quibiʼ ri avatiʼt amamaʼ e kʼaxinek el. Ronojel cʼareʼ tzʼibatel can chuvech ri xaxilej tak cʼakoʼj chʼichʼ.

4 Roma cʼariʼ, ri Ajaf rubin pe chuve chi rat quiqʼuin ri animal cʼo chi yixbe chirachoch ri Laban. Chiriʼ cʼa xtibevilaʼ ri retal banobel, y xtibecʼamaʼ pe vaveʼ pa tolan ruvachʼulef.

5 Vacami cʼa, ri animal yexebeloj y niquibij chi cʼayef rubanic ri xinbij chique. Vaveʼ cʼa xa man ja ta yin ri yibin chique. Xa can ja vi reʼ jun rupixaʼ ri Ajaf.

6 Roma cʼariʼ, cabiyin cʼa nucʼajol y ri Ajaf xcaruturusaj roma cʼa rat man yaxebeloj ta.

7 Xcʼulvachitej cʼa chi yin xinbij chire ri nataʼ: Xquibe cʼa y xtinben ronojel ri rubin can ri Ajaf chuve. Roma vetaman cʼa chi manjun pixaʼ nuyaʼ ta ri Ajaf chique ri vinakiʼ, vi man ta nuchojmirisaj cʼa ri bey chiquivech, richin chi xtiquiben ri achique rubin can chique.

8 Xcʼulvachitej cʼa chi tok ri nataʼ xeracʼaxaj re chʼabel reʼjaníla xquicot. Chiriʼ cʼa rijaʼ retaman chi ri Ajaf in ruturusan can.

9 Cʼa cʼariʼ, yin Nefi, quiqʼuin ri nunimal, xekacʼuaj el kamoʼc. Que cʼariʼ, xkachop binen pa tolan ruvachʼulef richin yojapon pa ri ruvachʼulef Jerusalem.

10 Xcʼulvachitej cʼa chi tok oj apovinek chic pa ri ruvachʼulef Jerusalem xojtzijon ka chikavech.

11 Xkakʼijulaʼ achique chike ri nibe chirachoch ri Laban. Ja ri Laman cʼuluman richin nibe. Cʼa cʼariʼ, rijaʼ xbe chirachoch ri Laban y xchʼo riqʼuin tok tzʼuyul chiriʼ pa rachoch.

12 Xucʼutuj cʼa chire ri Laban chi tuyaʼ chire ri retal banobel ri tzʼibatel can chuvech ri xaxilej tak cʼakoʼj chʼichʼ. Ja cʼariʼ ri acuchi tzʼiban vi ri retal quibiʼ ri ijaʼtzul kʼaxinek can richin ri nataʼ.

13 Jariʼ tok ri Laban xoyover riqʼuin, y can xrelesaj el riqʼuin rijaʼ. Man xrajoʼ ta cʼa xuyaʼ ri retal banobel chire. Roma cʼariʼ tok quereʼ xubij chire ri Laman: Ja rat at jun elekʼom y yin xcatincamisaj.

14 Chiriʼ cʼa ri Laman xanimej el chuvech y xorubij chike ronojel ri xuben ri Laban. Cʼa cʼariʼ, janíla xojbison. Ri nunimal jubaʼ man xetzolin riqʼuin ri nataʼ pa ri tolan ruvachʼulef.

15 Jariʼ tok xinbij chique: Can jic vi chi qʼues ri Ajaf, y chukaʼ can jic vi chi oj qʼues roj. Que cʼa chukaʼ riʼ, can jic vi chi man xkojtzolin ta riqʼuin ri katataʼ pa ri tolan ruvachʼulef vi man kacʼuan ta el ri achique rubin can ri Ajaf chike.

16 Roma cʼariʼ, quekatakej cʼa chi utzil ri rupixaʼ ri Ajaf. Joʼ cʼa pa ri ulef ri xrichinaj ri katataʼ. Chiriʼ cʼa e ruyaʼon can rijaʼ ri kʼana puek, y ri saka puek, y conojel ruvech beyomel. Rijaʼ queriʼ cʼa rubanon can richin xerutakej ri rupixaʼ ri Dios.

17 Roma cʼa rijaʼ can retaman vi chi xtivulatej ri Jerusalem roma ri itzel xequibanalaʼ ri vinakiʼ.

18 Rijeʼ xequixutuj cʼa ri quichʼabel ri e yaʼol lokʼolej rutzijol. Roma cʼariʼ, ri Ajaf can xubij vi chire ri nataʼ chi tel el pa ri tinamit. Vi man ta queriʼ xuben, xa xcom ta cʼa rijaʼ chukaʼ. Romariʼ tok cʼo chi xanimej el chupan ri ruvachʼulef.

