1 Xcʼulvachitej cʼa tok in chʼovinek chic quiqʼuin ri nunimal, rijeʼ quereʼ xquibij chuve: Rat e akʼalajirisan chikavech cʼayef tak naʼoj. Roj xa man yojtiquir ta yekacochʼ.

2 Xcʼulvachitej cʼa chi xinbij cʼa chique chi can kitzij vi ri xintzijoj. Vetaman cʼa chi re tzij reʼ can cʼayef vi chique ri e itzel. Xinbij cʼa chi nuyaʼon quikʼij ri e choj, y nujiquiban chi can xqueyac vi chupan ri ruqʼuisibel kʼij. Cʼariʼ cʼa, ri e cʼo quimac niquinojij chi xa cʼayef ri kitzij, roma cʼa ri kitzij yerusoc rijeʼ, cʼa pa ri quicʼuʼx.

3 Vacami cʼa rix nunimal, vi ta ix choj, man ta chic xquixxebeloj chirij ri kitzij. Man ta chic xtiben queriʼ vi ta xtivajoʼ xtinimaj ri kitzij y xquixbiyin ta choj chuvech ri Dios. Vi ta queriʼ xtiben, man ta xtibij cʼa chuve quereʼ: Xa cʼayef ri nabij chike.

4 Cʼa cʼariʼ, yin Nefi xenpixabaj ri nunimal chi quequitakej cʼa ri rupixaʼ ri Ajaf.

5 Xcʼulvachitej cʼa chi xquichʼuchʼujirisaj ri cánima chuvech ri Ajaf. Riqʼuin cʼariʼ, xiquicot y xinvoyobej pa vánima chi xquebiyin ta chupan ri chojmilej tak bey.

6 Ronojel cʼareʼ xebitej y xebanatej tok ri nataʼ cʼo pa jun moʼc pa ri liʼan ruvachʼulef ri xubiniʼaj Lemuel.

7 Xcʼulvachitej cʼa chi yin Nefi xicʼuleʼ riqʼuin jun chique ri rumiʼal ri Ismael. Chukaʼ ri nunimal xecʼuleʼ quiqʼuin ri rumiʼal ri Ismael. Ri Zoram xcʼuleʼ cʼa riqʼuin ri nimalaxel rumiʼal ri Ismael.

8 Que cʼariʼ, ri nataʼ xerutakej conojel ri rupixaʼ ri e ruyaʼon can ri Ajaf chire. Ri Ajaf chukaʼ janíla xiruturusaj yin Nefi.

9 Xcʼulvachitej cʼa chi ri Ajaf xchʼo riqʼuin ri nataʼ chakʼaʼ. Jariʼ tok xubij chire chi tuchapaʼ binen chic jun bey pa ri tolan ruvachʼulef pa rucaʼn kʼij.

10 Xcʼulvachitej cʼa chi ri nataʼ xyacatej pa nimakʼaʼ. Xbe pa ruchiʼ ri rumoʼc y xutzʼet pa ri ulef jun sirisic cʼakoʼj chʼichʼ can utz rubaniquil. Chupan ri sirisic chʼichʼ riʼ e cʼo caʼiʼ kʼijubel. Jun chique ri kʼijubel riʼ xucʼut ri bey chikavech acuchi yojbe vi pa ri tolan ruvachʼulef.

11 Xcʼulvachitej cʼa chi xekamol ronojel ri xquekacʼuaj cʼa el pa ri tolan ruvachʼulef. Xekamol chukaʼ ri chʼakaʼ chic ri e cʼatzinel chike ri ruyaʼon pe ri Ajaf. Chukaʼ xekamol ronojel ruvech ijatz richin chi yekacʼuaj el pa ri tolan ruvachʼulef.

12 Xcʼulvachitej cʼa chi xekacʼuaj el ri kamoʼc y xkacʼovisaj ri raken yaʼ Laman y xojbe pa ri tolan ruvachʼulef.

13 Xcʼulvachitej cʼa chi xojbiyin cajiʼ kʼij pa ri rajxokon kʼij y ri rajxokon relabal kʼij. Cʼariʼ, xkaben chic ri kamoʼc y xkayaʼ ri rubiʼ ri cʼojlibel riʼ Xazer.

14 Xcʼulvachitej cʼa chi xekacʼuaj el ri kachʼab y ri kacʼakbal chʼab. Cʼariʼ, xojbe pa ri tolan ruvachʼulef chiquicamisaxic e aj pa kʼayis chicopiʼ richin queriʼ cʼo tiʼij niquitij ri kachinamit. Tok kilon cʼa chic ri tiʼij quichin ri kachinamit, xojtzolin chic jun bey pa ri tolan ruvachʼulef cʼa pa ri cʼojlibel rubiniʼan Xazer. Cʼa cʼariʼ xkachop chic binen y xkachojmij kabey junan riqʼuin ri kabanon can. Queriʼ cʼa xojbiyin acuchi cʼo vi ri samajibel ulef. Ri ulef ri cʼo chuchiʼ ri cʼulbaʼt chunakaj ri Nimalej Quiek Yaʼ.

