1 Xcʼulvachitej cʼa chi ri Ajaf xchʼo riqʼuin ri nataʼ pa jun achicʼ, y quereʼ xubij: Nim ruva akʼij rat Leʼi roma ri abanon can. Rat xeʼakʼalajirisaj chi utzil chiquivech re vinakiʼ reʼ ronojel ri xinbij chave. Roma cʼariʼ nicajoʼ yatquicamisaj.

2 Cʼa cʼariʼ tok ri Ajaf pa jun achicʼ xubij chire ri nataʼ chi tucʼuaj cʼa el ri ruchinamit y tibe cʼa chupan ri tolan ruvachʼulef.

3 Cʼa cʼariʼ, rijaʼ xunimaj rutzij ri Dios y xuben achiʼel xubij ri Ajaf chire.

4 Jariʼ tok rijaʼ xbe cʼa pa ri tolan ruvachʼulef. Xaxe xerucʼuaj el ri ruchinamit, y ri tak quimoʼc, y ri cʼatzinel chique. Chiriʼ cʼa, xeruyaʼ can ri rachoch y ri rulef richinan. Chukaʼ xeruyaʼ can rukʼana puak, y rusaka puak, y rubeyomal. Cʼa cʼariʼ, xbe cʼa pa ri tolan ruvachʼulef.

5 Xapon cʼa ka pa ri rucʼulbaʼt ri cʼo chunakaj ruchiʼ ri Nimalej Quiek Yaʼ. Xbiyaj cʼa pa rucʼulbaʼt ri tolan ruvachʼulef chunakaj ri Nimalej Quiek Yaʼ. Xbiyaj cʼa chupan ri tolan ruvachʼulef riqʼuin ri ruchinamit. E cʼo chupan ri ruchinamit rijaʼ ri nteʼ Saría, y ri nunimal ri quibiniʼan Laman, Lemuel, y Sam.

6 Xcʼulvachitej cʼa chi tok ri nataʼ biyajinek chic oxiʼ kʼij pa ri tolan ruvachʼulef, xuben rumoʼc pa jun liʼan ruvachʼulef chunakaj jun raken yaʼ.

7 Cʼa cʼariʼ, xunucʼ jun xuculibel riqʼuin abej y xuben jun sujubel chire ri Ajaf. Chukaʼ xumatioxij chire ri Ajaf, ri ka Dios.

8 Xcʼulvachitej cʼa chi ri Leʼi xuyaʼ rubiʼ Laman chire ri raken yaʼ. Ri raken yaʼ riʼ niqʼuis chupan ri Nimalej Quiek Yaʼ. Ri liʼan ruvachʼulef cʼo pa ri cʼulbaʼt chunakej acuchi xtibeqʼuis vi ri raken yaʼ.

9 Ri nataʼ xutzʼet cʼa chi ri raken yaʼ niqʼuis chupan ri Nimalej Quiek Yaʼ. Ja cʼariʼ tok xchʼo riqʼuin ri Laman ri rucʼajol, y quereʼ xubij chire: Ja ta cʼa yatoc achiʼel re raken yaʼ reʼ, y yatocyaj ta benek ruvech chupan ri ralaxibal ri chojmilal.

10 Chukaʼ chire ri Lemuel xubij quereʼ: Ja ta cʼa yatoc achiʼel re liʼan ruvachʼulef reʼ, richin chi at cof ta, y man ta yasilon, richin queriʼ can yeʼatakej vi ri rupixaʼ ri Ajaf.

11 Queriʼ xubij cʼa chique rijeʼ, roma cʼa ri Laman y ri Lemuel janíla rucovil ri cánima. Janíla xexebeloj chirij ri quitataʼ roma rijaʼ xerutzʼetelaʼ tak tzʼetonic. Rijaʼ xerelesaj cʼa el pa Jerusalem. Roma cʼariʼ, rijeʼ xequiyaʼ can ri quikʼana puak, ri quisaka puak, y ri quibeyomal, y ri culef quichinan. Xquibij cʼa chi xquecom na pa ri tolan ruvachʼulef, y conojel reʼ xa roma xquinojij chi chʼujirinek chic ri runaʼoj ri quitataʼ.

