1 Ket ita, Jacob, kunak kenka: Sika ti inauna nga anakko iti aldaw ti panagtutuokko iti langalang. Ket kitaen, bayat ti kinaubingmo nagsagabaka iti adu a rigat ken leddaang, gapu iti kinasabrak dagiti kabsatmo.

2 Nupay kasta, Jacob, inauna nga anakko iti langalang, ammom ti kinaindaklan ti Dios; ket ikonsagrarna dagiti sagabaem nga agpaay a pagimbagam.

3 Gapuna, mabendisionan ti kararuam, ket makipagnaedka a sitatalged ken ni kabsatmo a Nephi; ket mabubos dagiti aldawmo nga agserbi iti Diosmo. Gapuna, ammok a nasubbotka, gapu iti kinalinteg ti Mannubbotmo; gapu ta naimatangam nga iti tumutop a panawen umay isuna tapno ipaayna ti pannakaisalakan dagiti tattao.

4 Ket naimatangam iti kinaagtutubom ti kinadayagna; gapuna, nagasatka a kas kadagiti pagserbiannanto iti nainlasagan a bagi; gapu ta agpadpada ti Espiritu, idi, ita, ken iti agnanayon. Ket naisagana ti dalan manipud idi pannakatnag ti tao, ken ti pannakaisalakan ket awan bayadna.

5 Ket naan-anay ti pannakaiwanwan dagiti tattao a mangammo ti naimbag manipud iti dakes. Ket naited kadagiti tattao ti linteg. Ket babaen ti linteg, awan iti lasag ti maikalintegan; wenno, babaen ti linteg dagiti tattao ket mailaksid. Wen, nailaksidda babaen ti naindagaan a linteg; ken kasta met a napukawda babaen ti naespirituan a linteg manipud iti naimbag, ket nagbalinda a nakakaasi iti agnanayon.

6 Gapuna, dumtengto ti pannakasubbot ken babaen ti Nasantuan a Mesias; agsipud ta napnuan iti parabur ken kinapudno.

7 Kitaen, indatonna ti bagina a pangsubbot iti basol, a mangsungbat iti pagpatinggaan ti linteg, kadagiti amin a naaddaan iti nasneban a puso ken napnuan babawi nga espiritu; ket awan ti sabali a makasungbat iti pagpatinggaan ti linteg.

8 Gapuna, anian ti kinapateg unay ti pannakaipakaammo dagitoy a banag kadagiti agnaed iti daga, ta maammuanda nga awan ti lasag a makapagnaed iti sidong ti Dios, malaksid no adda pammateg, panangngaasi ken parabur ti Nasantuan a Mesias, a nangipaay iti biagna a mayannurot iti lasag, ken alaennanto manen babaen ti pannakabalin ti Espiritu, tapno maipatungpalna ti panagungar dagiti natay, ta isu ti umuna a nasken nga agungar.

9 Gapuna, isuna ti umuna a bunga iti Dios, gapu ta isu ti mangibabaet iti amin nga annak ti tattao; ket maisalakan ti siasino man a mamati kenkuana.

10 Ket gapu ti pannakaibabaet iti amin, umasideg amin a tao iti Dios; gapuna, tumakderda iti imatangna, tapno ukomenna ida a mayannurot iti kinapudno ken kinasanto nga adda kenkuana. Gapuna, inted ti Nasantuan ti kalikagum ti linteg, iti pannakaipatay ti naikappeng a pannusa, ta maisuppiat ti naikappeng a pannusa iti dayta a naikappeng a kinaragsak, a mangsungbat iti kalikagum ti pannubbot—

11 Ta nasken nga, adda pagsusupadian ti amin a banag. Ta no saan a kasta, inauna nga anakko iti langalang, saan a maipatungpal ti kinalinteg, wenno ti kinadakes, wenno ti kinasanto wenno kinarigat, naimbag wenno dakes. Gapuna, nasken a mapagkaykaysa ti amin a banag; gapuna, no masapul a maymaysa a bagi, nasken nga agtalinaed a kas natay, nga awanan iti biag wenno pannakatay, wenno panagrupsa ken saan a panagrupsa, kinaragsak wenno kinarigat, wenno panagrikna wenno awanan rikna.

12 Gapuna, nasken a naiparsua koma para iti banag nga awan kaes-eskanna; gapuna awan koma ti panggep iti nakaigapuan ti pannakaparsuana. Gapuna, nasken a dadaelen daytoy a banag ti kinasirib ti Dios ken dagiti agnanayon a gandatna, ken kasta met ti pannakabalin, ken panangngaasi, ken ti kinalinteg ti Dios.

13 Ket no kunayo nga awan ti paglintegan, kunayo met ngarud nga awan ti basol. Ket no kunayo nga awan ti basol, kunayo met ngarud nga awan ti kinalinteg. Ket no awan ti kinalinteg awan ti kinaragsak. Ket no awan ti kinalinteg wenno kinaragsak awan koma ti pannakadusa wenno panagrigat. Ket no awan dagitoy a banag ket awan ti Dios. Ket no awan ti Dios awantayo, wenno ti daga; ta awan koma ti panagparsua kadagiti bambanag, no dagiti banag nga agtignay wenno bambanag a pagtignayen; gapuna, napukaw koman ti amin a banag.

14 Ket ita, annakko, ibagak kadakayo dagitoy a banag para iti pagimbagan ken pagadalanyo; ta adda Dios, ket pinarsuana ti amin a banag, agpadpada ti langit ken daga, ken amin a banag a linaonda, agpadpada dagiti bambanag nga agtignay wenno dagiti bambanag a pagtignayen.