15 Xcʼulvachitej cʼa chi xojbiyin qʼuiy kʼij. Xekacamisaj cʼa chicopiʼ pa bey richin nikatij. Xekacamisaj cʼa quiqʼuin ri kachʼab y ri kabej y ri kiquiekʼ.

16 Xkatzekelbej cʼa ri bey ri xucʼut ri sirisic chʼichʼ chikavech. Jariʼ xucʼuan kichin pa ri janíla samajibel ulef chupan ri tolan ruvachʼulef.

17 Tok xojbiyin chic qʼuiy kʼij, xkaben cʼa ri kamoʼc richin chi yojuxlan jun caʼiʼ oxiʼ kʼij y nikil tiʼij quichin ri kachinamit.

18 Xcʼulvachitej cʼa chi yin Nefi xibe chucanoxic tiʼij. Jariʼ tok xinkʼej ri nucʼakbal chʼab ri banon riqʼuin utzilej chʼichʼ. Chiriʼ cʼa, ri nunimal xeʼoyover viqʼuin roma xkʼaj ri nucʼakbal chʼab y man xkil ta chic pe tiʼij.

19 Ja cʼariʼ tok xojtzolin quiqʼuin ri kachinamit y manek tiʼij kacʼuan. Rijeʼ e cosinek chic roma ri quibinen, y roma cʼariʼ tok janíla xquitij pokon, roma manek chic tiʼij richin niquitij.

20 Xcʼulvachitej cʼa chi ri Laman y ri Lemuel y ri rucʼajol ri Ismael janíla xexebeloj roma xquitij pokon y cʼayeval pa ri tolan ruvachʼulef. Ri nataʼ chukaʼ xebeloj chirij ri Ajaf ru Dios. Chiriʼ cʼa, conojel janíla xebison y janíla xaxebeloj chirij ri Ajaf.

21 Xcʼulvachitej cʼa chi yin Nefi in chʼolin coma ri nunimal, roma xkʼaj ri nucʼakbal. Ri quicʼakbal chʼab rijeʼ man can ta chic cʼo cuchukʼaʼ. Roma cʼariʼ tok nim ri cʼayeval xkacʼulvachij y man xojtiquir ta chic nikil tiʼij.

22 Xcʼulvachitej cʼa chi ri nunimal xquicovirisaj chic ri cánima y janíla xexebeloj chic chirij ri Ajaf qui Dios. Roma cʼariʼ, yin Nefi janíla xichʼo quiqʼuin.

23 Xcʼulvachitej cʼa chi yin Nefi xinben jun cʼakbel chʼab riqʼuin cheʼ. Riqʼuin jun chojilej cheʼ xinben chukaʼ jun nuchʼab. Cʼa cʼariʼ, xinchop jun nuchʼab riqʼuin ri rucʼakbal y chukaʼ jun viquiekʼ quiqʼuin tak abej. Ja cʼariʼ tok xincʼutuj quereʼ chire ri nataʼ: ¿Acuchi cʼa xquibe vi richin xtinvil tiʼij?

24 Xcʼulvachitej chi rijeʼ xquichʼuchʼujirisaj quicʼuʼx roma ri xinbij chique. Roma cʼa qʼuiy xinbij chique riqʼuin ri ruchukʼaʼ ri vánima. Ja cʼariʼ tok ri nataʼ xucʼutuj chire ri Ajaf acuchi xquibe vi yin.

25 Xcʼulvachitej cʼa chi ri ruchʼabel ri Ajaf xpe riqʼuin ri nataʼ. Ri Ajaf can xuchʼolij vi cʼa rijaʼ roma xebeloj chirij ri Ajaf. Roma cʼariʼ, ri nataʼ janíla xbison.

26 Xcʼulvachitej cʼa chi ri ruchʼabel ri Ajaf quereʼ xubij chire: Tatzuʼ cʼa ri sirisic chʼichʼ y tatzʼetaʼ cʼa ri tzʼiban can chuvech.

27 Xcʼulvachitej cʼa chi tok ri nataʼ xutzʼet achique ri tzʼiban chuvech ri sirisic chʼichʼ, jariʼ tok janíla xuxibij riʼ y xcʼaracʼot. Queriʼ chukaʼ xquiben ri nunimal y ri rucʼajol ri Ismael y ri kixjayilal.

28 Cʼa cʼariʼ, yin Nefi xintzʼet chi ri kʼijubel ri e cʼo chupan ri sirisic chʼichʼ xesamej cʼa, achiʼel ri xkacukubaʼ kacʼuʼx chi utzil y xkatakej ri xquicʼut chikavech.

