1 Xcʼulvachitej cʼa chi xojbe riqʼuin ri katataʼ chupan ri tolan ruvachʼulef. Jariʼ tok rijaʼ xnoj riqʼuin quicoten. Ri nteʼ chukaʼ can xquicot vi. Rijaʼ janíla okʼovinek cʼa chic koma roj.

2 Rijaʼ xunojij cʼa chi roj xojcom chiriʼ pa tolan ruvachʼulef. Chukaʼ xchʼolin chirij ri nataʼ. Xubij chire chi rijaʼ xa jun achin yerutzʼetelaʼ tak tzʼetonic. Quereʼ xubij: Vacami cʼa rat xa xojavelesaj pe chupan ri kulef kichinan. Xecom ri val y roj chukaʼ xkojcom vaveʼ pa ri tolan ruvachʼulef.

3 Ja cʼareʼ ri ruchʼabel ri nteʼ tok xchʼolin chirij ri nataʼ.

4 Xcʼulvachitej cʼa chi ri nataʼ xchʼo riqʼuin rijaʼ y quereʼ xubij: Yin vetaman chi nintzʼetelaʼ lokʼolej tzʼetonic. Vi man ta xintzʼet ri nubanalaʼ ri Dios, man ta xinvetamaj ri rutzil rijaʼ. Xaxe xicʼojeʼ ta can chiriʼ pa Jerusalem y chiriʼ ta xquicom vi quiqʼuin ri vachʼalal.

5 Nucʼulun cʼa vacami jun ruvachʼulef sujun can. Roma cʼariʼ, janíla yiquicot. Vetaman cʼa chi ri Ajaf xquerucol ri kalcʼual pa rukʼaʼ ri Laban, y xqueruqʼuem pe chic kiqʼuin.

6 Queriʼ cʼa, ri nataʼ xucukubaʼ rucʼuʼx ri nteʼ Saría koma roj. Ja cʼariʼ tok xojbiyin akʼanij chupan ri tolan ruvachʼulef, cʼa pa ri ruvachʼulef ri Jerusalem, richin chi xebekacʼamaʼ pe ri retal quibanobal ri e aj Judá.

7 Tok xojtzolin cʼa chic pa ri rumoʼc ri nataʼ, can janíla vi xequicot rijeʼ y ri nteʼ man xbison ta chic.

8 Rijaʼ xchʼo cʼa y quereʼ xubij: Vacami can vetaman vi chi ri Ajaf rubin can chire ri vachijil richin xanimej pe cʼa chupan ri tolan ruvachʼulef. Chukaʼ vetaman chi ri Ajaf xeruchajij ri val y xerucol pa rukʼaʼ ri Laban. Vetaman cʼa chukaʼ chi ri Ajaf xuyaʼ cuchukʼaʼ richin chi xquiben ri achique xubij cʼa rijaʼ chique. Queriʼ cʼa ri xubij ri nteʼ.

9 Xcʼulvachitej cʼa chi janíla xequicot y xequiben camelabel sujubel y poron sujubel chire ri Ajaf. Chukaʼ xquimatioxij chire ri Dios richin ri Israel.

10 Tok quimatioxin cʼa chic chire ri Dios richin ri Israel, jariʼ tok ri nataʼ Leʼi xeruqʼuen pe ri retal banobel ri tzʼibatel can chuvech ri xaxilej tak cʼakoʼj chʼich. Cʼa cʼariʼ, rijaʼ xerunicʼoj pa rutiquiribel pe.

11 Rijaʼ xutzʼet cʼa chi e rucʼuan ri voʼoʼ vuj richin ri Moisés. Jariʼ ri nutzijoj tok xtzʼucutej pe ri ruvachʼulef, y chukaʼ tok xetzʼucutej pe ri Adán y ri Eva. Jecʼa rijeʼ ri nabey kateʼ katataʼ.

12 Chukaʼ rucʼuan ri retal quicʼaslen ri e aj Judá pa tok rutiquiribel pe, xa cʼa tok ri Sedecías xoc ri tataʼal richin ri tinamit Judá.

13 E rucʼuan chukaʼ e qʼuiy lokʼolej rutzijol ri xequiyalaʼ pe ri e yaʼol lokʼolej rutzijol pa rutiquiribel pe, cʼa tok ri Sedecías xoc ri rutataʼal ri tinamit. E rucʼuan chukaʼ e qʼuiy lokʼolej rutzijol ri xeruyaʼ ri Jeremías.

14 Xcʼulvachitej chukaʼ chi ri nataʼ Leʼi xril chuvech ri xaxilej tak cʼakoʼj chʼichʼ ri retal quibiʼ ri quijaʼtzul ri rutataʼ rijaʼ. Chiriʼ cʼa, xretamaj chi rijaʼ jun rijaʼtzul ri José. Ri José riʼ, ja rijaʼ ri rucʼajol ri Jacob. Ja rijaʼ ri xcʼayix el pan Egipto. Ja rijaʼ ri xtoʼox roma ri Ajaf richin chi rijaʼ xeberilij ri rutataʼ Jacob, y chukaʼ ri e cʼo pa rachoch. Romaʼ cʼariʼ, man xecom ta roma ri vayijal.

15 Rijeʼ chukaʼ xeʼoskʼopix el y xeʼelesex el pa ri ruvachʼulef Egipto roma ri Dios. Ja rijaʼ ri chajiyon quichin.

16 Quereʼ cʼa ri nataʼ Leʼi xunabej ri retal quibiʼ quijaʼtzul ri rutataʼ. Chukaʼ ri Laban jun rijaʼtzul can ri José. Roma cʼariʼ tok rijaʼ y ri rutataʼ xequichajij ri retal banobel.

17 Vacami cʼa, tok ri nataʼ xerutzʼet conojel reʼ, rijaʼ xnoj riqʼuin ri Uxlabel. Cʼa cʼariʼ, xuyaʼ lokʼolej rutzijol chirij ri rijaʼtzul rijaʼ.

18 Xubij chi re xaxilej tak cʼakoʼj chʼichʼ reʼ xquecʼuex el chique conojel tinamit, ijaʼtzul, chʼabel, y vinakul ri can rijaʼtzul vi rijaʼ.

19 Romaʼ cʼariʼ, manjun bey xquesach ta re xaxilej tak cʼakoʼj chʼichʼreʼ. Que cʼa chukaʼ riʼ, manjun bey xquepusir ta. Ri nataʼ Leʼi xeruyaʼ cʼa e qʼuiy lokʼolej rutzijol chirij ri rijaʼtzul.

20 Xcʼulvachitej cʼa chi cʼa pa ri kʼij riʼ, yin y chukaʼ ri nataʼ xekatakej conojel ri pixaʼ ri xeruyaʼ can ri Ajaf chike.

21 Can xekaqʼuen vi pe ri retal banobel achiʼel ri Ajaf xubij can chike. Chukaʼ xekanicʼoj y xkanabej chi can e cʼatzinel vi, y can nim vi ri quejkalen chikavech roj. Riqʼuin cʼariʼ, cʼo banel richin yekatijoj ri kalcʼual chique ri rupixaʼ ri Dios.

22 Roma can jareʼri utzilej runojibal ri Ajaf chi xquekacʼuaj el tok xojbiyin chupan ri tolan ruvachʼulef, cʼa pa ri ruvachʼulef sujun can.