1 Vacami cʼa, ninvajoʼ chi nivetamaj chi ri nataʼ Leʼi xutanabaʼ ruyaʼic lokʼolej rutzijol chirij ri rijaʼtzul rijaʼ. Cʼa cʼariʼ, ri Ajaf xpe chic jun bey riqʼuin y xtzijon riqʼuin. Xubij chire chi man utz ta chi rijaʼ xquerucʼuaj el ri ruchinamit quiyon oc pa ri tolan ruvachʼulef. Xa nicʼatzin chi ri rucʼajol yecʼuleʼ quiqʼuin kʼopojiʼ. Queriʼ cʼa, rijeʼ xquetiquir xtiquiqʼuiytisaj jun vinakul chire ri Ajaf chiriʼ pa ri ruvachʼulef sujun can.

2 Xcʼulvachitej cʼa chi ri Ajaf xubij chire ri nataʼ chi yin, quiqʼuin ri nunimal, cʼo chi yojtzolin chic pa ri ruvachʼulef Jerusalem. Chiriʼ cʼa, xquekaqʼuem pe pa ri tolan ruvachʼulef ri Ismael y ri ruchinamit rijaʼ.

3 Cʼariʼ xcʼulvachitej chi yin Nefi, quiqʼuin ri nunimal, xojbe chic jun bey pa tolan ruvachʼulef, cʼa pa Jerusalem.

4 Xcʼulvachitej cʼa chi xojbe akʼanij chirachoch ri Ismael. Ri Ismael can utz vi xojrucʼul. Cʼariʼ roj xekachʼabalij ri ruchʼabel ri Ajaf chire.

5 Xcʼulvachitej cʼa chi ri Ajaf xuchʼuchʼujirisaj ri cánima ri Ismael y ri e aj pa rachoch. Roma cʼariʼ tok rijeʼ xquichop binen kiqʼuin pa ri tolan ruvachʼulef, cʼa pa ri rumoʼc ri katataʼ.

6 Yojtajin cʼa che binen pa tolan ruvachʼulef. Ja cʼariʼ tok ri Laman y ri Lemuel quiqʼuin caʼiʼ chique ri rumiʼal ri Ismael, y caʼiʼ rucʼajol, y conojel ri quichinamit rijeʼ, xquipabaʼ quiʼ chikavech roj. Xquipabaʼ cʼa quiʼ chinuvech yin Nefi, y chuvech ri Sam, chukaʼ ri Ismael ri quitataʼ, riqʼuin ri rixjayil rijaʼ, y ri oxiʼ chic rumiʼal.

7 Xcʼulvachitej cʼa chi rijeʼ xquipabaʼ quiʼ chikavech roma xquirayij xetzolin ta pa ri ruvachʼulef Jerusalem.

8 Vacami cʼa, yin Nefi xibison roma ri rucovil ri cánima. Roma cʼariʼ, xichʼo quiqʼuin ri Laman y ri Lemuel. Quereʼ cʼa xinbij chique: Vaveʼ cʼa rix ix nunimal. ¿Achique roma can cof vi ri ivánima y can moy vi ri inaʼoj? Xa roma cʼariʼ tok cʼo chi yichʼo iviqʼuin y nincʼut utzilej banobel chivech, y yin xa in ichakʼ rix.

9 ¿Achique cʼa roma tok rix man iniman ta ri ruchʼabel ri Ajaf?

10 ¿Achique cʼa roma tok imestan chic chi xitzʼet jun takonaxel richin ri Ajaf?

11 ¿Achique cami roma tok e imestan chic ri nimalej tak utzil ri xerubanalaʼ ri Ajaf chike? Rijaʼ xojrucol cʼa el pa rukʼaʼ ri Laban. Chukaʼ xojrutoʼ richin xkachop ri retal banobel.

12 ¿Achique cʼa roma tok imestan chi ri Ajaf nitiquir nuben ronojel chique ri calcʼual ri achiʼaʼ, achiʼel cʼa ri nrajoʼ rijaʼ? Can que vi riʼ nuben quiqʼuin rijeʼ vi niquisamajij cʼa ri quicukubabel cʼuʼx riqʼuin. Romariʼ, tikanimaj cʼa rijaʼ chi utzil.