19 Can utz vi cʼa chuvech ri Dios chi neʼkacʼamaʼ pe ri retal banobel riʼ. Riqʼuin cʼariʼ cʼo banel richin yekatijoj ri kalcʼual chire ri quichʼabel ri kateʼ katataʼ.

20 Que cʼa chukaʼ riʼ, cʼo banel richin quekatijoj ri kalcʼual chique ri chʼabel xequibij can conojel ri e yaʼol lokʼolej rutzijol. Ri chʼabel riʼ, e rujachon ri Dios chique rijeʼ roma ri Ruxlabal y ri ruchukʼaʼ rijaʼ, pa rutiquiribel pe ri ruvachʼulef, cʼa pa re kʼij reʼ.

21 Xcʼulvachitej cʼa chi queriʼ xitzijon quiqʼuin ri nunimal. Que cʼariʼ, xenyukʼ cʼa richin chi xequitakej chi utzil ri rupixaʼ ri Dios.

22 Cʼa cʼariʼ, xojbe ka pa ri kulef kichinan. Chiriʼ cʼa xekamol can ri kakʼana puak, y ri kasaka puak, y chukaʼ ri kabeyomal.

23 Tok xekamol conojel reʼ, xojbe cʼa chic akʼanij chirachoch ri Laban.

24 Xcʼulvachitej cʼa chi xojbe riqʼuin ri Laban. Cʼa cʼariʼ, xkacʼutuj chire chi tuyaʼ chike ri retal banobel ri e tzʼiban can chuvech ri xaxilej tak cʼakoʼj chʼichʼ. Pa ruqʼuexel, roj xkasuj chire ronojel ri kakʼana puak, y ri kasaka puak, y ri kabeyomal.

25 Xcʼulvachitej cʼa chi tok ri Laban xutzʼet chi can janíla kabeyomal, rijaʼ xa xumunij cʼa. Jariʼ tok xojrelesaj el, y xerutek el ri rusamajelaʼ chikij chikacamisaxic. Queriʼ cʼa rijaʼ xtiquir xrelekʼaj can ri kabeyomal.

26 Xcʼulvachitej cʼa chi roj xojanimej chiquivech ri rusamajelaʼ ri Laban. Cʼo cʼa chi xekayaʼ can ri kabeyomal y xecʼojeʼ cʼa can pa ri rukʼaʼ ri Laban.

27 Xcʼulvachitej cʼa chi xojanimej el pa ri tolan ruvachʼulef y xkevaj kiʼ chupan jun jul richin jun abej. Ri rusamajelaʼ ri Laban man xojquickʼiʼ ta cʼa.

28 Xcʼulvachitej cʼa chi xoyover ri Laman viqʼuin yin, y chukaʼ riqʼuin ri nataʼ. Chukaʼ xoyover ri Lemuel roma cʼa rijaʼ xuyaʼ rukʼij ri ruchʼabel ri Laman. Chiriʼ cʼa ri Laman y ri Lemuel can cof vi xechʼo kiqʼuin roj ri oj quichakʼ. Ja cʼariʼ xojquichʼey riqʼuin jun xicʼay.

29 Xcʼulvachitej cʼa chi tok yetajin chikachʼeyic riqʼuin jun xicʼay, jariʼ tok xpe jun rutakonaxel ri Ajaf y xpaʼeʼ chiquivech. Rijaʼ xchʼo quiqʼuin y xubij quereʼ: ¿Achique roma tok nichʼey ri ichakʼ riqʼuin jun xicʼay? ¿La man ivetaman ta cami chi ri Ajaf ruchaʼon rijaʼ richin nucʼuaj ibey rix? Queriʼcʼa xbanatej chive roma ri itzel ri xibanalaʼ. Vacami cʼa, cʼo chi yixbe chic jun bey Jerusalem. Chiriʼ cʼa ri Ajaf xtiberujachaʼ ri Laban pan ikʼaʼ.

30 Tok ri takonaxel chʼovinek chic kiqʼuin, rijaʼ xel cʼa el.

31 Tok benek chic el ri takonaxel, ri Laman y ri Lemuel xexebeloj chic y quereʼ xquibij: ¿Achique cʼa banel tok ri Ajaf xtitiquir xtujech ri Laban pa kakʼaʼ roj? Ri Laban riʼ can jun nimalej achin. Cʼo pa quiviʼ cavinek lajuj achiʼaʼ. Roma cʼariʼ, rijaʼ nitiquir yerucamisaj cavinek lajuj achiʼaʼ. ¿Y cʼa ta man oc chukaʼ roj?