1 Vacami cʼa, yin Nefi man nintzʼibaj ta ri retal quibiʼ ri quijaʼtzul ri nataʼ vaveʼ. Chukaʼ cʼa manjun bey apon xtintzʼibaj ta riʼ chuvech re xaxilej tak chʼichʼ reʼ ri nintzʼibaj vacami. Tzʼiban cʼa can chupan ri retal banobel ri xutzʼibaj can ri nataʼ. Roma cʼariʼ, yin man nintzʼibaj ta chic vaveʼ.

2 Xaxe nicʼatzin chuve chi ninbij chi roj oj rijaʼtzul ri José.

3 Man nicʼatzin ta cʼa chuve chi nintzʼibaj ronojel ri rubanobal ri nataʼ. Roma manek banel richin yetzʼibex chuvech re xaxilej tak chʼichʼ reʼ. Jariʼ, xa roma yin ninvajoʼ chi nicʼojeʼ ri cʼojlibel vaveʼ acuchi yentzʼibaj vi ri rubanobal ri Dios.

4 Can xaxe vi reʼ ri janíla ninvajoʼ. Ninvajoʼ cʼa chi yenyukʼ pe ri achiʼaʼ richin yejel apon riqʼuin ri Dios quichin ri Abraham, ri Isaac y ri Jacob, richin chi yecolotej.

5 Roma cʼariʼ, man nintzʼibaj ta ri nikaʼ chiquivech ri niquiben ri itzel. Xa nintzʼibaj ri achique nikaʼ chuvech ri Dios y chiquivech ri man niquiben ta ri itzel.

6 Roma cʼariʼ, jareʼ jun pixaʼ ninyaʼ chique ri vijaʼtzul: Chi man tiquitzʼibaj cʼa chuvech re xaxilej tak chʼichʼ reʼ ri achique manek rejkalen chique ri calcʼual ri achiʼaʼ.