13 Vi nikanimaj rijaʼ chi utzil, roj xtikacʼul cʼa ri ruvachʼulef sujun can. Pa chʼakaʼ chic kʼij apon, rix xtivetamaj chi xtikʼajer ri ruchʼabel ri Ajaf chirij ri ruvulatajic ri Jerusalem. Ronojel cʼa ri rubin can ri Ajaf chirij ri vulatajic richin ri Jerusalem, can xtibanatej vi.

14 Can kitzij vi chi xa jubaʼ chic apon tok ri Ruxlabal ri Ajaf man xtutij ta chic rukʼij quiqʼuin rijeʼ. Roma can kitzij chi rijeʼ e quixovan chic ri e yaʼol lokʼolej rutzijol, y quiyaʼon can ri Jeremías pa cheʼ. Quitijon quikʼij richin niquicamisaj ri nataʼ yin. Riqʼuin cʼariʼ, rijeʼ cokotan el rijaʼ pa ri ruvachʼulef riʼ.

15 Can kitzij vi ninbij chive chi vi rix yixtzolin chic pa Jerusalem, xquixcom cʼa quiqʼuin rijeʼ. Vacami cʼa vi queriʼ nivajoʼ, quixtzolin cʼa akʼanij pa ri ruvachʼulef riʼ. Man riqʼuin vi riʼ, tokaʼ cʼa chiʼicʼuʼx ri chʼabel ri ninbij chive. Vi ta yixbe, xquixcom ta cʼa chukaʼ. Can que vi reʼ yirusiloj ri Ruxlabal ri Ajaf richin ninbij chive.

16 Xcʼulvachitej cʼa chi tok yin Nefi xinbij re chʼabel reʼ chique ri nunimal, rijeʼ xeʼoyover cʼa viqʼuin. Cʼariʼ xinquiyut riqʼuin ri quikʼaʼ roma cʼa janíla xeʼoyover. Cʼariʼ, xinquixim riqʼuin jun coloʼ y xcajoʼ xinquicamisaj richin xinquiyaʼ can pa tolan ruvachʼulef, richin queriʼ xinquitij ta cʼa ri e aj pa kʼayis chicopiʼ.

17 Man riqʼuin vi riʼ, xcʼulvachitej cʼa chi xichʼo akʼanij riqʼuin ri Ajaf, y quereʼ xinbij chire: O Ajaf, roma ri nucukubabel cʼuʼx aviqʼuin, quinacoloʼ cʼa pa quikʼaʼ ri nunimal. Tayaʼ cʼa vachukʼaʼ richin yitiquir ninrokʼochʼij re coloʼ reʼ achojiqʼuin in ximon vi.

18 Xcʼulvachitej cʼa tok xinbij re chʼabel reʼ, xequiritej el ri ximibel pa nukʼaʼ y pa vaken. Cʼariʼ xipaʼeʼ chiquivech ri nunimal y xichʼo chic quiqʼuin rijeʼ.

19 Xcʼulvachitej cʼa chi xeʼoyover chic jun bey viqʼuin y xcajoʼ chic xinquichop. Vaveʼ cʼa jun chique ri rumiʼal ri Ismael, riqʼuin ri ruteʼ, y chukaʼ jun chique ri rucʼajol ri Ismael, can xechʼo vi quiqʼuin ri nunimal. Riqʼuin cʼariʼ, xchʼuchʼujir ri cánima y xqʼuis ri quirayibal richin yinquicamisaj.

20 Xcʼulvachitej cʼa chi xebison roma ri itzel ri xquiben y xexuqueʼ chinuvech. Chiriʼ cʼa, rijeʼ can xquicʼutuj vi chuve chi yencuy cʼa roma ri xquiben chuve.

21 Cʼa cʼariʼ, can xencuy vi cʼa roma ronojel ri xquiben chuve. Chukaʼ xenpixabaj chi quechʼo cʼa akʼanij riqʼuin ri Ajaf qui Dios richin chi rijaʼ xquerucuy cʼa chukaʼ. Cʼa cʼariʼ rijeʼ xquiben queriʼ. Tok e chʼovinek chic akʼanij riqʼuin ri Ajaf, xkachop chic el binen cʼa acuchi cʼo vi ri rumoʼc ri katataʼ.

22 Xcʼulvachitej cʼa chi yin, quiqʼuin ri nunimal, y conojel ri e aj pa rachoch ri Ismael xojapon ka pa ri rumoʼc ri nataʼ. Ja cʼariʼ tok rijeʼ xquimatioxij chire ri Ajaf qui Dios. Cʼa cʼariʼ xquiben camelabel sujubel y poron sujubel chire.