15 Ket tapno matungpal ti agnanayon a panggepna iti panungpalan ti tao, kalpasan a pinarsuana dagiti immuna a nagannaktayo, ken dagiti ayup iti taltalon ken dagiti tumatayab iti tangatang, ket iti kamaudiananna, ti amin a banag a naparsuan, nasken nga adda pagsusupadian; uray pay ti naiparit a bunga a maisupadi iti kayo ti biag; nasam-it ti maysa ket napait ti sabali.

16 Gapuna, pinalubosan ti Apo a Dios iti tao nga agtignay iti bukodna a bagi. Gapuna, saan a makapagtignay ti tao iti bukodna a bagi malaksid no maguyugoy ti maysa wenno ti sabali.

17 Ket siak, ni Lehi, kas mayannurot kadagiti banag a nabasak, nasken a mammatiak a maysa nga anghel ti Dios, ti natinnag manipud iti langit kas mayannurot iti naisurat; gapuna, nagbalin isuna a sairo, ta pinaggepna ti dakes iti sango ti Dios.

18 Ket gapu ta natnag manipud iti langit, ket nagbalin a nakaledleddaang iti agnanayon, pinaggepna ti pagleddaangan ti amin a sangkataoan. Gapuna, kinunana ken ni Eva, wen, uray pay iti dayta nataengan nga uleg, nga isu ti sairo, nga ama ti amin a kinaulbod, gapuna kinunana: Manganka iti maiparit a bunga, ket saankanto a matay, ngem agbalinkanto a kas iti Dios, a makaammo iti naimbag ken dakes.

19 Ket kalpasan ti pannangan da Adan ken Eva iti maiparit a bunga napapanawda iti minuyongan ti Eden, tapno sukayenda ti daga.

20 Ket naganakda; wen, uray pay iti pamilia iti amin a daga.

21 Ket dagiti aldaw ti annak ti tattao ket pimmaut, a mayannurot iti pagayatan ti Dios, tapno makapagbabawida bayat iti kaaddada iti nainlasagan a bagi; gapuna, nagbalin ti kasasaadda a kasasaad ti pannakapadas, ket nayatiddog ti panawen ti panagbiagda, a mayannurot kadagiti bilin nga inted ti Apo a Dios kadagiti annak ti tattao.Ta nangted iti bilin a nasken nga agbabawi amin a tattao; ta imparangarangna iti amin a tattao a napukawda, gapu iti panaglabsing dagiti nagannakda.

22 Ket ita, kitaen, no saan a naglabsing ni Adan saan koma a natnag, ngem nagtalinaed koma isuna iti minuyongan ti Eden. Ket nagtalinaed koma amin a bambanag a naparsua iti sigud a kasasaadda kalpasan ti pannakaparsuada; ket nagtalinaedda koma iti agnanayon, nga awan patinggana.

23 Ket awan koma ti annakda; gapuna nagtalinaedda koma iti kasasaad ti kinainosente, nga awanan iti rag-o, ta saanda nga ammo ti leddaang; agaramid iti saan a naimbag, gapu ta saanda nga ammo ti basol.

24 Ngem kitaen, naaramid amin a banag a mayannurot iti kinasiribna a makaammo iti amin a banag.

25 Ni Adan ket natnag tapno mabalin nga agadda ti tattao; ket ti tattao nagadda, tapno maaddaanda ti rag-o.

26 Ket umayto ti Mesias iti tumutop a panawen, tapno subbotenna dagiti annak ti tattao manipud iti pannakatnag. Ket gapu ta nasubbotda manipud iti pannakatnag nagbalinda a siwayawaya iti agnanayon, a makaammo iti naimbag manipud iti dakes; nga agtignayda iti bagbagida ket saanda a painakman, malaksid iti pannusa ti paglintegan iti naindaklan ken maudi nga aldaw, a mayannurot kadagiti bilin nga inted ti Dios.

27 Gapuna, siwayawaya dagiti tattao a mayannurot iti nainlasagan a bagi; ket naited amin a banag kadakuada a kas kasapulan ti tao. Ket siwayawayada nga agpili iti wayawaya ken agnanayon a biag, babaen ti naindaklan a Mangibabaet iti amin a tattao, wenno mangpili iti pannakaadipen ken ipapatay, babaen iti panangadipen ken pannakabalin ti sairo; gapu ta kalikagumanna nga agbalin a nakakaasi amin a tattao a kas kenkuana.

28 Ket ita, lallaki nga annakko, kayatko nga agtalekkayo iti naindaklan a Mangibabaet, ken indenganyo dagiti naindaklan a bilinna; ken agbalinkayo a napudno kadagiti balikasna, ken pilienyo ti biag nga agnanayon, a mayannurot iti pagayatan ti Nasantuan nga Espirituna.

29 Ket saanyo a pilien ti agnanayon nga ipapatay, a mayannurot iti pagayatan ti lasag ken ti sairo a mangik-ikut iti daytoy, a mangted iti espiritu ti sairo ti pannakabalin a mangadipen, a mangiturong kadakayo iti impierno, tapno maiturayannakayo iti pagarianna.

30 Naibagakon dagitoy sumagmamano a balikas kadakayo amin, lallaki nga annakko, kadagiti maudi nga aldaw ti pannakapadasko; ket pinilik ti naimbag a paset, babaen iti balikas ti propeta. Ket awan ti sabali a panggepko malaksid ti agnanayon a pagsayaatan dagiti kararuayo. Amen.