Ri Nabey Vuj richin ri Nefi
Ri Lokʼolej Rusamaj y ri Rajavarisanen
Re vuj reʼ nutzijoj ri quicʼaslen ri Leʼi, ri Saría ri rixjayil, y ri cajiʼ rucʼajol. Nitiquir cʼa el riqʼuin ri nimalaxel, cʼa riqʼuin ri ruqʼuisibel chakʼlaxel, rijeʼ quibiniʼan Laman, Lemuel, Sam, y Nefi. Ri Leʼi nuyaʼ lokʼolej rutzijol chique ri vinakiʼ chirij ri itzel yequibanalaʼ. Roma cʼariʼ, rijeʼ nicajoʼ niquicammisaj. Roma cʼariʼ, ri Ajaf nubij chire chi tel el chupan ri ruvachʼulef Jerusalem. Nibiyin quiqʼuin ri ruchinamit oxiʼ kʼij chupan ri tolan ruvachʼulef. Ri Nefi quiqʼuin ri runimal yetzolin pa ri tinamit Jerusalem richin neʼquicʼamaʼ pe ri retal quibanobal ri e aj Judá. Jariʼ tok niquitij pokonal. Cʼa cʼariʼ, yecʼuleʼ quiqʼuin ri rumiʼal ri Ismael. Yequicʼuaj el ri quichinamit cʼa pa ri tolan ruvachʼulef. Niquitij pokonal y cʼayeval chupan ri tolan ruvachʼulef. Nutzijoj ri acuchi yebiyin vi. Yeʼapon chuchiʼ ri nimalej yaʼ. Niquiyaʼ rubiʼ ri cʼojlibel riʼ Janíla Nivachin. Ri runimal ri Nefi niquipabaʼ quiʼ chuvech. Rijaʼ nusech quinaʼoj y nuben jun nimalej jucuʼ. Niquicʼovisaj cʼa ri nimalej yaʼ y yeʼapon chupan ri ruvachʼulef sujun can. Ronojel reʼ xa ri tzʼibatajinek can roma ri Nefi. Pa jun chic chʼabel, yin Nefi xintzʼibaj can reʼ.
Tanaj 1
Ri Leʼi yerutzʼet jun boraj kʼakʼ y ri vuj richin lokʼolej rutzijol. Nuyaʼ lokʼolej rutzijol chirij ri xtucʼulvachij ri Jerasulem y nubij chi ri Mesías xtokaʼ pe. Ri e aj Judá nicajoʼ niquicamisaj.
1 Yin Nefi xinalex pe quiqʼuin utzilej ri nteʼ nataʼ. Queriʼ cʼa ri nataʼ xirutijoj che ri retamabal rijaʼ. Pa nucʼaslen yin, e nutzʼeton e qʼuiy cʼayeval. Man riqʼuin vi riʼ, ri Ajaf janíla in ruturusan jutakel. Kitzij cʼa chi yin vetaman qʼuiy chirij ri utzil y ri evan etamabel richin ri Dios. Roma cʼariʼ nintzʼibaj can ri nicʼulvachitej pa ri nucʼaslen yin.
2 Nintzʼibaj cʼa pa ri ruchʼabel ri nataʼ. Ri chʼabel riʼ rucʼuan ri etamanic quichin ri e aj Judaʼ y chukaʼ ri quichʼabel ri e aj Egipto.
3 Yin vetaman cʼa chi can kitzij vi ri nintzʼibaj. Nintzʼibaj cʼa riqʼuin ri nukʼaʼ yin. Nintzʼibaj cʼa junan riqʼuin ri vetaman yin.
4 Ri nataʼ yin xaxe pa Jerusalem rukʼaxan rucʼaslen rijaʼ. Xcʼulvachitej cʼa chi jun achin rubiniʼan Sedecías, ja rijaʼ ri tataʼal richin ri tinamit Judaʼ. Pa ri nabey junaʼ tok rijaʼ xoc tataʼal richin ri tinamit riʼ, jariʼ tok xeʼapon janíla e yaʼol lokʼolej rutzijol chiriʼ. Rijeʼ xquibij can chique ri vinakiʼ chi titzolin pe quicʼuʼx o can xtivulatej vi ri nimalej tinamit Jerusalem.
5 Cʼa cʼariʼ ri nataʼ Leʼi xel el y xchʼo akʼanij riqʼuin ri Ajaf. Chiriʼ cʼa, rijaʼ xchʼo akʼanij riqʼuin ronojel ri ránima pa quiviʼ ri ruvinak.
6 Xcʼulvachitej cʼa chi tok xchʼo akʼanij riqʼuin ri Ajaf, xkaka pe jun boraj kʼakʼ y xpaʼeʼ chuvech rijaʼ pa ruviʼ jun abej. Jariʼ tok rijaʼ xutzʼet y xracʼaxaj e qʼuiy. Cʼa cʼariʼ, janíla xyiquiyoʼ y xbaybot roma ri xutzʼet y ri xracʼaxaj.
7 Cʼa cʼariʼ, xtzolin chic chirachoch pa Jerusalem. Chiriʼ cʼa xtzak pa ruchʼat roma ri ruchukʼaʼ ri Uxlabel y ri achique xutzʼet.
8 Tok rijaʼ queriʼ rubanon, xucʼuex cʼa el chupan jun tzʼetonic. Xutzʼet cʼa chi ri caj xjakatej y xunojij chi xutzʼet ri Dios tzʼuyul pa ri lokʼolej rucʼojlibal. Ri Dios quisutin rij janíla takonaxelá. Rijeʼ xebixan cʼa y xquiyaʼ rukʼij rijaʼ.