29 Chukaʼ cʼo jun cʼacʼaʼ tzʼibanic ri xtzʼibex chuvech y man cʼayef ta ri rutzʼetic. Ri tzʼibanic riʼ xojrutijoj chique ri rubeyal ri Ajaf. Binakel cʼa xjalatej ri tzʼibanic riʼ achiʼel cʼa ri xkacukubaʼ kacʼuʼx chi utzil riqʼuin. Quereʼ cʼa nikatzʼet chi riqʼuin achique xa chʼutiʼn oc, ri Ajaf nitiquir yeruben nimaʼk tak banobel.

30 Xcʼulvachitej cʼa chi yin Nefi xibe akʼanij pa ruviʼ jun juyuʼ, achiʼel cʼa xukʼalajirisaj ri sirisic chʼichʼ,

31 Chiriʼ cʼa xencamisaj e aj pa kʼayis chicopiʼ. Riqʼuin cʼariʼ, xinvil tiʼij quichin ri kachinamit.

32 Xcʼulvachitej cʼa chi xitzolin pa kamoʼc. E nucʼuan cʼa ri chicopiʼ ri xencamisaj. Tok xquitzʼet cʼa chi vilon tiʼij, can janíla vi xequicot. Jariʼ tok xquichʼuchʼujirisaj quiʼ chuvech ri Ajaf y xquimatioxij chire.

33 Xcʼulvachitej cʼa chi xkachop chic binen. Xkachojmij chic ri kabey junan riqʼuin ri kabanon can pa ri rutiquiribel. Tok xojbiyin chic qʼuiy kʼij, xkaben jun bey chic ri kamoʼc richin oj cʼo can jun caʼiʼ oxiʼ kʼij chiriʼ.

34 Xcʼulvachitej cʼa chi ri Ismael xcom y xmukutej pa ri cʼojlibel rubiniʼan Najom.

35 Cʼa cʼariʼ, ri rumiʼal ri Ismael janíla xeʼokʼ roma xcom ri quitataʼ. Chukaʼ xeʼokʼ roma ri quicʼayeval pa ri tolan ruvachʼulef. Xexebeloj cʼa chirij ri nataʼ roma rijaʼ xerelesaj pe chupan ri ruvachʼulef Jerusalem, y quereʼ xquibij: Xcom ri katataʼ. Roj janíla chic oj biyajinek cʼa pa ri tolan ruvachʼulef. Kacʼovisan qʼuiy rucʼayeval y vayijal. Chakirinek kachiʼ y oj cosinek. Riqʼuin cʼa ronojel re pokonal reʼ, xkojcom cʼa pa ri tolan ruvachʼulef roma ri vayijal.

36 Can que vi riʼ xexebeloj chirij ri nataʼ y chukaʼ chuvij yin. Rijeʼ xquirayij cʼa yetzolin chic pa Jerusalem.

37 Ri Laman quereʼ xubij chire ri Lemuel y chique ri rucʼajol ri Ismael: Tikacamisaj cʼa ri katataʼ y chukaʼ ri kachakʼ Nefi. Rijaʼ rutijon rukʼij richin chi noc katijonel y ri ucʼuey kabey. Xa jacʼa roj ri oj nimalaxelaʼ chuvech rijaʼ.

38 Rijaʼ nubij chi ri Ajaf chʼovinek riqʼuin y chukaʼ chi ri takonaxelaʼ quisamajin pe rijaʼ. Man riqʼuin vi riʼ, roj ketaman chi xa nutzʼuc tzij chikavech. Nubij chike ronojel reʼ y qʼuiy nuben riqʼuin ri novinek runaʼoj richin yojrukʼol. Nunojij cʼa chi riqʼuin jubaʼ xkojrucʼuaj el pa jun ruvachʼulef man etaman ta. Tok oj rucʼuan chic el chiriʼ, nunojij chi xtunimirisaj riʼ richin queriʼ xtoc ri tataʼal pa kaviʼ y ri ucʼuey kabey. Cʼa cʼariʼ, xtuben ta chike xabachique ri nurayij y ri nikaʼ cʼa chuvech. Ja queriʼ cʼa ri nunimal Laman xubij chique, richin chi xoyover ri cánima.

39 Xcʼulvachitej cʼa chi ri Ajaf cʼo kiqʼuin. Kitzij cʼa chi ri ruchʼabel ri Ajaf xpe quiqʼuin y qʼuiy xubij chique. Rijaʼ janíla xeruchʼolij. Tok rijeʼ e chʼolin chic roma ri ruchʼabel ri Ajaf, man xeʼoyover ta chic. Xtzolin cʼa quicʼuʼx chupan ri quimac. Riqʼuin cʼariʼ, ri Ajaf xojruturusaj chic richin xkil tiʼij richin queriʼ man xojcom ta.