12 Quereʼ cʼa ri Laman y ri Lemuel xexebeloj chirij ri quitataʼ, y je rijeʼ ri nimalaxelaʼ. Que cʼareʼ xexebeloj roma xa man quetaman ta cʼa ri rubanobal ri Dios ri tzʼucuyon quichin.

13 Chukaʼ man xquinimaj ta chi ri nimalej tinamit Jerusalem xtivulatej cʼa achiʼel xquibilaʼ ri e yaʼol lokʼolej rutzijol. Rijeʼ e junan cʼa jubaʼ quiqʼuin ri e aj Judá ri e cʼo pa Jerusalem, ri xcajoʼ xquicamisaj ri nataʼ.

14 Xcʼulvachitej cʼa chi ri nataʼ, nojinek riqʼuin ri Uxlabel, xchʼo quiqʼuin rijeʼ riqʼuin ronojel ri ruchukʼaʼ, chiriʼ pa ri liʼan ruvachʼulef rubiniʼan Lemuel. Rijeʼ xecʼaracʼot cʼa chuvech. Rijaʼ xusech cʼa quinaʼoj, y rijeʼ xquixibij quiʼ richin chi man xetzijon ta chic chirij. Roma cʼariʼ, xquiben ri achique xubij cʼa chique.

15 Ri nataʼ, chupan jun moʼc xcʼojeʼ vi.

16 Yin Nefi can cʼa in cʼajol na. Man riqʼuin vi riʼ, nim nupalen y can xinrayij vi xinvetamaj ri evan etamabel richin ri Dios. Roma cʼariʼ, yin can xichʼo vi akʼanij riqʼuin ri Ajaf. Cʼa cʼariʼ rijaʼ xpe viqʼuin y xuchʼuchʼujirisaj ri vánima richin chi xinnimaj ronojel ri xubij can ri nataʼ. Roma cʼariʼ, man xinpabaʼ ta viʼ chuvech ri nataʼ achiʼel xquibanalaʼ ri nunimal.

17 Xichʼo cʼa riqʼuin ri Sam, y xinbij chire ri xukʼalajirisaj ri Ajaf chinuvech yin roma ri Lokʼolej Ruxlabal. Cʼa cʼariʼ, rijaʼ xunimaj ri xinbij chire.

18 Man riqʼuin vi riʼ, ri Laman y ri Lemuel man xequinimaj ta ri nuchʼabel. Yin xibison cʼa roma rucovil ri cánima rijeʼ. Roma cʼariʼ, can xichʼo vi akʼanij chire ri Ajaf coma rijeʼ.

19 Xcʼulvachitej cʼa chi ri Ajaf xchʼo pe chuve, y quereʼ xubij: Nim ruva akʼij rat Nefi roma nim ri acukubabel cʼuʼx. Rat cʼa in acanon riqʼuin ruchʼuchʼujil ri avánima.

20 Vi xqueʼitakej cʼa ri nupixaʼ, xquixqʼuiyer cʼa, y xquixcʼuex chupan jun ruvachʼulef sujun can. Ri ruvachʼulef riʼ nuchojmirisan cʼa can ivichin rix. Ja ruvachʼulef riʼ janíla jebel chiquivech conojel chic ruvachʼulef.

21 Vi ri animal niquipabaʼ cʼa quiʼ chavech rat, jariʼ tok rijeʼ can xqueʼelesex vi el chuvech ri Ajaf.

22 Vi yeʼatakej nupixaʼ, rat xcatoc jun ucʼuey bey y jun tijonel pa quiviʼ ri animal.

23 Kitzij cʼa, pa ri kʼij tok xtiquipabaʼ quiʼ chinuvech, yin can xquenvetzelaj vi riqʼuin jun pokon etzelanic. Vi ri avijaʼtzul rat man xtiquipabaʼ ta quiʼ chinuvech yin, ri animal manek cʼa xticʼojeʼ cuchukʼaʼ pa quiviʼ.

24 Vi ri avijaʼtzul xtiquipabaʼ cʼa quiʼ chinuvech, ri animal xquequinakalaʼ rijeʼ. Quereʼ cʼa xtiban chique richin queriʼ xquinquinataj.