9 Ja cʼariʼ tok xutzʼet chi cʼo jun xel pe pa ri caj. Rijaʼ janíla nitzuʼun chuvech ri kʼij pa nicʼaj kʼij.
10 Chukaʼ xerutzʼet cablajuj chic ri xcokaj pe rijaʼ. Rijeʼ janíla yetzuʼun chiquivech ri tak chʼumilaʼ ri e cʼo chicaj.
11 Xekaka pe y xebiyin chuvech re ruvachʼulef. Ri nabiyel pe xokaʼ y xpaʼeʼ chuvech ri nataʼ. Cʼa cʼariʼ xuyaʼ jun vuj chire y xubij chi tusiqʼuij ruvech.
12 Xcʼulvachitej cʼa chi tok xusiqʼuij ruvech ri vuj riʼ, rijaʼ xnoj riqʼuin ri Ruxlabal ri Ajaf.
13 Xusiqʼuij cʼa ruvech, y quereʼ xubij: Joʼoc avech rat Jerusalem. Yin e nutzʼeton can ri itzel tak abanobal. Ri nataʼ xutzʼet chukaʼ chi ri Jerusalem y ri e cʼo chiriʼ xquevulatej can. E qʼuiy xquecamisex roma ri tzaqʼuibel y e qʼuiy xquechapatej el y xquecʼuex cʼa el pa Babilonia. Ri nataʼ xutzʼet cʼa qʼuiy chirij ri Jerusalem.
14 Xcʼulvachitej cʼa chi ri nataʼ xerutzʼet chuvech ri vuj riʼ e qʼuiy nimalej y meyel tak banobel. Jariʼ tok rijaʼ quereʼ xubij chire ri Ajaf: Yalan nimaʼk y meyel ri asamaj, O Rat Ajaf Ronojel Tiquirel. Ri lokʼolej acʼojlibal cʼo nej chicaj. Ri avuchukʼaʼ, y ri avutzil, y ri ajoyovabal e cʼo pa quiviʼ conojel ri vinakiʼ ri e cʼo chuvech re ruvachʼulef. Rat can at joyovanel vi. Roma cʼariʼ, man xtayaʼ ta kʼij chi xquesach ri xcatquitzekelbej.
15 Queriʼ cʼa xeʼrubilaʼ ri nataʼ tok xuyaʼ rukʼij ri ru Dios. Can xquicot vi ri ránima. Chukaʼ xnoj rucʼuʼx roma ri xutzʼet. Ja cʼariʼ ri xucʼut can ri Ajaf chuvech.
16 Vacami cʼa, yin Nefi man nintzʼibaj ta ronojel ri xutzʼibaj can ri nataʼ. Rijaʼ e rutzʼiban can qʼuiy chique ri xerutzʼet pa tzʼetonic y pa achicʼ. E rutzʼiban can chukaʼ qʼuiy chique ri lokʼolej rutzijol ri xuyaʼ rijaʼ y ri achique xubij chique ri ralcʼual. Ronojel cʼareʼ, man xtintzʼibaj ta cʼa yin.
17 Xa xtintzʼibaj cʼa ri xinbanalaʼ pa ri nucʼaslen yin. Vacami cʼa, nintzʼibaj xa jubaʼ chire ri xutzʼibaj ri nataʼ. Riʼnintzʼibaj cʼa chuvech ri xaxilej tak chʼichʼ ri xinben riqʼuin ri nukʼaʼ yin. Cʼa cʼariʼ, tok xtintzʼibaj cʼa chic jubaʼ chire ri xutzʼibaj ri nataʼ, jariʼ tok xtintzʼibaj can ri nucʼaslen yin.
18 Roma cʼariʼ, ninvajoʼ chi nivetamaj chi ri Ajaf xerucʼut e qʼuiy meyel tak cʼulvachitajic chuvech ri nataʼ Leʼi chirij ri ruvulalen ri Jerusalem. Jariʼ tok rijaʼ xbe cʼa chiquicojol ri vinakiʼ y xuchop ruyaʼic lokʼolej rutzijol. Xerukʼalajirisaj cʼa chiquivech ri xerutzʼet can y ri xeracʼaxaj.
19 Xcʼulvachitej cʼa chi ri e aj Judá xetziʼen chirij rijaʼ roma ri achique xujiquibaʼ chiquivech. Rijaʼ xtzijon cʼa chiquij ri quetzelal y ri itzel quibanobal. Xjiquiban chukaʼ chiquij ri xerutzʼet, y ri xeracʼaxaj, y chukaʼ ri xerusiqʼuij chupan ri jun vuj. Xubij cʼa chi ronojel riʼ xa jebel niquikʼalajirisaj chi can xtipe vi jun Mesías y chi xtiyatej ri quicolotajic ri vinakiʼ ri e cʼo chuvachʼulef.
20 Cʼa cʼariʼ, tok ri e aj Judá xcacʼaxaj riʼ, can xeʼoyover vi riqʼuin. Que cʼa chukaʼ riʼ, xquibanalaʼ can chique ri e yaʼol lokʼolej rutzijol ojer. Xequixovalaʼ el, y xequicʼakalaʼ che abej, y xequicamisalaʼ. Queriʼ cʼa chukaʼ rijeʼ xquitij quikʼij richin niquicamisaj ri nataʼ. Man riqʼuin vi riʼ, yin Nefi xtincʼut chivech rix chi ri Ajaf nujoyovaj quivech conojel ri e ruchaʼon, roma cukul cʼa can quicʼuʼx. Rijaʼ yerutoʼ cʼa richin chi niquicol quiʼ pa quikʼaʼ ri vinakiʼ.